ខេត្តកំពង់ចាម៖ អាខ្លា ! ពិតជាមិនធម្មតានោះទេ គឺជាមេ កន្ទុយលេខយួនខុសច្បាប់ដ៏ល្បី ខ្លាំង មានអំណាច មានទឹកលុយ មានបក្ខពួកច្រើន ថែមទាំងមានឥទ្ធិពលទៀត ផង។ «អាខ្លា» គឺជាមេកញ្ជ្រែងមេឆ្នោតវៀតណាម (ឆ្នោតយួន) បានកំពុងសម្ងំកើបលុយយ៉ាងច្រើនសន្ធឹកសន្ធាប់ពីការលក់,កត់ឆ្នោតវៀតណាមលក់ឲ្យអតិថិជនដែលជាក្រុមញៀនលេងល្បែងសុីសងខុសច្បាប់តាមរយះសារអេឡិចត្រនិក ឆាត,តេលេក្រាម និងចុងសន្លឹកនៅក្បែររង្វង់មូលគល់ស្ពានគីហ្សូណា ក្បែរចិញ្ចើមរបងស្នងការដ្ឋានខេត្ត ស្ថិតក្នុងភូមិទី៣ សង្កាត់វាលវង់ ក្រុងកំពង់ចាម ខេត្តកំពង់ចាម។
តើមេឆ្នោត«អាខ្លា» ខាងលើនេះ ធ្វើសកម្មភាពលក់ កត់ឆ្នោតវៀតណាមខុសច្បាប់នេះ លក់ឲ្យទៅអតិថិជនយ៉ាងដូចម្ដេច បានជារក្សាភាពស្ងៀមស្ងាត់ បានល្អម៉្លេះ សូម្បីតែលោកផ្កាយ២ ហេង វុទ្ធី ស្នងការខេត្តនិងលោក អ៊ុន ចាន់ដា អភិបាលខេត្តក៏មិនអាចដឹង ឬមួយ មានក្រុមឬបក្ខពួកអាខ្លាជួយព្យាយាមលាក់កំបាំងពីលោកទាំងទ្វេរ ?។
តាមប្រភពបានឲ្យដឹងថា កន្ទុយលេខឬឆ្នោតយួននេះ មិនមានច្បាប់អនុញ្ញាតឲ្យបើកលេងនោះទេ គឺមេឆ្នោតរូបនេះ អាចនឹងជ្រកក្រោមយីហោឆ្នោតខ្មែរដែលមាន ច្បាប់ ដូចជាឆ្នោតមហាសម្បត្តិជាដើម ព្រោះអតិថិជនដែលជាក្រុមអ្នកញៀនលេងឆ្នោតគឺពួកគេនិយមលេងតែកន្ទុយលេខឬឆ្នោតវៀតណាមនោះទេ ដែលទង្វើខាង លើនេះសបញ្ជាក់ឲ្យឃើញបានកំពុងតែល្មើសច្បាប់ស្តីពីការបង្ក្រាបល្បែងស៊ីសងយ៉ាងធ្ងន់ធ្ងរ។
ឬមួយដូចប្រសាសន៍របស់សម្ដេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជាថា «ចង្វាចិញ្ចឹមឆ្ដោ» ទើបគ្មានក្រុមអាជ្ញាធរ ឬកម្លាំងសមត្ថកិច្ចណាហ៊ានចុះបង្ក្រាបនៅទីតាំងនោះ។
ប្រភពឲ្យដឹងថា មេឆ្នោតយួន”អាខ្លា”បានកំពុងលួច លាក់ លក់ កត់ឆ្នោតយួន ជ្រកក្រោមឆ្នោតខ្មែរ លាភមហាសម្បត្តិ នៅចំណុចខាងលើជាយូរណាស់មកហើយ។ ហើយម៉ោងឆ្នោតវៀតណាមដែលគេនិយមលេងគឺចេញម៉ោង៤កន្លះរសៀលម្ដង និងចេញម៉ោងន៦កន្លះល្ងាចម្ដងទៀត។
