ខេត្តត្បូងឃ្មុំ ៖ ប្រភពពីមន្ត្រីនៅក្នុងមន្ទីរសាធារណការខេត្តត្បូងឃ្មុំ បានឲ្យដឹងថា លោក គង់ សុភាព ទទួលបានតំណែងជា ប្រធានសាខាស្ថានីយ៍ជញ្ជីងថ្លឹងរថយន្តថ្នល់ទទឹង មិនទាន់បានប៉ុន្មានថ្ងៃផង ស្រាប់តែប្រើតួនាទី និងអំណាចរបស់ខ្លួន ប្រព្រឹត្តអំពើពុករលួយយ៉ាងគឃ្លើន គ្មានញញើតអ្វីទាំងអស់។ ចំណែកលោក គី ដាណារិទ្ធ ប្រធានមន្ទីរសាធារណការខេត្តត្បូងឃ្មុំ កំពុងបណ្តោយឲ្យលោក គង់ សុភាព ប្រធានស្ថានីយ៍ជញ្ជីងថ្លឹងរថយន្តថ្នល់ទទឹង ប្រព្រឹត្តអំពើពុករលួយយ៉ាងរាលដាល ហើយរង់ចាំទទួលផលប្រយោជន៍សុខស្រួល។ ប្រសិនបើគ្មានការឃុបឃិតបើកដៃពីសំណា ក់លោក គី ដាណារិទ្ធ ប្រធានមន្ទីរសាធារណការខេត្តត្បូងឃ្មុំទេនោះ គឺលោក គង់ សុភាព ប្រធានស្ថានីយ៍ជញ្ជីងថ្លឹងរថយន្តថ្នល់ទទឹង មិនហ៊ានប្រព្រឹត្តអំពើពុករលួយយ៉ាងរាលដាលឡើយ។
ប្រភពពីក្រុមអាជីវករម្ចាស់រថយន្តដឹកដំឡូងមី និងកសិផលផ្សេងៗឆ្លងកាត់ស្ថានីយ៍ជញ្ជីងថ្លឹងរថយន្តថ្នល់ទទឹងផ្លូវជាតិលេខ៧ ស្រុកត្បូងឃ្មុំបានបញ្ជាក់ថា ទោះបីពួកគាត់ផ្ទុកលើសទម្ងន់ឬ មិនលើសទម្ងន់យ៉ាងណាក៏ដោយ ក៏លោក គង់ សុភាព តម្រូវឲ្យបង់លុយតាមការកំណត់របស់ខ្លួនដែរ។ ក្រុមអាជីវករនិងក្រុមឈ្មួញ ដឹកជញ្ជូនកសិផល ដឹកជញ្ជូនទំនិញឆ្លងកាត់ស្ថានីយ៍ ជញ្ជីងថ្លឹងរថយន្តថ្នល់ទទឹងផ្លូវជាតិលេខ៧ស្រុកត្បូងឃ្មុំ ខេត្តត្បូងឃ្មុំ បានអំពាវនាវឲ្យ លោក សេង ឈួន ដែលជាមេជញ្ជីងថ្លឹងរថយន្តទូទាំងប្រទេស ចាត់វិធានការទប់ស្កាត់អំពើពុករលួយរបស់ លោក គង់ សុភាព ប្រធានស្ថានីយ៍ជញ្ជីងថ្លឹងរថយន្តថ្នល់ទទឹងជាបន្ទាន់។
ដូច្នេះលោក សេង ឈួន មេជញ្ជីងថ្លឹងរថយន្តទូទាំងប្រទេស និងលោក ស៊ុន ចាន់ថុល រដ្ឋមន្ត្រីក្រសួងសាធារណការ មិនគួរបណ្តោយឲ្យលោក គង់ សុភាព ប្រធានស្ថានីយ៍ជញ្ជីងថ្លឹងរថយន្តថ្នល់ទទឹង ធ្វើអ្វីៗតាមអំពើចិត្តរបស់ខ្លួនតទៅទៀតនោះទេ។ ទន្ទឹមនឹងនេះលោក ឱម យ៉ិន ទៀង ប្រធានអង្គភាពប្រឆាំងអំពើពុករលួយ ដែលធ្លាប់ប្តេជ្ញាលុបបំបាត់អំពើពុករលួយតាមដងផ្លូវប្រកបដោយប្រសិទ្ធភាព មិនគួរមើលរំលងអំពើពុករលួយពេញបន្ទុករបស់លោក គង់ សុភាព ប្រធានស្ថានីយ៍ជញ្ជីងថ្លឹងរថយន្តថ្នល់ទទឹងឡើយ៕
