ខេត្តព្រះសីហនុ ៖ នាព្រឹកថ្ងៃព្រហស្បតិ៍៨រោច ខែពិសាខ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១៤ ខែឧសភា ឆ្នាំ២០២០ ឯកឧត្តម គួច ចំរើន ប្រធានគណ:កម្មាធិការសាខាកាកបាទក្រហមកម្ពុជា ខេត្តព្រះសីហនុ អញ្ជើញទទួលអំណោយមនុស្សធម៌មានដូចជា ម៉ាស់ ៣៨,០០០ ទឹកអាកុល ២៥០លីត្រ និងថវិកាពីសប្បុរសជនក្នុងឱកាសខួបលើកទី១៥៧ ទិវាកាកបាទក្រហម អឌ្ឍចន្ទក្រហម ៨ឧសភា ឆ្នាំ២០២០ ក្រោមប្រធានបទ ” ខ្ញុំស្រឡាញ់សន្តិភាព និងកាកបាទក្រហមកម្ពុជា “នៅទីស្នាក់ការសាខាកាកបាទក្រហមកម្ពុជា ខេត្តព្រះសីហនុ មានទីតាំងស្ថិតនៅសង្កាត់លេខ៣ ក្រុងព្រះសីហនុ ។
ឯកឧត្តម គួច ចំរើន ប្រធានគណ:កម្មាធិការសាខាកាកបាទក្រហមកម្ពុជា ខេត្តព្រះសីហនុ បានស្វាគមន៍ការចូលរួមវិភាគទានពីសំណាក់សម្ដេច ឯកឧត្ដម លោកជំទាវ អ្នកឧកញ៉ា លោកឧកញ៉ា លោក លោកស្រី ជាសប្បុរសជនទាំងក្នុងវិស័យសាធារណៈ និងវិស័យឯកជន ដែលបានចូលរួមវិភាគទានជាមួយសាខាកាកបាទក្រហមកម្ពុជា ខេត្តព្រះសីហនុនាពេលនេះ ហើយមូលនិធិដែលសាខាទទួលបានពីសប្បុរសជនពីគ្រប់មជ្ឈដ្ឋាន បានជួយឱ្យសាខាមានធនធានអាចធ្វើប្រតិបត្តិការការងារមនុស្សធម៌របស់ខ្លួន ដោយពុំមានការរើសអើងសំដៅរួមចំណែកក្នុងការជួយ សង្គ្រោះជីវិតមនុស្ស ការកសាងភាពធន់ទៅនឹងគ្រោះមហន្តរាយផ្សេងៗ ការកាត់បន្ថយអត្រាឈឺ និងស្លាប់នៃមាតា និងទារក កាត់បន្ថយគ្រោះថ្នាក់ចរាចរណ៍ ការលើកកម្ពស់គោលការណ៍គ្រឹះ នៃតម្លៃមនុស្សធម៌ សេចក្តីថ្លៃថ្នូររបស់មនុស្សជាតិ និងវប្បធម៌អហិង្សានានានៅក្នុងខេត្តព្រះសីហនុ បានទាន់ពេលវេលា ។
ឯកឧត្តម ប្រធានគណ:កម្មាធិការសាខាកាកបាទក្រហមកម្ពុជាខេត្តព្រះសីហនុ សង្ឃឹម និងជឿជាក់ថា សប្បុរសជន និងបន្តចូលរួមវិភាគទាន ដើម្បីជួយទ្រទ្រង់ដល់សាខាកាកបាទក្រហមខេត្តព្រះសីហនុបន្តទៀត ហើយសាខានឹងនៅរង់ចាំទទួល អំណោយមនុស្សធម៌ពីបងប្អូនប្រជាពលរដ្ឋ សប្បុរសធម៌ អាជីវករ ពាណិជ្ជករ គ្រប់ពេលវេលា ៕
