ភ្នំពេញ ៖ នៅវេលាម៉ោង ០២ៈ០០ នាទី រសៀល ថ្ងៃទី២៩ ខែកុម្ភៈ ឆ្នាំ២០២០ កម្លាំងសមត្ថកិច្ចនាយកដ្ឋានព្រហ្មទណ្ឌក្រសួងមហាផ្ទៃ បានបញ្ជូនជនសង្ស័យចំនួន០៣នាក់ ជាអតីតកូនចៅលោក ភឿន ផល្លា ទៅកាន់តុលាការសាលាដំបូងរាជធានីភ្នំពេញ ពាក់ព័ន្ធបណ្ដឹងយកដីកម្មសិទ្ធិរបស់លោក ភឿន ផល្លា លក់ដោយគ្មានការអនុញ្ញាត ។
ជនសង្ស័យទាំង០៣នាក់ កន្លងមកជាអ្នកស៊ីឈ្នួលយាមដីអោយលោក ភឿន ផល្លា ប៉ុន្ដែក្រោយមកមានចិត្តលោភលន់ បានទាក់ទងទៅបុគ្គលមានប្រាក់ ដើម្បីលក់ដីដែលជាកម្មសិទ្ធិរបស់លោក ភឿន ផល្លា ក្នុងតម្លៃក្រោមទីផ្សារ ។ ក្រោយមក បុគ្គលទាំង៣ត្រូវបានអនុរដ្ឋលេខាធិការក្រសួងមហាផ្ទៃម្នាក់ និងជំទាវមានអំណាចម្នាក់ ស្ថិតនៅក្រោយខ្នងក្នុងការធ្វើឯកសារផ្លូវច្បាប់ផ្សេងៗ ។
ប្រភពពីនាយកដ្ឋានព្រហ្មទណ្ឌក្រសួងមហាផ្ទៃ បានឱ្យដឹងថា បុគ្គលទាំង៣នាក់នោះ បានសារភាពថា ខ្លួនបានលក់ដីចំនួន២ហិកតា ក្នុងតម្លៃ១៥ម៉ឺនដុល្លារ និងបានចំណាយថវិការចំនួន៧ម៉ឺនដុល្លារ សម្រាប់អ្នកផ្លូវច្បាប់ ដោយឡែកថវិកា៤ម៉ឺនដុល្លារ សម្រាប់លោកចៅសង្កាត់ ចំណែកឯថវិកាចំនួន ៣ម៉ឺនដុល្លារសម្រាប់ចែកគ្នា៣នាក់ នៅសល់១ម៉ឺនដុល្លារ ទៀត សម្រាប់ចាយវាយផ្សេងៗ ។
ប្រភលោក ភឿន ផល្លា បានបញ្ជាក់ថា លោកបានដាក់ពាក្យបណ្ដឹងរួចមកហើយ ដោយសំណូមពរអោយស្ថាប័នច្បាប់ ចាត់វិធានការណ៍ឱ្យបានម៉ឹងម៉ាត់ ចំពោះបុគ្គលទាំង៣នាក់នោះ ដោយឡែកអ្នកទិញដីមិនត្រឹមត្រូវនោះ សូមដោះស្រាយជាមួយលោកជនសង្ស័យទាំង៣នាក់នេះទៅ ។
មកដល់ពេលនេះ មហាជនកំពុងរង់ចាំមើលចំណាត់ការរបស់សាលាដំបូងរាជធានីភ្នំពេញ តើនឹងចាត់វិធានការណ៍បែបណា ចំពោះអ្នកយកដីគេលក់ ៕
