រសៀលថ្ងៃទី០៦ ខែមីនា ឆ្នាំ២០២៤នេះ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តត្បូងឃ្មុំ អញ្ជើញជាអធិបតីភាព បិទសន្និបាតបូកសរុបវាយតម្លៃលទ្ធផលការងារអប់រំ យុវជន និងកីឡា ឆ្នាំសិក្សា ២០២២-២០២៣ និងលើកទិសដៅការងារឆ្នាំសិក្សា ២០២៣-២០២៤។
ក្នុងនោះមានការអញ្ជើញចូលរួមពីសំណាក់ អភិបាលរងខេត្ត មន្ទីរ-អង្គភាពជុំវិញខេត្ត អភិបាលក្រុង-ស្រុក ថ្នាក់ដឹកនាំ និងមន្ត្រីចំណុះឲ្យមន្ទីរអប់រំ យុវជន និងកីឡាខេត្តត្បូងឃ្មុំ លោកនាយក នាយិកា លោកគ្រូ អ្នកគ្រូនៅតាមសាលា និងគ្រឹះស្ថានសិក្សាទូទាំងខេត្ត។
លោក អុិន ពៅសម្បត្តិ ប្រធានមន្ទីរអប់រំ យុវជន និងកីឡាខេត្តត្បូងឃ្មុំ បានធ្វើរបាយការណ៍ពាក់ព័ន្ធវិស័យអប់រំ និងកីឡានៅក្នុងខត្ត សម្រាប់ឆ្នាំ២០២៣កន្លងទៅ ទទួលបានលទ្ធផលផ្លែផ្កាយ៉ាងល្អប្រសើរ រីកចម្រើនបោះជំហ៊ានឈានទៅមុខថែមមួយកម្រិតទៀត ក៍ដូចជាបង្ហាញពីផែនការ និងយុទ្ធសាស្ត្រសម្រាប់ឆ្នាំថ្មីនេះផងដែរ។
មានប្រសាសន៍នាឱកាសនោះ ឯកឧត្តមបណ្ឌិត ជាម ច័ន្ទសោភ័ណ បានលើកឡើងថា ប្រមុខរាជរដ្ឋាភិបាលកម្ពុជា ក្រោមការដឹកនាំពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា អាណត្តិទី៧ បានដាក់ចេញនូវ “យុទ្ធសាស្ត្របញ្ចកោណ” ដើម្បីជំរុញកំណើនសេដ្ឋកិច្ច បង្កើតការងារ ធានាសមធម៌ បង្កើនប្រសិទ្ធភាព និង រក្សាចីរភាព។
ឯកឧត្តមបណ្ឌិត អភិបាលខេត្ត បន្តលើកឡើងថា សម្តេចធិបតី ហ៊ុន ម៉ាណែត បានយកចិត្តទុកដាក់យ៉ាងខ្លាំងលើវិស័យអប់រំ ក្នុងនោះ លោកគ្រូ អ្នកគ្រូ ត្រូវបានតម្លើងប្រាក់បៀរវត្សបានកាន់តែខ្ពស់ ជាពិសេសក្នុងឆ្នាំ២០២៤នេះ សម្តេចធិបតី បានធ្វើការបន្តតម្លើងប្រាក់បៀរវត្ស កាំប្រាក់ទៅតាមក្របខណ្ឌ ក ខ និងគ បន្ថែមទៀត ដល់លោកគ្រូ អ្នកគ្រូ និងមន្ត្រីរាជការទូទាំងប្រទេស។
បន្ថែមពីនោះ ឯកឧត្តមបណ្ឌិត ជាម ច័ន្ទសោភ័ណ បានធ្វើការស្នើសុំ ព្រមទាំងជំរុញឲ្យលោកគ្រូអ្នកគ្រូ និងអ្នកពាក់ព័ន្ធៈ ជួយចូលរួម កុំឲ្យសិស្សបោះបង់ចោលការសិក្សា, ជំរុញសិស្សចាប់លេងកីឡា ១ប្រភេទ ឬច្រើនប្រភេទ ដើម្បីសុខភាព ជៀសឆ្ងាយគ្រឿងញៀន និងជាធនធានសម្រាប់វិស័យកីឡាកម្ពុជា ក៍ដូចជាបណ្តុះគំនិតក្មួយៗសិស្សានុសិស្ស ឲ្យចេះស្រលាញ់ និងថែរក្សាបរិស្ថាន ពិសេសសម្អាតសម្រាមទាំងក្នុងសាលារៀន តាមដងផ្លូវនៅក្បែរសាលា ក៍ដូចជាក្នុងសហគមន៍កំពុងរស់នៅ។
ជាចុងក្រោយ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្ត ថ្លែងអំណរគុណ កោតសរសើរ និងវាយតម្លៃខ្ពស់ ចំពោះថ្នាក់ដឹកនាំ និងមន្ត្រីគ្រប់លំដាប់ថ្នាក់នៃមន្ទីរអប់រំ យុវជន និងកីឡាខេត្ត ជាពិសេសលោកគ្រូ អ្នកគ្រូ ទាំងសាលារៀនរដ្ឋ និងឯកជន ដែលបានខិតខំយកអស់កម្លាំងកាយចិត្ត បណ្តុះបណ្តាលធនធានមនុស្ស ដែលជាគ្រឹះដ៍សំខាន់ សម្រាប់អភិវឌ្ឍន៍សង្គមជាតិ៕
