ខេត្តព្រះសីហនុ ៖ មន្ទីរអប់រំយុវជន និងកីឡាខេត្តព្រះសីហនុ បានរៀបបចំបិតការប្រកួតកីឡាសិស្ស បឋមសិក្សា និងមធ្យមសិក្សាជ្រើសរើសជើងឯកថ្នាក់ខេត្តប្រចាំឆ្នាំ២០១៩-២០២០ នៅព្រឹក ថ្ងៃសុក្រ ៥រោច ខែផល្គុន ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី១៣ ខែមីនា ឆ្នាំ២០២០ នៅសាលាវិទ្យាល័យឡាយហ្វ ស្ថិតក្នុងសង្កាត់លេខ៣ ក្រុង ខេត្តព្រះសីហនុ ក្រោមអធិបតី ភាពឯកឧត្តម គួច ចំរើន អភិបាល នៃគណៈអភិបាលខេត្តព្រះសីហនុ ដោយមានការចូលរួម ពីអស់លោក លោកស្រីប្រធានមន្ទីរ អង្គភាព កងកម្លាំងប្រដាប់អាវុធក្នុងខេត្តព្រះសីហនុ ។
ឯកឧត្តម គួច ចំរើន អភិបាលខេត្តព្រះសីហនុបានកោតសរសើរ និងវាយតម្លៃចំពោះ ថ្នាក់ដឹកនាំមន្ទីរអប់រំយុវជន និងកីឡាខេត្តព្រះសីហនុ និងប្រតិភូកីឡា ដែលយកអស់កម្លាំង កាយចិត្ត ប្រាជ្ញាស្មារតីបង្កលក្ខណៈគ្រប់បែបយ៉ាងធ្វើឱ្យព្រឹត្តិការណ៍នេះប្រព្រឹត្តទៅយ៉ាងរលូន ប្រកបដោយការទទួលខុសត្រូវខ្ពស់។ ការលេងកីឡាពិតប្រាកដ ជាមានលទ្ធផលចាញ់ និងឈ្នះ ជាធាតុសំខាន់ នៃសេចក្តីថ្លៃថ្នូរ និងស្របតាមគោលការណ៍យុត្តិធម៌ និងមិត្តភាព។ការលេងកីឡាអាចដោះស្រាយបញ្ហាប្រឈមនានា និងបានដំណើរការយ៉ាងសុក្រឹត ទទួលបានលទ្ធផលវិជ្ជមាន ហើយលទ្ធផលដែលយើងទទួលបាននាពេលនេះ ពិតជាស័ក្តិ សមសម្រាប់កីឡាករ កីឡាការិនី ដែលត្រូវបានវិនិច្ឆ័យនូវលក្ខណៈសម្បត្តិ កាយសម្បទា និងលក្ខខណ្ឌដទៃទៀតដោយគណៈកម្មការរៀបចំការប្រកួត ។ កីឡាមិនគ្រាន់តែផ្តល់នូវ កាយសម្បទារឹងមាំដល់យុវជន យុវនារីរបស់យើងប៉ុណ្ណោះទេ ប៉ុន្តែថែមទាំងបានធ្វើការអប់រំ ទៅលើផ្លូវចិត្ត និងសីលធម៌ តែធ្វើយ៉ាងណាឱ្យពួកគេមានការតស៊ូប្រកបដោយភាពអង់ អាចក្លាហាន អំណត់ព្យាយាម និងចេះយោគយល់គ្នា និងប្រកាន់ភ្ជាប់នូវភាពយុត្តិធម៌ សុចរិតភាព ឆ្លើយតបតាមបរិបទ នៃការរីកចម្រើនរបស់សង្គមជាតិ យើងត្រូវបង្កើន សកម្មភាពកីឡាឱ្យបានខ្លាំងក្លាថែមទៀត ក្នុងការបំផុសចលនាអប់រំកាយ ក្នុងស្រទាប់ ប្រជាជន និងយុវ វ័យរបស់យើងនៅតាមសាលារៀន និងតាមសហគមន៍។ឯកឧត្តមអភិបាលខេត្តបញ្ជាក់ថា ការលេងកីឡាចៀសផុតពីការសេពគ្រឿងញៀន បង្កជាក្រុមបងធំ បងតូច ប្រព្រឹត្តអំពើអបាយមុខផ្សេងៗបង្កឱ្យមានអស្ថិរភាពក្នុងសង្គមជាដើម ។ល។ ក្មួយៗត្រូវខិតខំហ្វឹកហាត់បន្តទៀតទាំងផ្នែកបច្ចេកទេស បទបញ្ជា ក្រមសីលធម៌ និង កត្តាផ្សេងទៀត បង្កើនសមត្ថភាព បទពិសោធន៍ថ្មីៗសម្រាប់ចូលរួមការ ប្រកួតកីឡា ថ្នាក់ជាតិ ទទួលចំណាត់ថ្នាក់ជ័យលាភីបន្តទៀត។
លោកស្រី អ៊ុច សោភា ប្រធានមន្ទីរអប់រំយុវជន និងកីឡាខេត្តព្រះសីហនុបានឱ្យ ដឹងថា មន្ទីរអប់រំយុវជន និងកីឡាខេត្តព្រះសីហនុ បានរៀបចំការប្រកួតកីឡាជ្រើស រើសជើង ឯកថ្នាក់ខេត្តប្រចាំឆ្នាំ២០១៩-២០២០ រយៈពេល ៣ថ្ងៃ គឺចាប់ពីថ្ងៃទី១១ ដល់ថ្ងៃទៅ១៣ ខែមីនា ឆ្នាំ២០២០ ហើយឆ្នាំនេះក៏មិនខុសពីឆ្នាំមុនដែរ ដែលមានសិស្សមកពីសាលា បឋម សិក្សា និងមធ្យមសិក្សាមកពីក្រុង ស្រុក ទូទាំងខេត្ត បានចូលរួមប្រកួតលើវិញ្ញាសា ចំនួន០៣ ក្នុងនោះមាន វិញ្ញាសាបាល់ទះ បាល់ទាត់ និងអត្តពលកម្ម ដែលត្រូវបានធ្វើការបិទបញ្ចប់ ទទួលបានជោគជ័យ។
ក្នុងឱកាសនោះ ឯកឧត្តម គួច ចំរើន បានផ្តល់ថវិកាជូនកីឡាករ កីឡាការិនីជ័យលាភី គ្រប់ក្រុមទាំង ០៣វិញ្ញាសាលេខ១ ក្នុងម្នាក់ទទួលបានថវិកា ១០ម៉ឺនរៀល, លេខ២ ក្នុងម្នាក់ ទទួលបានថវិកា ៧ម៉ឺនរៀល និងលេខ៣ ក្នុងម្នាក់ទទួលបានថវិកា ៥ម៉ឺនរៀល ៕
