ប្រទេសចិន ៖ ការស្នើសុំការអនុញ្ញាតធ្វើតេស្ដព្យាបាល ដោយប្រើប្រាស់ថ្នាំប្រឆាំងវីរុសឈ្មោះ រ៉េមដឺស៊ីវើ (Remdesivir) ត្រូវបានអនុម័តហើយ រីឯក្រុមមនុស្សដំបូង ដែលមានជំងឺរលាកសួតបង្កឡើងដោយកូរ៉ូណាវីរុសថ្មី (2019-nCoV) ត្រូវបានគេរំពឹងថា ចាប់ផ្ដើមទទួលបានការព្យាបាល ជាមួយថ្នាំប្រភេទនេះកាលពីថ្ងៃព្រហស្បតិ៍ ។ នេះបើតាមការដកស្រង់ការផ្សាយពី ទីភ្នាក់ងារព័ត៌មានចិនស៊ីនហួរ នៅរសៀលថ្ងៃសុក្រ ទី០៧ ខែកុម្ភៈ ឆ្នាំ២០២០នេះ ។
ការអនុម័តខាងលើត្រូវបានធ្វើឡើងរួមគ្នា ដោយក្រសួងវិទ្យាសាស្ត្រ និងបច្ចេកវិទ្យាចិន (MOST), គណៈកម្មាការជាតិសុខាភិបាល និងរដ្ឋបាលជាតិផលិតផលថ្នាំពេទ្យ នៅសន្និសីទសារព័ត៌មាន នៅឯមន្ទីរពេទ្យ ជីយីនតាន់ វូហាន (Wuhan Jinyintan) ស្ថិតនៅក្នុងខេត្តហ៊ូប៉ី (Hubei) ។ គិតជាសរុបអ្នកជំងឺនៃវីរុសកូរ៉ូណា ៧៦១នាក់ បានចុះឈ្មោះ ទទួលការព្យាបាលដោយប្រើថ្នាំ Remdesivir ប៉ុន្តែលទ្ធផលយ៉ាងណាមិនទាន់មានការបង្ហាញនៅឡើយទេ ។
គួរជម្រាបថា Remdesivir គឺជាថ្នាំប្រឆាំងនឹងវីរុស ផលិតដោយក្រុមហ៊ុនថ្នាំពេទ្យអាមេរិក ជីលីដសាយអិនស៍ (Gilead Sciences)។ ថ្នាំប្រភេទនេះធ្លាប់បានបង្ហាញលទ្ធផលល្អ ក្នុងការធ្វើតេស្ដព្យាបាលប្រឆាំងនឹងវីរុស SARS និង MERS ដែលនៅក្នុងចង្កោមគ្រួសារកូរ៉ូណាវីរុស។ មិនតែប៉ុណ្ណោះថ្នាំ Remdesivir ក៏ធ្លាប់ត្រូវបានប្រើប្រាស់ប្រឆាំងនឹងវីរុសអេបូឡា (Ebola) ហើយបើក្រុមអ្នកវិទ្យាសាស្ត្រចិន ថ្នាំឈ្មោះ Remdesivir នេះក៏បានបង្ហាញលទ្ធផលល្អគួរសមផងដែរ ក្នុងការធ្វើតេស្ដមួយប្រឆាំងវីរុសកូរ៉ូណាថ្មី (2019-nCoV) នៅក្នុងស្រុក ៕
