ភ្នំពេញ ៖ កងអាវុធហត្ថលើផ្ទៃប្រទេស នៅថ្ងៃទី១៩ ខែមករា ឆ្នាំ២០២០នេះ បានសម្រេចបញ្ជូនខ្លួន មេបញ្ជាការរងកងរាជអាវុធហត្ថខេត្តបន្ទាយមានជ័យ២នាក់ ទៅតុលាការករណី ធ្វើទារុណកម្មជនសង្ស័យម្នាក់ឲ្យស្លាប់ ពេលស្ថិតក្នុងការឃុំខ្លួនបណ្តោះអាសន្ន។
យោងទៅតាមសេចក្តីប្រកាសព័ត៌មាន របស់កងរាជអាវុធហត្ថលើផ្ទៃប្រទេស បានឲ្យដឹងថា លោកវរសេនីយឯក ស ប៊ុនសឿង ជាមេបញ្ជារង និងលោកអនុសេនីយទោ ឆយ រដ្ឋនា ជាជំនួយការការិយាល័យគ្រឿងញៀន ត្រូវក្រុមស៊ើបអង្កេតពិសេសរកឃើញថា មានជាប់ពាក់ព័ន្ធការស្លាប់របស់បុរសឈ្មោះ ទុយ ស្រស់ ដែលត្រូវមន្ត្រីកងរាជអាវុធហត្ថខេត្តបន្ទាយមានជ័យ ចាប់ខ្លួនក្នុងវិវាទដីធ្លី ។
ក្នុងពិធីជួបសំណេះសំណាលរវាងសម្តេចតេជោ ហ៊ុន សែន ជាមួយអ្នកសារព័ត៌មានជិត៦ពាន់នាក់ នៅថ្ងៃទី១៤ ខែមករា ឆ្នាំ២០២០ សម្តេចតេជោ ហ៊ុន សែន បានប្រកាសពីបទបញ្ជារបស់សម្តេច ឲ្យប្រធានសិទ្ធិមនុស្ស និងមេប៉េអឹម ស្រាវជ្រាវករណីមានការលើកឡើងថា មានមនុស្សស្លាប់ក្នុងពន្ធនាគារ ដោយសារការធ្វើទារុណកម្ម នៅខេត្តបន្ទាយមានជ័យ ។
លោក ទុយ ស្រស់ គឺជាតំណាងប្រជាពលរដ្ឋមានទំនាស់ដីធ្លីនៅភូមិជ្រៃ ឃុំចង្ហា ស្រុកអូរជ្រៅ ខេត្តបន្ទាយ បានស្លាប់កាលពីថ្ងៃទី០១ ខែមករា ឆ្នាំ២០២០ គឺក្រោយពេលមន្ត្រីកងរាជអាវុធហត្ថខេត្តបន្ទាយមានជ័យ ចាប់ខ្លួនជាមួយប្រជាពលរដ្ឋ៣នាក់ទៀត រួចយកទៅដាក់ក្នុងកន្លែងឃុំឃាំងរបស់ទីបញ្ជាការកងរាជអាវុធហត្ថខេត្ត ចាប់ពីថ្ងៃទី២៨ ដល់ថ្ងៃទី៣១ ខែធ្នូ ឆ្នាំ២០១៩ ក្រោយមកត្រូវបានបញ្ជូនបន្តទៅដាក់គុកក្នុងពន្ធនាគារខេត្ត ជាទីដែលលោកបានស្លាប់ ៕
