ខេត្តព្រះសីហនុ ៖ ក្រោយពីនាវា Westerdam បានចតនៅកំពង់ផែខេត្តព្រះសីហនុ ក្រោយមានការអនុញ្ញាតពីសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃទី១៣ ខែកុម្ភៈ ឆ្នាំ២០២០នេះ លោកស្រី អេវ៉ា ង្វៀន ប៊ិញ (Eva Nguyen BINH) ឯកអគ្គរដ្ឋទូតបារាំង ប្រចាំនៅកម្ពុជា និងព្រមទាំងតំណាងស្ថានទូត សហរដ្ឋអាមេរិក, កាណាដា, ហូឡង់ និងអូស្ត្រាលីជាដើម បានចុះទៅត្រួតពិនិត្យដោយផ្ទាល់នៅខេត្តព្រះសីហនុ ដែលមានជនជាតិរបស់ខ្លួន ស្ថិតនៅលើកប៉ាល់ទេសចរណ៍យក្សមួយនេះ ។
ឯកឧត្តម គួច ចំរើន អភិបាលខេត្តព្រះសីហនុ បានឱ្យដឹងដែរថា អាជ្ញាធរនិងក្រសួងសុខាភិបាល បានរៀបចំដាក់វិធានការ ការពារច្បាស់ណាស់ ដោយមិនឱ្យមានមនុស្សចូលទៅជិតអ្នកដំណើរក្នុងនាវាទេសចរណ៍ Westerdam និងមិនអនុញ្ញាតឱ្យចេញចូលដោយសេរីនោះទេ លុះត្រាណាតែមានការពិនិត្យពីក្រុមគ្រូពេទ្យត្រឹមត្រូវ ។
យោងតាមបញ្ជីអ្នកដំណើរដែល ទទួលបានពីអាជ្ញាធរខេត្តព្រះសីហនុ បានបង្ហាញឲ្យឃើញថា នាវាទេសចរណ៍ខ្នាតយក្ស Westerdam ផ្ទុកអ្នកទេសចរណ៍ចំនួន ៤១ជាតិសាសន៍ ក្នុងនោះមានជនជាតិអាមេរិកច្រើនជាងគេ មានចំនួនរហូតដល់ ៦៥១នាក់ ជនជាតិកាណាដា២៧១នាក់ អង់គ្លេស១២៧នាក់ និងជាតិសាសន៍ដទៃផ្សេងៗទៀត ។
ជាមួយគ្នានោះដែរ សម្រាប់ស្ថានទូតអាមេរិក បានក៏បានប្រកាសអំពីលេខទូរស័ព្ទ សម្រាប់ពលរដ្ឋអាមេរិក ដែលត្រូវការជំនួយបន្ទាន់ ដែលអាចទាក់ទងទៅកាន់លេខ៖ +855 23 728 402 សម្រាប់ម៉ោងធ្វើការ និងលេខ +855 23-728 000 បន្ទាប់ពីម៉ោងធ្វើការផងដែរ៕
