រាជធានីភ្នំពេញ ៖ ជាថ្មីម្តងទៀត ក្រសួងសុខាភិបាល បានចេញសេចក្តីប្រកាសមួយ ដោយច្រានចោលនូវរាល់ព័ត៌មានដែលបានផ្សព្វផ្សាយតាមរយៈបណ្តាញទំនាក់ទំនងសង្គម Facebook និងប្រព័ន្ធផ្សព្វផ្សាយតាមអនឡាញមួយចំនួនកន្លងមក ដែលបានប្រឌិត និងផ្សាយព័ត៌មានមិនពិតថា មានករណីជំងឺរលាកសួតដោយវីរុសកូរ៉ូណាថ្មី ត្រូវបានរកឃើញនៅកម្ពុជា ។
ក្រសួងសុខាភិបាលរកម្ពុជា បានបញ្ជាក់ថា គិតត្រឹមម៉ោង១១ព្រឹក នៃថ្ងៃអាទិត្យ ២កើត ខែមាឃ ឆ្នាំកុរ ព.ស ២៥៦៣ ត្រូវនឹងថ្ងៃទី២៦ ខែមករា ឆ្នាំ២០២០ មិនទាន់មានករណីជំងឺរលាកសួតដោយវីរុសកូរ៉ូណាថ្មី (2o19-Cov) ដែលត្រូវបានរកឃើញនៅកម្ពុជានៅឡើយទេ ។ ជាមួយគ្នានេះ ក្រសួងបានព្រមានចាត់វិធានការតាមច្បាប់ចំពោះ Facebook មួយចំនួនបើសិនជានៅតែបន្តប្រឌិតព័ត៌មាននេះតទៅទៀត ។
ពាក់ព័ន្ធនឹងការផ្សព្វផ្សាយបោកប្រាស់នេះ ក្រសួងស្នើសុំឲ្យម្ចាស់គណនីយ Facebook ទាំងអស់ដែលបានបន្តផ្សព្វផ្សាយ ឬបញ្ជូនព័ត៌មានមិនពិតនេះ ឱ្យបញ្ឈប់ និងលុបចោលនូវការផ្សាយព័ត៌មានមិនពិតរបស់ខ្លួន ដែលបង្កើតឲ្យមានការសង្ស័យមកលើក្រសួងសុខាភិបាលថា ក្រសួងបានលាក់បាំងនូវព័ត៌មានស្តីពីករណីជំងឺនេះនៅកម្ពុជា ។
សេចក្តីប្រកាសរបស់ក្រសួងសុខាភិបាល បានបញ្ជាក់ថា៖ នេះជាទង្វើដែលមិនអាចអត់ឱនឲ្យបាន និងជាទង្វើប្រាសចាកសីលធម៌ និងសច្ចៈភាព ដែលបង្កឲ្យប្រជាជនបាត់បង់ជំនឿលើវិធានការ និងការខិតខំប្រឹងប្រែងរបស់ក្រសួង ក្នុងការទប់ស្កាត់ការចម្លងជំងឺរលាកសួតប្រភេទវីរុសថ្មីនេះ ដែលក្រសួងកំពុងតែបំពេញភារកិច្ចយ៉ាងសកម្មក្នុងការទប់ស្កាត់ជំងឺនេះផងដែរ ។
ក្រសួងសុខាភិបាល បានធ្វើបច្ចុប្បន្នភាពករណីជំងឺរលាកសួតប្រភេទវីរុសថ្មីនេះ និងច្រើនរំលឹកពីវិធានការការពារការចម្លងជំងឺរលាកសួតដោយវីរុសកូរ៉ូណាថ្មី (2019-nCoV) ដោយសង្ខេបដូចតទៅ៖
១. ស្ថានភាពជំងឺនៅក្រៅប្រទេស ៖ ការអង្កេតស្រាវជ្រាវរបស់អង្គការសុខភាពពិភពលោកនៅធ្វើបន្ត ដើម្បីស្វែងរកប្រភពបច្ចុប្បន្ននិងរបៀបនៃការចម្លងជំងឺដោយវីរុសប្រភេទ 2019-Cov នេះ។ ផ្អែកលើការសង្កេតបច្ចុប្បន្ននេះ និងការយល់ដឹងពីជំងឺផ្លូវដង្ហើមដែលបានកើតឡើងពីមុនៗមកនោះ អង្គការសុខភាពពិភពលោកបានផ្តល់ដំបូន្មានជូនសាធារណៈជនថា យោងតាមគោលការណ៍គ្រឹះនៃការគ្រប់គ្រងជំងឺផ្លូវដង្ហើម ជាធម្មតា មានការចម្លងតាមរយៈ * ទឹកមាត់ដែលភ្លុក-កណ្តាស់ និងការប៉ះពាល់អ្នកជំងឺ ។
សម្រាប់ជំងឺ SARS ឬ MERS គេបានរកឃើញថា សត្វប្រជៀវ មានមុខងារដ៏សំខាន់ក្នុងការចម្លងជំងឺទាំង២មុខនេះ ក៏ប៉ុន្តែសម្រាប់ជំងឺរលាកសួតដោយវីរុសកូរ៉ូណាថ្មី (2019-nCoV) នេះគេកំពុងតែស្រាវជ្រាវនៅឡើយ ហើយមិនទាន់កំណត់បាននូវប្រភព និងរបៀបនៃការចម្លងជំងឺថ្មីនេះនៅឡើយទេ ៕
ខាងក្រោមនេះជាសេចក្តីប្រកាសទាំងស្រុង របស់ក្រសួងសុខាភិបាល ៖
