ខេត្តតាកែវ ៖ ថ្លែងនៅក្នុងកិច្ចប្រជុំសាមញ្ញលើកទី១១ អាណត្តិទី៣ របស់ក្រុមប្រឹក្សាខេត្តតាកែវ នាព្រឹកថ្ងៃអង្គារិ៍ ទី០៥ ខែឧសភា ឆ្នាំ២០២០ សមាជិកក្រុមប្រឹក្សាខេត្តតាកែវ បានធ្វើការជម្រុញដល់អាជ្ញាធខេត្តតាកែវ ឲ្យបន្តសកម្មភាពឲ្យបានខ្លាំងក្លាថែមទៀត ក្នុងការចុះផ្សព្វផ្សាយ អំពីវិធានការណ៍អប់រំ និងណែនាំដល់ពលរដ្ឋនៅតាមមូលដ្ឋានឲ្យមានការយល់ដឹង និងចេះការពារខ្លួន ពិសេសឲ្យទម្លាប់មានអនាម័យ ដើម្បីចូលរួមចំណែកប្រឆាំងនឹងជម្ងឺកូវីត១៩កុំឲ្យមានការរីករាលដាលនៅក្នុងសហគមន៍របស់ពួកគេ បើទោះបីជាស្ថានភាពកូវីត១៩ក្នុងប្រទេសយើងមានការធូរស្រាលក៏ពិតមែន ។
ថ្លែងនៅចំពោះមុខគណៈអភិបាលខេត្តនិងប្រធានមន្ទីរ អង្គភាព នានារបស់រដ្ឋបាលខេត្តតាកែវ លោកជំទាវ លឹម ប៊ុនលី សមាជិកក្រុមប្រឹក្សាខេត្ត បានថ្លែងថា ថ្វីត្បិតតែស្ថានភាពនៅក្នុងប្រទេសកម្ពុជារបស់យើង មានលក្ខណៈធូរស្រាល ក៏ពិតមែន តែក្នុងនាមអាជ្ញាធរត្រូវបន្តអប់រំផ្សព្វផ្សាយដល់ពលរដ្ឋឲ្យបានជាប់ប្រចាំ ដើម្បីឲ្យពួកគាត់នៅតែបន្តទម្លាប់មាន អនាម័យ និងចេះការពារខ្លួនឯង រក្សាគន្លាតសុវត្ថិភាព ពិសេសត្រូវពាក់ម៉ាស់ និងមានអាគុលឬជែលជាប់ខ្លួនជានិច្ច ព្រោះ ដូចដែលក្រសួងសុខាភិបាលបានបញ្ជាក់ហើយថា សូមបងប្អូនប្រជាពលរដ្ឋ កុំធ្វេសប្រហែសឲ្យសោះ និងត្រូវការពារខ្លួនឯងជានិច្ច ព្រោះកូវីត១៩វានៅតែអាចចម្លងយើងបាន ប្រសិនបើយើងមិនបានប្រុងប្រយ័ត្នឬការពារខ្លួន ។
លោកជំទាវ លឹម ប៊ុនលី បន្ថែមទៀតថា បញ្ហាចុះអប់រំផ្សពផ្សាយ សូមឲ្យអាជ្ញាធរខេត្ត អាជ្ញាធរក្រុងស្រុកទាំង១០នៅក្នុងខេត្តតាកែវ បន្តចុះផ្សព្វផ្សាយ និងក្រើនរំលឹក ដាស់តឿនឲ្យជាប់ជាប្រចាំពិសេសសហការជាមួយមន្ទីរសុខាភិបាលខេត្ត សូមបន្តការខិតខំនឹងអប់រំផ្សព្វផ្សាយទៅដល់បងប្អូនប្រជាពលរដ្ឋនៅក្នុងសហគមន៍ និងនៅតាមតំបន់ដាច់ស្រយោល ដើម្បីជាមូលដ្ឋានក្នុងឲ្យពួកគាត់បានយល់ដឹងអំពីវិធានការណ៍របស់ក្រសួងសុខាភិបាល ក៏ដូចជាផ្លាស់ប្តូរទម្លាប់មានអនាម័យជាប់ជាប្រចាំ ពិសេសត្រូវណែនាំពួកគាត់កុំឲ្យដើរចេញមកក្រៅ ប្រសិនបើមិនចាំបាច់ ព្រោះការចូលរួមអនុវត្តរបស់យើងម្នាក់ៗ វានឹងជួយកាត់បន្ថយក្នុងកម្រិតខ្ពស់ក្នុងការឆ្លងរីករាលដាលជម្ងឺ កូវីត១៩នេះ ។
ឆ្លើយតបទៅនិងការលើកឡើងរបស់សមាជិកក្រុមប្រឹក្សាខេត្ត ឯកឧត្តម អ៊ូច ភា អភិបាលខេត្តតាកែវបានថ្លែងថា បន្ទាប់ពីជំងឺកូវីដ១៩បានផ្ទុះឡើងនៅក្នុងប្រទេសកម្ពុជា ហើយស្របពេលដែលពលករខ្មែរនៅក្រៅប្រទេសបានវិលត្រលប់ចូលមកប្រទេសកម្ពុជាយើងវិញ អាជ្ញាធរខេត្តរួមនឹងអាជ្ញាធក្រុងស្រុកនិងមន្ទីរពាក់ព័ន្ធបានចាប់ផ្ដើមធ្វើសកម្មភាពចុះដល់លំនៅដ្ឋានបងប្អូនពលករ ដោយបានធ្វើការ អប់រំផ្សព្វផ្សាយដល់បងប្អូនពលករអំពីវិធានការ ការពារ ទប់ស្កាត់ និងបង្ការការចម្លងជំងឺកូវីដ១៩ តាមរយៈការផ្សព្វផ្សាយសារអប់រំរបស់ក្រសួងសុខាភិបាល និងបិទប៉ុស្ទ័រពីវិធី ការពារ របៀបអនាម័យខ្លួនប្រាណ ដើម្បីកាត់បន្ថយហានិភ័យពីការឆ្លងរីករាលដាលនូវជំងឺកូវិដ១៩ តាមទីសាធារណៈ និងបង្រៀនរបៀបលាងដៃអោយត្រឹមត្រូវ នៅតាមខ្នងផ្ទះរបស់បងប្អូនប្រជាពលរដ្ឋយើងផងដែរផងដែរ ។
ឯកឧត្តមអភិបាលខេត្តតាកែវបានថ្លែងបន្តថា ក្រៅពីចុះផ្សពផ្សាយអប់រំ មន្រ្តីរបស់យើងក៍បានចុះធ្វើការបាញ់ថ្នាំសម្លាប់មេរោគនៅតាមផ្សារ នឹងនៅតាមទីសាធារណៈមួយចំនួនផងដែរ ជាពិសេសយើងបានចុះធ្វើការអប់រំ ណែនាំដល់ម្ចាស់គ្លីនិកឯកជន ឱសថស្ថានទាំងអស់មិនត្រូវលក់តម្លើងតម្លៃ ម៉ាស់ឬអាកុលនោះទេ ព្រមទាំងបានចុះត្រួតពិនិត្យការលួចលក់ឧបករណ៍តេស្ត៍កូវីដ១៩ និងបានណែនាំដល់គ្លីនិកឯកជនទាំងអស់មិនអោយទទួលការពិនឹត្យ ព្យាបាលជំងឺកូវីដ១៩នោះទេ ៕
