ខេត្តព្រះវិហារ ៖ ប្រភពពីប្រជាពលរដ្ឋនៅឃុំមរកត ស្រុកជាំក្សាន្ត ខេត្តព្រះវិហារ បានឲ្យដឹងថា ព្រៃព្រះរកា ក្នុងមូលដ្ឋានពួកគាត់កំពុងប្រឈមនឹងការបំផ្លាញយ៉ាងមហន្តរាយ ព្រោះមន្ត្រីបរិស្ថាន និងសមត្ថកិច្ចពាក់ព័ន្ធមិនចាត់វិធានការបង្ក្រាបក្រុមឈ្មួញកាប់ឈើអារច្រៀកឈើ ដឹកជញ្ជូនចេញពីព្រៃយ៉ាងពេញបន្ទុកនោះទេ។ ផ្ទុយទៅវិញ មន្ត្រីបរិស្ថានធ្វើការរារាំងមិនឲ្យប្រជាសហគមន៍ការពារព្រៃឈើ ក៏ដូចជាមន្ត្រីអង្គការក្រៅរដ្ឋាភិបាលនិងសកម្មជនព្រៃឈើចុះល្បាតការពារព្រៃឈើ ដែលកំពុងតែប្រឈមនឹងការបំផ្លាញយ៉ាងមហន្តរាយនោះទេ។ ជាក់ស្តែងលោក ប្រាក់ សុវណ្ណ អភិបាលខេត្តព្រះវិហារ និងលោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារ បានរក្សាភាពស្ងៀមស្ងាត់ក្នុងខណៈដែលព្រៃព្រះរកាក្នុងស្រុកជាំក្សាន្ត ក៏ដូចជានៅស្រុកឆែប និងស្រុកត្បែងមានជ័យកំពុងប្រឈមនឹងសេចក្តីវិនាសសាបសូន្យ។
សេចក្តីរាយការណ៍ពីជនជាតិដើមភាគតិចកួយ រាប់ពាន់គ្រួសារនៅជុំវិញព្រៃព្រៃរកា ក្នុងឃុំមរកត ស្រុកជាំក្សាន្ត បានឲ្យដឹងថា ដើមឈើធំៗក្នុងព្រៃព្រះរកា ជាពិសេសដើមច្បោះជ័រ ដែលជាមុខរបរប្រពៃណីរបស់ជនជាតិដើមភាគតិចកំពុងរងការបង្ក្រាបយ៉ាងគំហុក។ មន្ត្រីអង្គការក្រៅរដ្ឋាភិបាលនិងប្រជាសហគមន៍ការពារព្រៃព្រះរកា ក្នុងឃុំមរកត បានឲ្យដឹងថា ថ្មីៗនេះមន្ត្រីឧទ្យានុរក្សរបស់ក្រសួងបរិស្ថាន រារាំងពួកគាត់មិនឲ្យចុះល្បាតការពារព្រៃឈើនោះទេ ដោយតម្រូវឲ្យសុំច្បាប់ពីមន្ទីរបរិស្ថានខេត្តព្រះវិហារ និងពីក្រសួងបរិស្ថានជាមុនសិន។ បញ្ហានេះគឺជារឿងដែលលោក សាយ សំអាល់ រដ្ឋមន្ត្រីក្រសួងបរិស្ថាន គួរពិនិត្យឡើយវិញជាបន្ទាន់ ព្រោះប្រជាសហគមន៍ការពារព្រៃឈើនិងមន្ត្រីអង្គការក្រៅរដ្ឋាភិបាល ដែលតែងល្បាតការពារព្រៃព្រះរកា នាពេលកន្លងមកបែរជាត្រូវមន្ត្រីឧទ្យានុរក្សក្រសួងបរិស្ថាន ធ្វើការរារាំងទៅវិញ។
សកម្មជនព្រៃឈើនិងមន្ត្រីអង្គការក្រៅរដ្ឋាភិបាលបានលើកឡើងថា លោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារ ប្រធានមន្ទីរបរិស្ថានខេត្តព្រះវិហារ និងមន្ត្រីឧទ្យានុរក្សក្រសួងបរិស្ថានប្រចាំតំបន់ព្រៃព្រះរកា កំពុងព្យាយាមបិទបាំងបទល្មើសកាប់ឈើក្នុងព្រៃព្រះរកា ដែលកើតឡើងយ៉ាងរាលដាល។ សកម្មជនព្រៃឈើក្នុងខេត្តព្រះវិហារ បានឲ្យដឹងថា ព្រៃព្រះរកានៅចំណុចជាំផ្អាវ ចំណុចជាំសែ ចំណុចភ្នំរំចេក ចំណុចប្ញស្សីធំ ចំណុចច្រកច្រប់អាហែន និងចំណុចអូរកាច់ក កំពុងរងការបំផ្លាញយ៉ាងមហន្តរាយ។ ដូច្នេះលោក សាយ សំអាល់ រដ្ឋមន្ត្រីក្រសួងបរិស្ថាន មិនគួរជឿតែតាមរបាយការណ៍របស់មន្ត្រីថ្នាក់ក្រោមនោះទេ ព្រោះបច្ចុប្បន្នបទល្មើសកាប់ឈើកំពុងកើតឡើងយ៉ាងពេញបន្ទុកនៅក្នុងព្រៃព្រះរកានៃស្រុកជាំក្សាន្ត ស្រុកឆែប និងស្រុកត្បែងមានជ័យ ហើយលោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារ និងមន្ត្រីក្រោមឱវាទ មិនចាត់វិធានការបង្ក្រាបបទល្មើសឡើយ៕
