ភ្នំពេញ ៖ មន្រ្ដីជាន់ខ្ពស់ធនាគារអភិវឌ្ឍន៍អាស៊ី(ADB) បានគូសបញ្ជាក់ថា ធនាគារអភិវឌ្ឍន៍អាស៊ីនឹងផ្តល់ការគាំទ្រចំពោះវិស័យផលិតកម្មសត្វ និងសុខភាពសត្វដល់កម្ពុជាដែលកម្មវិធីថ្មីនេះគ្រោងនឹងដាក់ឱ្យអនុវត្តន៍ក្នុងឆ្នាំ២០២១ ដើម្បីគ្រប់គ្រង ការពារចលនាសត្វ និងជំងឺឆ្លងពីមនុស្សមកសត្វ និងសត្វមកមនុស្ស រួមជាមួយការបង្កើនផលិតកម្មសត្វក្នុងស្រុក។ នេះគឺជាការលើកឡើងរបស់លោក Jiangfeng Zhang នាយកធនាគារអភិវឌ្ឍន៍អាស៊ី ប្រចាំអាស៊ីអាគ្នេយ៍ទទួលបន្ទុកបរិស្ថាន ធនធានធម្មជាតិ និងកសិកម្ម ក្នុងជំនួបជាមួយឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១២ ខែមីនា ឆ្នាំ២០២០ នៅទីស្ដីការក្រសួងកសិកម្ម ដើម្បីពិនិត្យលទ្ធភាពពង្រីកកិច្ចសហប្រតិបត្តិការលើកម្មវិធីអាទិភាពជាក់ស្ដែងឆ្លើយតបទៅនឹងគោលនយោបាយរបស់ក្រសួងក្នុងវិស័យកសិកម្ម ។
លោក Jiangfeng Zhang នាយកធនាគារអភិវឌ្ឍន៍អាស៊ី ប្រចាំអាស៊ីអាគ្នេយ៍ទទួលបន្ទុកបរិស្ថាន ធនធានធម្មជាតិ និងកសិកម្ម វាយតម្លៃខ្ពស់ចំពោះក្រសួងកសិកម្ម រុក្ខាប្រមាញ់ និងនេសាទដែលតែងតែផ្តល់កិច្ចសហការយ៉ាងល្អប្រសើរជាមួយក្រុមការងារធនាគារអភិវឌ្ឍន៍អាស៊ី រួមគ្នាអនុវត្តន៍កម្មវិធី និងគម្រោងទទួលបានលទ្ធផលជាផ្លែផ្កា ជាប្រយោជន៍ដល់ប្រជាកសិករ និងវិស័យកសិកម្មទាំងមូល។ លោកនាយកបានបន្ដថា ធនាគារអភិវឌ្ឍន៍អាស៊ីបានធ្វើការកែសម្រួល និងរៀបចំផែនការយុទ្ធសាស្ត្រសម្រាប់គាំទ្រដល់កម្ពុជាក្នុងវិស័យកសិកម្ម ២០២១-២០២៣ ដែលផែនការយុទ្ធសាស្ត្រថ្មីនេះផ្តោតភ្ជង់ជាសំខាន់ទៅលើការធ្វើកំណែទម្រង់ តាមរយៈការធ្វើទំនើបកម្មកសិកម្ម យន្តុបនីយកម្មកសិកម្ម ពិពិធកម្មកសិកម្ម ការរៀបចំផែនការកំណត់តំបន់ដាំដុះ ការគ្រប់គ្រងនិងប្រើប្រាស់ថ្នាំកសិកម្ម ការកែច្នៃនិងវេចខ្ចប់ប្រកបដោយគុណភាព និងសុវត្ថិភាព និងការផ្ដល់ប្រាក់កម្ចីជូនសហគមន៍ និងសហគ្រាសខ្នាតតូចនិងមធ្យម ធ្វើយ៉ាងណាបំពេញខ្សែច្រវាក់ផលិតកម្មកសិកម្មឱ្យបានពេញលេញ ដើម្បីបង្កើនតម្លៃបន្ថែមជូនអ្នកផលិត។លោកនាយកក៏បានបន្ថែមថា ក្រុមការងាររបស់ធនាគារអភិវឌ្ឍន៍អាស៊ីបាននិងកំពុងធ្វើការយ៉ាងសកម្មជាមួយរដ្ឋបាលជលផលរៀបចំអនុវត្តន៍កម្មវិធីដើម្បីអភិរក្ស និងអភិវឌ្ឍន៍ធនធានធម្មជាតិនៅតាមតំបន់សមុទ្រ និងឆ្នេរសមុទ្រផងដែរ។ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានថ្លែងអំណរគុណចំពោះធនាគារអភិវឌ្ឍន៍អាស៊ីដែលបានដើរតួនាទីយ៉ាងសំខាន់ក្នុងការផ្តល់ជំនួយហិរញ្ញប្បទាន បច្ចេកទេស ការបណ្តុះបណ្តាលនិងអភិវឌ្ឍន៍ធនធានមន្ត្រីជំនាញនៃក្រសួង និងហេដ្ឋារចនាសម្ព័ន្ធគាំទ្រក្នុងវិស័យកសិកម្ម។ ឯកឧត្តមរដ្ឋមន្ត្រីជឿជាក់ថា ធនាគារអភិវឌ្ឍន៍អាស៊ីនឹងបន្តផ្តល់ការគាំទ្រ ពង្រឹង និងពង្រីកកិច្ចសហប្រតិបត្តិការដល់ក្រសួង ដើម្បីរួមគ្នាអភិវឌ្ឍន៍វិស័យកសិកម្ម ប្រកបដោយចីរភាព ឆ្លើយតបទៅនឹងបរិបទកំណើនសេដ្ឋកិច្ចរបស់កម្ពុជា និងចក្ខុវិស័យវែងឆ្ងាយរបស់រាជរដ្ឋាភិបាលសម្រាប់ឆ្នាំ២០៣០ និង២០៥០ ។
ឯកឧត្តមរដ្ឋមន្ត្រីបានបន្ថែមទៀតថា ចំពោះកម្មវិធីថ្មីៗទាំងអស់នេះ គឺពិតជាមានវិសាលភាពទូលំទូលាយ និងបានគ្របដណ្តប់គ្រប់គោលដៅរបស់ក្រសួង និងពិសេសបានឆ្លើយតបទៅនឹងអនុសាសន៍របស់សម្តេចតេជោនាយករដ្ឋមន្ត្រី ក្នុងការបង្កើនផលិតភាពផលិតកម្មក្នុងស្រុកទាំងផ្នែកដាំដុះ និងផលិតកម្មសត្វ ឈានឆ្ពោះទៅការកាត់បន្ថយការនាំចូល ៕
