ក្រុងព្រះសីហនុ ៖ វេលាម៉ោង ១០ៈ២០ នាទីថ្ងៃទី ១៣ ខែមករាឆ្នាំ ២០២០ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តដឹកភេសជ្ជៈដែលមានគ្នាបួននាក់ បានក្រឡាប់ផ្ងារជើងកិនលើម៉ូតូចំនួន ២គ្រឿង តែគ្មានអ្នករងរបួសនោះទេ ។
ហេតុការណ៍ខាងលើនេះបានកើតឡើងនៅចំណុចភូមិលេខ២ សង្កាត់លេខ២ ក្រុងនិងខេត្តព្រះសីហនុ ទល់មុខហាងថតរូបអប្សរា តាមការសាកសួរពីសន្តិសុខដែលនៅជិតកន្លែងកើតហេតុបានឲ្យដឹងថា រថយន្តដឹកភេសជ្ជៈមួយគ្រឿងមានគ្នារួមដំណើបួននាក់ បានបើករថយន្តទិសដៅពីជើងមកត្បូង បម្រុងនឹងបត់ទៅលិចដោយរថយន្តមានល្បឿនលឿនយកចង្កូតមិនទាន់ ភ្លាមនោះក៏មានម៉ូតូ២គ្រឿងបើកបញ្ច្រាស់ទិសគ្នា រថយន្តក៏បានវេរចង្កូតក្រឡាប់ផ្ញើជើងតែម្ដង ។ តែសំណាងមិនមានអ្នករងរបួសទេ ដោយសារអ្នកបើកបរម៉ូតូទាំង២គ្រឿង លោតចេញពីម៉ូតូទាន់ពេល ប៉ុន្តែម៉ូតូទាំង២គ្រឿង រងការខូចខាតយ៉ាងដំណំ ។ ភ្លាមៗនោះក៏មានវត្តមានសមត្ថកិច្ចចរាចរណ៍គាត់មកជួយអន្តរាគមន៍នៅទីនោះផងដែរ ។
