ភ្នំពេញ ៖ ក្រសួងអប់រំយុវជននិងកីឡា បានបង្កើតកម្មវិធីសិក្សាតាមរយៈប្រព័ន្ធអេឡិចត្រូនិក សម្រាប់ជំនួយដល់ការសិក្សារបស់សិស្សានុសិស្ស ដែលបានផ្អាកការសិក្សា មួយរយៈ ។
យោងតាមសេចក្តីប្រកាសព័ត៌មានរបស់ក្រសួងអប់រំយុវជន និងកីឡាបានឲ្យដឹងថា ដើម្បីជាជំនួយដល់ការសិក្សារបស់សិស្សានុសិស្សថ្នាក់ទី ៩និងថ្នាក់ទី ១២ ដែលបានផ្អាកការសិក្សាជាបណ្ដោះអាសន្ន នៅគ្រឹះស្ថានសិក្សាសាធារណៈ និង ឯកជនក្នុងក្រុងសៀមរាប ខេត្តសៀមរាប ក៏ដូចជាសម្រាប់សិស្សានុសិស្សដទៃទៀត ដែលមានបំណងទទួលការបំប៉នបន្ថែម ក្រសួងបានបង្កើតកម្មវិធីសិក្សាការរៀនតាមប្រព័ន្ធអេឡិចត្រូនិច ដោយឥតគិតថ្លៃ លើមុខវិជ្ជាឯកទេសចំនួន៦ ដែលឲ្យសិស្សានុសិស្សទាំងអស់អាចសិក្សាដោយខ្លួនឯងបាន នៅលើបណ្ដាញទំនាក់ទំនងសង្គមផ្លូវការ និងប្រព័ន្ធសិក្សាតាមអេឡិចត្រូនិករបស់ក្រសួង ។ កម្មវិធីនេះបង្កើតឡើងក្នុងគោលបំណង ជួយដល់ការសិក្សារបស់ប្អូនប្អូនសិស្សានុសិស្ស អាចនៅតែបន្តការសិក្សា បានដោយខ្លួនឯងនៅគ្រប់ទីកន្លែង និងស្របតាមពេលវេលាផ្ទាល់ខ្លួន របស់សិស្សានុសិស្ស សម្រាប់ជាជំនួយស្មារតីក្នុងការត្រៀមប្រឡងសញ្ញាបត្រមធ្យមសិក្សាបឋមភូមិ និងទុតិយភូមិ តាមកាលបរិច្ឆេទ ដែលបានគ្រោងទុក។មុខវិជ្ជាឯកទេសបង្រៀនទាំង៦រួមមានៈ គណិតវិទ្យាប្រវត្តិវិទ្យា រូបវិទ្យា គីមីវិទ្យា ជីវវិទ្យា និងភាសារខ្មែរ ។
ក្រសួងនឹងដាក់ឲ្យដំណើរការកម្មវិធីបង្រៀនតាមអេឡិចត្រូនិកនេះ ចាប់ពីថ្ងៃទី ១៣ខែមីនាឆ្នាំ ២០២០នេះតទៅ ដោយសិស្សានុសិស្ស អាចសិក្សាបានតាមរយៈ មធ្យោបាយដូចជា: ១.តាមរយៈបណ្តាញ Youtube ផ្លូវការរបស់ក្រសួង www.yout ube.com/moeys ដែលនឹងមានវីដេអូបង្រៀនទាំងអស់ សម្រាប់សិស្សានុសិស្សអាចសិក្សារបាន ទៅតាមពេលវេលាជាក់ស្ដែងរបស់ខ្លួន , ២.ទំព័រហ្វេសប៊ុកផ្លូវការរបស់ក្រសួង www.facebook.com/moeys.gov.kh ដែលនឹងធ្វើការការផ្សព្វផ្សាយជារៀងរាល់ថ្ងៃ ដោយពេលព្រឹកសម្រាប់ថ្នាក់ទី ៩ និងពេលរសៀលសម្រាប់ថ្នាក់ទី ១២ ,និង៣. មជ្ឈមណ្ឌលសិក្សាអេឡិចត្រូនិករបស់ក្រសួង elearning.moeys.gov.kh ដោយសិស្សានុសិស្សអាចចូលទៅសិក្សាបាន ដោយចូលទៅជ្រើសរើសវគ្គសិក្សា ឬមេរៀនដែលត្រូវសិក្សាដោយឥតគិតថ្លៃ និងមិនចាំបាច់ចុះឈ្មោះ(ចូលជាភ្ញៀវ) ។
ដូច្នេះ សូមលោកគ្រូ អ្នកគ្រូ មាតាបិតា និងអាណាព្យាបាលសិស្ស ចូលរួមជំរុញលើកទឹកចិត្តប្អូនៗសិស្សានុសិស្សទាំងអស់ ជាពិសេសផ្ដល់លក្ខខណ្ឌអំណោយផល ដើម្បីអាចបន្តសិក្សាតាមប្រព័ន្ធអេឡិចត្រូនិក បានជាប្រចាំ ដោយចូលទៅក្នុងគេហទំព័រ និងបណ្ដាញទំនាក់ទំនងសង្គមដែលបានផ្ដល់ជូនខាងលើ ៕
