ខេត្តកំពង់ធំ ៖ ប្រភពពីប្រជាពលរដ្ឋរស់នៅក្នុងក្រុងស្ទឹងសែន និងស្រុកស្ទោង ខេត្តកំពង់ធំ បានឲ្យដឹងថា ឈ្មួញឈ្មោះ សែ សុខហេង ដែលមានខ្នងបង្អែករឹងមាំកំពុងធ្វើសកម្មភាពទន្ទ្រានកាន់កាប់ដីព្រៃលិចទឹករាប់ពាន់ហិកតា ដោយគ្មានញញើតអ្វីទាំងអស់។ ចំណែកលោក សុខ លូ អភិបាលខេត្តកំពង់ធំ ក៏ដូចជាលោក ប៉ែន វណ្ណរិទ្ធ ប្រធានមន្ទីរកសិកម្មខេត្តកំពង់ធំ និងមេរដ្ឋបាលជលខេត្តកំពង់ធំ សម្ងំស្ងៀមបណ្តោយឲ្យឈ្មួញឈ្មោះ សែ សុខហេង និងបក្ខពួកធ្វើអ្វីៗតាមអំពើចិត្ត ។
ប្រជាពលរដ្ឋបានបន្តថា ឈ្មួញឈ្មោះ សែ សុខហេង អាយុ៥១ឆ្នាំ រស់នៅក្នុងសង្កាត់ស្រយ៉ូវ ក្រុងស្ទឹងសែន ខេត្តកំពង់ធំ និងបក្ខពួកបានប្រមូលគ្នីគ្នាយកគ្រឿងចក្រជាច្រើនគ្រឿងទៅឈូសឆាយដីព្រៃលិចទឹកចំណុចទួលគោកព្រះ ក្រុងស្ទឹងសែន យ៉ាងគឃ្លើនគ្មានញញើតអ្វីឡើយ។ ប្រជាពលរដ្ឋបានលើកឡើងថា ទាំងអភិបាលក្រុងស្ទឹងសែន និងលោក សុខ លូ អភិបាលខេត្តកំពង់ធំ ព្រមទាំងប្រធានមន្ទីរពាក់ព័ន្ធមិនចាត់វិធានការទប់ស្កាត់សកម្មភាពរបស់ឈ្មួញឈ្មោះ សែ សុខហេង និងបក្ខពួកនោះទេ។ ប្រភពខ្លះបានឲ្យដឹងថា មានមន្ត្រីធំៗមួយចំនួននៅពីក្រោយខ្នងឈ្មួញឈ្មោះ សែ សុខហេង ទើបបុគ្គលម្នាក់នេះនិងបក្ខពួកហ៊ានធ្វើអ្វីៗតាមអំពើចិត្ត។ ដីព្រៃលិចទឹកដែលឈ្មួញឈ្មោះ សែ សុខហេង និងបក្ខពួកប្រើគ្រឿងចក្រឈូសឆាយទន្ទ្រានកាន់កាប់រាប់ពាន់ហិកតា ក្នុងស្រុកស្ទោង និងក្រុងស្ទឹងសែន គឺជាដីព្រៃលិចទឹកក្នុងតំបន់ដីដែលជាតំបន់ហាមឃាត់។
បញ្ហានេះ គឺជារឿងដែលថ្នាក់ដឹកនាំក្រសួងពាក់ព័ន្ធមិនគួរបណ្តែតបណ្តោយតទៅទៀតទេ ព្រោះលោក សុខ លូ អភិបាលខេត្តកំពង់ធំ និងលោក ប៉ែន វណ្ណរិទ្ធ ប្រធានមន្ទីរកសិកម្មខេត្តកំពង់ធំ បណ្តោយឲ្យឈ្មួញឈ្មោះ សែ សុខហេង ធ្វើអ្វីៗតាមអំពើចិត្ត។ ផ្ទុយទៅវិញប្រសិនបើប្រជាពលរដ្ឋទន្ទ្រានកាន់កាប់ដីព្រៃលិចទឹកបន្តិចបន្តួចដើម្បីធ្វើស្រែចម្ការ គឺមន្ត្រីអាជ្ញាធរថ្នាក់ឃុំ ថ្នាក់ស្រុក និងសមត្ថកិច្ចពាក់ព័ន្ធចាត់វិធានការបង្ក្រាបយ៉ាងកំរោលជាមិនខាន។
ហេតុដូច្នេះហើយ ទើបប្រជាពលរដ្ឋបានអំពាវនាវដល់ថ្នាក់ដឹកនាំពាក់ព័ន្ធទាំងអស់ មេត្តាចាត់វិធានការ និងដោះស្រាយនូវបញ្ហាខាងលើនេះផង ៕
