ខេត្តតាកែវ ៖ នៅព្រឹកថ្ងៃទី ១១ ខែមករា ឆ្នាំ២០២០ នៅទីស្នាក់ការគណបក្សប្រជាជនកម្ពុជាឃុំភ្នំដិន ស្រុកគីរីវង់ ខេត្តតាកែវ បានរៀបចំប្រារព្ធពិធី អបអរសាទរខួបអនុស្សាវរីយ៍លើកទី៤១ ទិវាជ័យជម្នះ ៧ មករា ក្រោមអធិបតីភាពឯកឧត្តម សុខ សំណាង ប្រធានក្រុមការងារចុះជួយឃុំភ្នំដិន និងជាអនុប្រធានក្រុមការងារថ្នាក់ជាតិចុះជួយស្រុកគីរីវង់ លោកឧញ្ញា អ៊ុក ភក្តី និងមានការចូលរួមពីមន្រ្តីរាជការ កងកម្លាំងសិស្សានុសិស្ស យុវជនគ្រប់ប្រភេទ និងបងប្អូនប្រជាពលរដ្ឋសរុបប្រមាណ ជាង ៥០០នាក់ ។
ថ្លែងនាឱកាសនោះឯកឧត្តម សុខ សំណាង បានឲ្យដឹងថាការប្រារព្ធមិទ្ទិញអបអរសាទរថ្ងៃជ័យជម្នះ ៧ មករា ថ្ងៃនេះ គឺបង្ហាញអោយឃើញនូវ ស្មារតីចងចាំជានិច្ច ចំពោះគុណូបការៈដ៏ឧត្តុង្គឧត្តមរបស់វីរកម្មាភិបាល យុទ្ធជនយុទ្ធនារី នៃរណសិរ្សសាមគ្គីសង្រ្គោះជាតិកម្ពុជាដែល បានធ្វើការលះបង់យ៉ាងធំធេង ក្នុងការប្រយុទ្ធផ្តួលរំលំ របបប្រល័យពូជសាសន៍ ប៉ុល ពត និងបាននាំមកនូវការបង្រួបបង្រួមជាតិ និងការជួបជុំគ្រួសារខ្មែរឡើងវិញ ជាពិសេសការពារការរស់ឡើងវិញ នៃរបបដ៏អាក្រក់នេះ ។
ក្នុងការរម្លឹកខួប នៃការបញ្ចប់របប ខ្មែរក្រហម គឺជាថ្ងៃ ៧មករា ទិវាជ័យជម្នះលើការផ្តួលរំលំរបបកម្ពុជា ប្រជាធិបតេយ្យ៧មករា គឺជាទិវាជាតិជាប្រវត្តិសាស្រ្ត ដែលប្រជាពលរដ្ឋទូទៅស្រលាញ់សន្តិភាពចាត់ទុកជាកំណើតទី២ របស់ខ្លួនរួចមកហើយ ។
ឯកឧត្តមប្រធានក្រុមការងារចុះជួយឃុំភ្នំដិនបានមានប្រសាសន៍បន្តថា ក្នុងអំឡុងនៃការដឹកនាំប្រទេសកន្លងមក រដ្ឋាភិបាលកម្ពុជាដែលដឹកនាំដោយគណបក្សប្រជាជនកម្ពុជា មានសម្តេចអគ្គមហាសេនាបតីតេជោ ហ៊ុន សែន ជាប្រមុខ បានខិតខំប្រឹងប្រែងយ៉ាងខ្លាំង ក្នុងការស្តារសន្តិភាព ស្ថិរភាពសង្គមកម្ពុជាទើបប្រទេសជាតិ មានសុខសន្តិភាព និងមានការអភិវឌ្ឍន៍ដូចសព្វថ្ងៃនេះ មិនថានូវតាមមូលដ្ឋានភូមិឃុំដាច់ស្រយ៉ាលឡើយ ។
