ខេត្តព្រៃវែង ៖ នៅព្រឹកថ្ងៃទី១៤ ខែមីនា ឆ្នាំ២០២០ ឯកឧត្ដម ជា សុមេធី អភិបាលខេត្តព្រៃវែង តំណាងសម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតី ក្នុងពិធីបុណ្យឆ្លងសមិទ្ធផលនានា នៅក្នុងវត្ត ពោធិសិរី ស្ថិតនៅក្នុងឃុំដំរីពួន ស្រុកស្វាយអន្ទរ ខេត្តព្រៃវែង ។
សមិទ្ធផលដែលត្រូវដាក់សម្ពោធឆ្លងនាពេលនេះ ឧបដ្ឋានសាលា ៣ខ្នង សង់ពីបេតុងប្រក់ក្បឿងទំហំ៣២ម៉ែត្រ ទទឹង២១ម៉ែត្រ របងវត្តប្រវែង៣៦៥ម៉ែត្រ កម្ពស់១,៧ម៉ែត្រ ស្រះទឹកទំហំ២០ម៉ែត្រx៣០ម៉ែត្រ ជម្រៅ ៥ម៉ែត្រ ចាក់ដីបំពេញទីធ្លាវត្ត វច្ចកុដិ១ខ្នង៥បន្ទប់ ចំណាយថវិកាសាងសង់អស់ចំនួន២៩៦.៨៧៦ ដុល្លារ (ពីរយកៅសិបប្រាំមួយពាន់ ប្រាំបីរយចិតសិបប្រាំមួយដុល្លា) នៅជំពាក់ជាងចំនួន ៣៧.៧៨៨ ដុល្លា(បីម៉ឺនប្រាំពីពាន់ ប្រាំពីរយប៉ែតសិបប្រាំបីដុល្លា)។ឯកឧត្ដម ជា សុមេធី អភិបាលខេត្ត បានលើកឡើងថា៖ មានតែម្លប់សុខសន្តិភាព ទើបធ្វើឲ្យប្រទេសជាតិមានការរីកចម្រើន មានការអភិវឌ្ឍន៍ លើគ្រប់វិស័យទាំងពុទ្ធចក្រ និងអនាចក្រ ។ ឯកឧត្តមក៏សូមកោតសរសើរចំពោះ ព្រះតេជគុណ ព្រះថេរានុថេរៈគ្រប់ព្រះអង្គ និង សប្បុរសជនជិតឆ្ងាយ បងប្អូនប្រជាពលរដ្ឋទាំងអស់ដែលបានចូលរួមចំណែក និងផ្ដល់វិភាគទានសម្រាប់កសាងសមិទ្ធផលឧបដ្ឋានសាលា របង ជីកស្រះទឹក ចាក់ដីបំពេញទីធ្លាវត្តនេះ រហូតសម្រេចរួចរាល់ជាស្ថាពរដែលយើងទាំងអស់គ្នាឃើញប្រាកដនាពេលនេះ ដើម្បីទុកជាប្រយោជន៍សម្រាប់ពុទ្ធសាសនិក តាមនិយមព្រះពុទ្ធសាសនារបស់បងប្អូនប្រជាពលរដ្ឋយើងទាំងពេលបច្ចុប្បន្ន និងពេលអនាគត ។
ឯកឧត្ដម បានបន្តថា ភាពរីកចំរើនទាំងអស់នេះគឺឆ្លុះបញ្ចាំងនូវការយកចិត្តដាក់របស់រាជរដ្ឋាភិបាលចំពោះ សិទ្ធិសេរីភាពខាងជំនឿសាសនា និងការគោរពសិទ្ធិមនុស្ស និង លទ្ធិប្រជាធិបតេយ្យក្នុងពេលដែលប្រទេសកម្ពុជាយើងមានសន្តិភាពពេញលេញ មានស្ថេរភាពល្អ និងមានការរីកចម្រើនលើគ្រប់វិស័យដូចសព្វថ្ងៃ ។
ឯកឧត្ដមអភិបាលខេត្តបានបន្តទៀតថា៖ ទន្ទឹមនឹងនេះដោយពិនិត្យឃើញសេចក្តីត្រូវការបន្ទាន់របស់បងប្អូនប្រជាពលរដ្ឋ រដ្ឋាភិបាល បាននឹង ខិតខំ អភិវឌ្ឍហេដ្ឋារចនាសម្ព័ន្ធ រូបវ័ន្តនានារួមមាន ផ្លូវ ថ្នល់ សាលារៀន មន្ទីរពេទ្យ ប្រព័ន្ធធារាសាស្ត្រជាដើម សម្រាលជាប្រយោជន៍ក្នុងការលើកកំពស់ជីវភាព រស់នៅប្រចាំថ្ងៃរបស់ប្រជាពលរដ្ឋ ឱ្យកាន់តែមានភាពប្រសើឡើង។
ឯកឧត្តម សំណូមពរដល់វត្តអារាមទាំងអស់ព្រះសង្ឃគ្រប់ព្រះអង្គជួយផ្សព្វផ្សាយអំពីបញ្ហាគ្រឿងញៀន គ្រោះថ្នាក់ចរាចរណ៍ ជំងឺឆ្លងនានា និងការបង្ការគ្រោះមហន្តរាយផ្សេងៗ ដល់ប្រជាពលរដ្ឋឲ្យបានយល់ដឹង និងមានការប្រុងប្រយ័ត្នខ្ពស់ ។
ក្នុងនោះឯកឧត្តមអភិបាលខេត្ត បើបំពាក់មេដៃជូនដល់សប្បុរសជនដែលមានស្នាដៃក្នុងការកសាងវត្ត និងបានប្រគេនបច្ច័យសម្រាប់កសាងវត្តចំនួន ២២ លានរៀល លោកគ្រូពេទ្យចំនួន ១០នាក់ ក្នុងម្នាក់ៗ ១ម៉ឺនរៀល លោកគ្រូអ្នកគ្រូចំនួន ២៥ នាក់ ក្នុងម្នាក់ៗ ១ម៉ឺនរៀល យុវជនកាកបាទក្រហម ៥០នាក់ យុវជនសសយក ៥០ នាក់ យុវជនកាយារឹទ្ធចំនួន ៥០ នាក់ ម្នាក់ៗទទួលបាន ១ម៉ឺនរៀល សិស្សានុសិស្សចំនួន៣០១នាក់ ម្នាក់ៗ ទទូលបាន ៥ពាន់រៀល សម្ភារៈសិក្សាមួយកញ្ចប់ យាយជី តាជី ចំនួន៥០នាក់ ក្នុងម្នាក់ៗ ទទួលបានក្រណាត់ស ១ដុំ ថវិកា១ម៉ឺនរៀល ឯកឧត្តមក៏បានអញ្ជើញកាត់ខ្សែបូដាក់ឲ្យប្រើប្រាស់ជាផ្លូវការផងដែរ ៕
