ក្រុងភ្នំពេញ ៖ នាព្រឹកថ្ងៃទី៣ ខែមីនា ឆ្នាំ២០២០ លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានដឹកនាំមន្ត្រីជំនាញ និងអាជ្ញាធរខណ្ឌមានជ័យ ចុះពិនិត្យមើលស្ថានភាពផ្សារស្ទឹងមានជ័យដោយផ្ទាល់ ដើម្បីធ្វើការជួសជុលផ្សារនេះឡើងវិញ។
ដោយសារស្ថានភាពផ្សារស្ទឹងមានជ័យ មានអាយុកាលជាង ៦០ទសវត្សន៍ ដែលបានសាងសង់ឡើងតាំងពីទសវត្សរ៍ទី៦០ ដោយធ្វើអំពីឈើប្រក់ក្បឿង មកដល់ពេលនេះ មានលក្ខណៈចាស់ទ្រុឌទ្រោមយ៉ាងខ្លាំង ដែលអាចបង្កឲ្យមានគ្រោះថ្នាក់ដល់បងប្អូនអាជីវករ ក៏ដូចជាបងប្អូនប្រជាពលរដ្ឋ ដែលជាអតិថិជននៅក្នុងផ្សារនេះ ។
លោកអភិបាលរាជធានីភ្នំពេញ បានបញ្ជាក់ថា ក្នុងនាមអាជ្ញាធររាជធានីភ្នំពេញ ដែលជាម៉ែ ជាឪ របស់បងប្អូនប្រជាពលរដ្ឋ តែងតែគិតគូរយ៉ាងខ្លាំង អំពីសុខទុក្ខ និងការលំបាករបស់ប្រជាពលរដ្ឋ ។
លោកថា «នៅពេលនេះ ផ្សារស្ទឹងមានជ័យចាស់ ដែលបានកសាងឡើងតាំងពីទសវត្សរ៍ទី៦០មកនោះ ឃើញថាមានសភាពចាស់ទ្រុឌទ្រោម ហើយវានឹងអាច បង្កគ្រោះថ្នាក់ដល់បងប្អូន អាជីវករនិងប្រជាពលរដ្ឋ ខណៈដែលមានភ្លៀង ឬខ្យល់កន្ត្រាក់ម្តងៗ ។ ដូច្នេះទេ រដ្ឋបាលរាជធានីភ្នំពេញគ្រោងធ្វើការជួសជុលផ្សារនេះឲ្យបានល្អប្រសើរឡើងវិញ»។
ប៉ុន្តែទោះបីជាយ៉ាងណាក្តីលោក ឃួង ស្រេង បានបញ្ជាក់ថា គម្រោងនេះ បើបងប្អូនអាជីវករមានការជំទាស់មិនឲ្យធ្វើការជួសជុលឡើងវិញទេ អាជ្ញាធរក៏មិនធ្វើការជួសជុលវិញដែរ ។ តែបើមាន ប្រជាពលរដ្ឋអាជីវករមានការគាំទ្រច្រើន លើសពីអ្នកមិនគាំទ្រ រដ្ឋបាលរាជធានីភ្នំពេញ នឹងធ្វើការជួសជុលឲ្យបានល្អប្រសើរ ដោយរក្សានូវលំនាំដើមទាំងស្រុង ។
គួរបញ្ជាក់ផងដែរថា ផ្សារស្ទឹងមានជ័យតាមការបញ្ជាក់របស់អាជ្ញាធរមូលដ្ឋាន បានឲ្យដឹងថា ផ្សារនេះបានកសាងឡើងក្នុងឆ្នាំ១៩៦៤ ដោយធ្វើអំពីឈើប្រក់ក្បឿងដែលមានទំហំ១៣ ម៉ែត្រគុណ និង១៨ ម៉ែត្រ ។ ប៉ុន្តែមកដល់ពេលនេះ ដោយសារសត្វល្អិត ដូចជា កណ្តៀរ ខ្មូតជាដើមជាដើមចូលស៊ី និងដោយសារមានអាយុកាលយូរហើយនោះ បានធ្វើឱ្យ អគារមានលក្ខណៈពុកផុយ ទើបរដ្ឋបាលខណ្ឌមានជ័យ ស្នើសុំមករដ្ឋបាលរាជធានីឲ្យធ្វើការជួសជុលឡើងវិញ ព្រោះខ្លាចមានគ្រោះថ្នាក់ដោយយថាហេតុដោយបងប្អូនអាជីវករ និងអតិថិជន ៕
