រាជធានីភ្នំពេញ ៖ ឯកឧត្តម នាយឧត្តមសេនីយ៍ កែ គឹមយ៉ាន ឧបនាយករដ្ឋមន្ដ្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានគូសបញ្ជាក់ថា ក្នុងឆ្នាំ២០១៩កន្លងទៅ សមត្ថកិច្ចបង្ក្រាបបទល្មើសគ្រឿងញៀនចំនួន៩,៨០៦ករណី ឃាត់ខ្លួនជនសង្ស័យ ចំនួន ២០,៤៩០នាក់ និងចាប់យកគ្រឿងញៀន ចំនួន ៧៥០គីឡូក្រាម ។ នេះយោងតាមការផ្សាយរបស់ក្រសួងមហាផ្ទៃ ។
ថ្លែងក្នុងពិធីបើកសន្និបាតបូកសរុបលទ្ធផលការងារ ត្រួតពិនិត្យគ្រឿងញៀន ឆ្នាំ២០១៩ និងទិសដៅការងារឆ្នាំ២០២០ និងកិច្ចប្រជុំបូកសរុបលទ្ធផល នៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី៤ កាលពីព្រឹកថ្ងៃទី១៦ ខែមីនា ឆ្នាំ២០២០ នៅទីស្ដីការក្រសួងមហាផ្ទៃ ឯកឧត្តម ឧបនាយករដ្ឋមន្រ្ដី កែ គឹមយ៉ាន បានលើកឡើងថា ក្នុងឆ្នាំ២០១៩ កន្លងមកនេះ សមត្ថកិច្ចអនុវត្តន៍ច្បាប់បង្ក្រាបបទល្មើសគ្រឿងញៀន បានចំនួន៩.៨០៦ករណី គឺកើនឡើងប្រមាណ ២២,៥៤ភាគរយ ឃាត់ខ្លួនជនសង្ស័យបានចំនួន ២០,៤៩០នាក់ កើនឡើងប្រមាណ២៤,៥៤ភាគរយ ចាប់យកគ្រឿងញៀនគ្រប់ប្រភេទបានចំនួន ៧៥០គីឡូក្រាម កើនឡើងប្រមាណ៣៩,៩៦ភាគរយ ។ ឯកឧត្តម ឧបនាយករដ្ឋមន្រ្ដីបានបន្ដថា សមត្ថកិច្ចក៏បានបង្កកនិង រឹបអូសនូវអចលនៈ និងចលនវត្ថុជាសម្ភារ និងថវិកាពាក់ព័ន្ធមួយចំនួនទៀត ក្នុងនោះ បង្ក្រាបបានករណីធំៗចំនួន៦១ករណី ដែលមានជនសង្ស័យចំនួន១៤០នាក់ ជនបរទេស៥៤នាក់ មេក្លោងចំនួន២៧នាក់ និងបក្សពួកពាកព័ន្ធ១១៣នាក់ ។ ឯកឧត្តមឧបនាយករដ្ឋមន្រ្ដីបានបន្ថែមទៀតថា តាមរយៈប្រតិបត្តិការដ៏ម៉ឹងម៉ាត់របស់សមត្ថកិច្ចគ្រប់លំដាប់ថ្នាក់ ក៏បានទប់ស្កាត់ និងលុបបំបាត់ការជួញដូរ និងប្រើប្រាស់គ្រឿងញៀននៅតាមក្លឹបកម្សាន្ដ និងទីតាំងសប្បាយដ្ឋាននានា ទូទាំងប្រទេស កាលពីចុងឆ្នាំ២០១៩ កន្លងទៅនេះ ។ បើយោងតាមរបាយការណ៍របស់ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ អាជ្ញាធរជាតិប្រយុទ្ធប្រឆាំងគ្រៀងញៀន បានឱ្យដឹងថា ក្រុមឧក្រិដ្ឋជននៅតែប្រើប្រាស់កម្ពុជា ធ្វើជាទីកន្លែងឆ្លងកាត់គ្រឿងញៀន ពិសេសបណ្ដាខេត្តជាប់ព្រំដែនជាមួយប្រទេសជិតខាង ហើយបច្ចុប្បន្នចរន្ដហូរចូលគ្រឿងញៀនមកកម្ពុជា ក្រៅពីទិសនៅភាគឦសាន ក៏មានការហូរចូលតាមព្រំដែនកម្ពុជា-ថៃ និងមានការលួចនាំចេញតាមច្រកព្រំដែន កម្ពុជា-វៀតណាម ជាករណីបទល្មើ សគ្រឿងញៀនធំៗផងដែរ ៕
