ខេត្តបាត់ដំបង ៖ លោក Pablo Chiho Kang ឯកអគ្គរដ្ឋទូតអូស្រ្តាលីថ្មី បានបញ្ជាក់ថា សម្រាប់ខេត្តបាត់ដំបង ប្រទេសអូស្ត្រាលី នឹងបន្តកិច្ចសហប្រតិបត្តិការ ជួយដល់ក ម្ពុជាលើវិស័យ ជាច្រើនបន្ថែមទៀត ពិសេសការបោសសម្អាតមីននៅក្នុងខេត្តតែម្តង ។
នារសៀលថ្ងៃទី២៤ ខែកុម្ភៈ ឆ្នាំ២០២០ ឯកអគ្គរដ្ឋទូតអូស្រ្តាលីថ្មីលោក Pablo Chiho Kang បានអញ្ជើញចូលជួបសម្តែងការគួរសម និងពិភាក្សាការងារជាមួយអភិបាលខេត្តបាត់ដំបង លោក ងួន រតនៈ ពាក់ព័ន្ធទៅនឹងអ្នកទទួលផលលើដីចម្ការមីនបោសសម្អាតរួច ដោយគម្រោង Clearing for Results lll ក្នុងកម្មវិធីទិវាជាតិយល់ដឹងអំពីមីន២៤ កុម្ភៈ និងដំណើរទស្សនកិច្ចចម្ការមីនបោសសម្អាតរួច ក្នុងខេត្តបាត់ដំបង ។
លោក ងួន រតនៈ បានស្វាគមន៍ដល់ ឯកអគ្គរដ្ឋទូតអូស្រ្តាលីថ្មី និងប្រតិភូ និងបានជម្រាបជូនថា ខេត្តបាត់ដំបងមានផ្ទៃដីសរុប ១១,៧៤៨ គីឡូម៉ែត្រក្រឡា។ រដ្ឋបាលខេត្តត្រូវបានបែងចែកជា ក្រុង១ ស្រុក ១៣ មាន ៩២ឃុំ ១០សង្កាត់ និង៨០៩ភូមិ ។ មានប្រជាពលរដ្ឋសរុបចំនួន ១,២០៥,០៥០នាក់ ក្នុងនោះស្រី ៦០២,៩៩៤នាក់ ស្មើ ២៦៣,៤៣៥គ្រួសារ និងមានប្រជាពលរដ្ឋប្រមាណ៧២% ប្រកបមុខរបរកសិកម្ម ។
លោកថា នៅប៉ែកខាងលិចខេត្ត មានព្រំប្រទល់ជាប់ជាមួយខេត្តនៃប្រទេសថៃ គឺខេត្តច័ន្ទបូរី ខេត្តត្រាត និងខេត្តស្រះកែវ ហើយមានច្រកទ្វារព្រំដែនអន្តរជាតិចំនួន០២ គឺច្រកទ្វារអន្តរជាតិដូង (ស្រុកកំរៀង) ច្រកទ្វារអន្តរជាតិភ្នំដី (ស្រុកសំពៅលូន) និងមានច្រកទ្វារតំបន់ចំនួន៣ គឺច្រកទ្វារតំបន់ព្រំដែនអូររំដួល (ស្រុកភ្នំព្រឹក) ច្រកទ្វារតំបន់ព្រំដែនអូរអន្លក់ (ស្រុកកំរៀង)និងច្រកទ្វារតំបន់ព្រំដែន៤០០ (ស្រុកសំឡូត) ដើម្បីធ្វើការទំនាក់ទំនងសហប្រតិបត្តិការលើគ្រប់វិស័យជាមួយប្រទេសថៃ។
លោកបានបន្តថា «កន្លងមកប្រទេសកម្ពុជាយើងបានទទួលជំនួយផ្សេងៗពីប្រទេសអូស្រ្តាលី ពិសេសវិស័យបោសសម្អាតមីនក្នុងខេត្តបាត់ដំបងរហូតមក ។ ជាក់ស្តែងថ្មីៗនេះ យើងបាននិងកំពុងកសាងស្ពានថ្មថ្មី នៅខាងមុខសាលាខេត្តចាស់ ហើយយើងបានរាវរកឃើញគ្រាប់យុទ្ធភ័ណ្ឌមិនទាន់ផ្ទុះចំនួន ៣៦គ្រាប់ នៅតាមច្រាំងស្ទឹងសង្កែ ហើយបានធ្វើការបំផ្ទុះនៅនឹងកន្លែងផងដែរ» ។
លោក Pablo Chiho Kang បានជម្រាបជូនលោកអភិបាលខេត្តថា នៅប្រទេសកម្ពុជាដោយឡែកនៅខេត្តបាត់ដំបងផ្ទាល់ ប្រទេសអូស្ត្រាលីនឹងបន្តកិច្ចសហប្រតិបត្តិការ ជួយដល់កម្ពុជាលើវិស័យជាច្រើនបន្ថែមទៀត ពិសេសការបោសសម្អាតមីននៅក្នុងខេត្តបាត់ដំបងតែម្តង ។
លោក Pablo Chiho Kang បានថ្លែងអំណរគុណផងដែរ ចំពោះលោកអភិបាលខេត្តបានអនុញ្ញាត និងបង្កលក្ខណ:ឲ្យលោកជាអ្នកការទូតថ្មី បានចូលជួបសម្តែងការគួរសមដោយទទួល យ៉ាងរាក់ទាក់កក់ក្តៅបំផុត ហើយបានចុះនៅតាមស្រុកគោលដៅនានាដែលមាននៅសេសសល់ចម្ការមីននិងដីដែលបានបោសសម្អាតមីនអស់ហើយនាព្រឹកថ្ងៃនេះផងដែរ ៕
