ប្រទេសចិន ៖ យោងតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ! របាយការណ៍ចុងក្រោយរបស់អាជ្ញាធរសុខាភិបាលចិន ស្តីអំពីតួលេខសរុបនៃអ្នកឆ្លង អ្នកស្លាប់ និងអ្នកជាសះស្បើយឡើងវិញពីជំងឺ ខូវីដ១៩ នៅទូទាំងប្រទសចិន បានចេញមកហើយនាព្រឹកថ្ងៃសុក្រ ទី០៦ ខែមីនា ឆ្នាំ២០២០ ។
បើយោងតាមរបាយការណ៍នេះបានឲ្យដឹងថា ចំនួនអ្នកឆ្លងសរុបនៅទូទាំងប្រទេសចិន បានកើនឡើងដល់ ៨០,៥៥២ករណីដោយក្នុងនោះអ្នកជំងឺសរុប ៣,០៤២នាក់ស្លាប់ ខណៈអ្នកដែលបានជាសះស្បើយជាស្ថាពរពីជំងឺនេះ គឺបានកើនឡើងដល់ទៅ ៥៣,៧២៦នាក់បើគិតត្រឹមយប់ថ្ងៃព្រសហ្បតិ៍ម្សិលមិញ ។
បើតាមតួលេខសម្រាប់តែរយៈពេល ពេញមួយថ្ងៃព្រសហ្បតិ៍ម្សិលមិញ អាជ្ញាធរសុខាភិបាលចិនបានឲ្យដឹងដែរថា ករណីឆ្លងថ្មីៗនៅទូទាំងចិនដីគោក មានចំនួន ១៤៣នាក់ ខណៈ ៣០នាក់បានត្រូវរាយការណ៍ថា ស្លាប់នៅក្នុងថ្ងៃដដែលនោះដែរ ។ នៅថ្ងៃជាមួយគ្នាអ្នកជំងឺដែលត្រូវបានគេអនុញ្ញាត ឲ្យចាកចេញពីមន្ទីរពេទ្យ បន្ទាប់ពីពួកគេបានជាសះស្បើយជាស្ថាពរពីជំងឺនេះ មានចំនួនរហូតដល់ ១,៦៨១នាក់ផងដែរ ។
គួរបញ្ជាក់ថា តួលេខថ្មីៗខាងលើនេះ គឺបង្ហាញអំពីការធ្លាក់ចុះបន្ថែមទៀត នៃអត្រាអ្នកឆ្លង និងស្លាប់ថ្មីៗដោយសារមេរោគរាតត្បាត COVID-19 នៅប្រទេសចិន ចំពោះមុខការព្យាយាមប្រយុទ្ធប្រឆាំង យ៉ាងខ្លាំងក្លាបំផុត។ អ្នកជំនាញចិនក៏បាន សន្និដ្ឋានផងដែរថា ករណីឆ្លងថ្មីៗនៃមេរោគ COVID-19 អាចនឹងធ្លាក់ដល់ចំណុចសូន្យ តែម្តងនៅចុងខែមីនាខាងមុខនេះ ៕