បើតាមច្បាប់ស្តីពីការបង្ក្រាបល្បែងស៊ីសង៖
មាត្រា១៖ ត្រូវហាមឃាត់ជាដាច់ខាតការលេងល្បែងស៊ីសងគ្រប់ប្រភេទ នៅគ្រប់ទីកន្លែងទូទាំងព្រះរាជាណា- ចក្រកម្ពុជា លើកលែងតែបានទទួលការអនុញ្ញាតពីរាជរដ្ឋាភិបាល។
មាត្រា៤៖ ជនណាលេងល្បែងស៊ីសង ជននោះត្រូវផ្តន្ទាទោសពិន័យជាប្រាក់ពីមួយម៉ឺនរៀល (១០.០០០៛០០ ) ដល់ប្រាំម៉ឺនរៀល (៥០.០០០៛០០) ឫដាក់គុកពីមួយសប្តាហ៍ដល់១ខែ។ ក្នុងករណីពុំរាងចាល ត្រូវផ្តន្ទាទោស ពិន័យជាប្រាក់ពីប្រាំម៉ឺនរៀល (៥០.០០០៛០០ )ដល់ប្រាំសែនរៀល ( ៥០០.០០០៛០០) និងដាក់គុកពីមួយខែដល់មួយឆ្នាំ។
មាត្រា៥៖ ត្រូវផ្តន្ទាទោសពិន័យជាប្រាក់ពីប្រាំលានរៀល (៥.០០០.០០០៛០០ ) ដល់ម្ភៃលានរៀល ( ២០.០០០.០០០៛០០) និងដាក់គុកពីមួយឆ្នាំដល់ប្រាំឆ្នាំ ចំពោះអ្នកបើកកន្លែងលេងល្បែងស៊ីសង អ្នកកាន់កាប់ ល្បែងស៊ីសង អ្នកចាត់ចែងនិងភ្នាក់ងារស៊ីសង។ ក្នុងករណីពុំរាងចាល ត្រូវផ្តន្ទាទោសពិន័យជាប្រាក់និងដាក់គុកខាងលើនេះជាអតិបរមា ។
មាត្រា៦៖ កាលណានៅក្នុងវង់ល្បែងមានអនីតិជនម្នាក់ឬច្រើននាក់នៅជាមួយផង ទោសដែលបានចែងក្នុងមាត្រា ៤ និងមាត្រា ៥ នៃច្បាប់នេះ ត្រូវយកមកអនុវត្តដល់អតិបរមា ។
មាត្រា៧៖ ក្នុងករណីណាក៏ដោយ ប្រាក់ដែលដាក់ក្នុងវង់ល្បែង ប្រាក់ដែលមាននៅនឹងខ្លួនអ្នកចាត់ចែងល្បែង នៅនឹងខ្លួនមេល្បែង នៅនឹងខ្លួនភ្នាក់ងារល្បែង នៅនឹងខ្លួនអ្នកនឹងខ្លួនអ្នកជួយស៊ីសងក្នុងវង់ល្បែង នៅនឹងខ្លួនអ្នកទទួល ភារកិច្ចខាងគណនេយ្យ នៅនឹងខ្លួនអន្តរការីនិងនៅនឹងខ្លួនអ្នកលេងល្បែង ត្រូវភ្នាក់ងារមាននសមត្ថកិច្ចចាប់រឹបអូស ហើយធ្វើកំណត់ហេតុឱ្យបានត្រឹមត្រូវបញ្ជូនទៅតុលាការ។
ទោះបីជាយ៉ាងណាក៏ដោយ មហាជនទន្ទឹងរង់ចាំមើលពីចំណាត់ការរបស់លោកហេង វុទ្ធី ស្នងការនគរបាលខេត្តនិងលោកអ៊ុន ចាន់ដា អភិបាលខេត្តកំពង់ចាមចំពោះករណីមេឆ្នោតវៀតណាមខាងលើនេះ៕
