រាជធានីភ្នំពេញ ៖ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន និង លោកជំទាវ អញ្ជើញជាអធិបតីភាព ក្នុងពិធីសម្ភោធដាក់ឱ្យប្រើប្រាស់ជាផ្លូវការ សមិទ្ធផលនានាដែលមានតម្លៃជិត៤២ម៉ឺនដុល្លា ស្ថិតនៅវត្តមង្គលវ័ន ខណ្ឌ៧មករា រាជធានីភ្នំពេញ ក្នុងការរួមចំណែកកសាង និងលើកកម្ពស់វិស័យព្រះពុទ្ធិសាសនា ឲ្យមានការអភិវឌ្ឍ និងរីកចម្រើន ។
ក្នុងពិធីសម្ពោធឆ្លងអគារកម្ពស់៣ជាន់ ខ្លោងទា្វរ របង និងសមិទ្ធផលនានា នៅក្នុងវត្តមង្គលវ័នស្ថិតនៅខណ្ឌ៧មករា រាជធានីភ្នំពេញ នៅព្រឹកថ្ងៃទី១៤ ខែមីនា ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មានមានប្រសាសន៍ថា ការរីកចំរើននៃវិស័យព្រះពុទ្ធសាសនាតាមរយៈការ កសាងសមិទ្ធផលនានានៅក្នុងទីអារ៉ាមនេះ ដោយសារប្រទេសជាតិមានសុខសន្ដិភាព និងភាពសប្បូរសប្បាយដែលបានធ្វើឲ្យប្រជាពលរដ្ឋមានលទ្ធភាព អាចរកប្រាក់ចំណូល និងមានប្រាក់ឧបត្ថម្ភ សំរាប់កសាងសមិទ្ឋផលនានាទំាងនេះ។ ឯកឧត្តមបានបញ្ជាក់ថា ព្រះពុទ្ធសាសនា មិនត្រឹមតែបានធ្វើឱ្យបងប្អូនប្រជាពលរដ្ឋយើង បានរួមរស់ជាមួយគ្នាដោយសុខសាន្ត ខាងផ្លូវស្មារតីប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់នៅ ក្នុងការពង្រឹងសណ្ដាប់ធ្នាប់ សុខសន្តិភាព ស្ថិរភាពសង្គម ការអភិវឌ្ឍលើគ្រប់វិស័យ និងថែរក្សាការពារអត្តសញ្ញាណជាតិផងដែរ ។
ឥឡូវគេចូលចិត្តមកប្រទេសដែលកាន់ព្រះពុទ្ធសាសនា នៅពេលយើងសមាធិគឺ ស្ងប់ក្នុងចិត្ត ដូច្នេះឥឡូវនេះការរៀនសមាធិនៅប្រទេសកាន់ព្រះពុទ្ធសាសនាគឺកំពុងមានការរីកចម្រើន ហើយសង្ឃឹមថាការជួយរបស់យើងនឹងធ្វើឲ្យរីកចំរើន ឲ្យកាន់តែរុងរឿងបន្ថែមទៀត ។
សម្តេចព្រះមហាអរិយវង្សបណ្ឌិត ឃី សុវណ្ណរតនា អគ្គលេខាធិការរងថេរសភាពុទ្ធសាសនានៃ ព្រះរាជាណាចក្រកម្ពុជា ឧត្តមទីប្រឹក្សាផ្ទាល់សម្តេចព្រះមហាសង្ឃរាជ ទេព វង្ស និងជាព្រះចៅអធិការវត្តមង្គលវ័ន មានសង្ឃដីការថា សមិទ្ឋផលដែលបានធ្វើពិធីសម្ពោធឆ្លងនាពេលនេះបានចំណាយទឹកប្រាក់សរុបជិត៤២ម៉ឺនដុល្លា ក្នុងនោះរួមមាន ដំបូលឧបដ្ឋានសាលា ក្រាលឥដ្ឋការ៉ូឡាក្នុងទីធ្លាវត្ត បន្ទប់អនាម័យ ប្រព័ន្ឋលូ អាងចាក់សំរាម រៀបចំប្រព័ន្ឋភ្លើង បំពាក់កង្ហារក្នុងឧបដ្ឋានសាលា បោះបង្គោលរបងមុខវត្ត និងដាំដើមឈើ២០០ដើមផងដែរ ៕
