ខេត្តព្រះវិហារ ៖ នៅថ្ងៃទី០៨ ខែមិថុនា ឆ្នាំ២០២០នេះ ឯកឧត្តម សាស្ដ្រាចារ្យ ម៉ម ប៊ុនហេង អញ្ជើញជាអធិបតី ក្នុងពិធីបញ្ចុះបឋមសិលាដើម្បីធ្វើការសាងសង់ អគារមន្ទីរពេទ្យបង្អែកជាំក្សាន្តខេត្តព្រះវិហារ ដែលមានការអញ្ជើញចូលរួមពីសំណាក់ឯកឧត្តម ប្រាក់ សុវណ្ណ អភិបាលនៃគណអភិបាលខេត្ត, ឯកឧត្តម ឡុង សុវណ្ណប្រធានក្រុមប្រឹក្សាខេត្ត ព្រមទាំងឯកឧត្តម លោកជំទាវជាអភិបាលរងខេត្ត មេបញ្ជាការកងកម្លាំងទាំងបី ថ្នាក់ដឹកនាំមន្ទីរអង្គភាពជុំវិញខេត្ត យុវជន ប្រជាពលរដ្ឋ និងមន្ដ្រីរាជការជាច្រើនរូបទៀត។
មន្ទីរពេទ្យបង្អែកជាំក្សាន្ដ បានរៀបចំពិធីបញ្ចុះបឋមសីលាសាងសង់អគារមន្ទីរ ពេទ្យបង្អែកថ្មីមួយទៀត ក្នុងការបំពេញបន្ថែមនូវរចនាសម្ព័ន្ធពិនិត្យ ព្យាបាលជំងឺ ឱ្យកាន់តែមានប្រសិទ្ធភាពខ្ពស់ជាពិសេសនោះគឺជាការឆ្លើយតបដ៏មានសារសំខាន់បំផុត ចំពោះតម្រូវការរបស់អ្នកជំងឺ ហើយសំខាន់ជាងនេះ គឺជាមោទនភាពរបស់ក្រសួងសុខាភិបាល ក៏ដូចជារាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជាប្រមុខដែលតែងតែគិតគូរយកចិត្ត ទុកដាក់ខ្ពស់ ចំពោះសុខមាលភាពរបស់ប្រជាពលរដ្ឋជាអទិភាព។
ថ្លែងក្នុងឱកាសនេះ ឯកឧត្តម ប្រាក់ សុវណ្ណ អភិបាលនៃគណៈអភិបាលខេត្តព្រះវិហារ បានថ្លែងអំណរគុណដល់ថ្នាក់ដឹកនាំ និងមន្ត្រីសុខាភិបាលទាំងអស់ ដែលតែងតែយកចិត្តទុក្ខដាក់លើសុខមាលភាពរបស់ប្រជាជនក្នុងការពិនិត្យព្យាបាលជំងឺ ប្រកបដោយគុណភាព ប្រសិទ្ធភាព និងសមធម៌។ ឯកឧត្តមបន្ដថា អគារមន្ទីរពេទ្យដែលបានសាងសង់ថ្មីបន្ថែមទៀតនេះ ជាសក្ខីភាពបញ្ជាក់យ៉ាងច្បាស់ អំពីការយកចិត្តទុកដាក់ខ្ពស់ជានិច្ច ចំពោះការអភិវឌ្ឍលើវិស័យសុខាភិបាល ដែលជាភារកិច្ចចំពោះមុខដើម្បីជាការឆ្លើយតប ទៅនឹងតម្រូវការនូវរាល់ការផ្ដល់សេវាសុខាភិបាល ជូនប្រជាពលរដ្ឋនាពេលបច្ចុប្បន្ន និងអនាគត។
មានប្រសាសន៍ក្នុងឱកាសនោះ ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានថ្លែងជំរុញដល់មន្ត្រីសុខាភិបាលទាំងអស់ត្រូវខិតខំបន្ថែមទៀត ធ្វើយ៉ាងណាផ្តល់សេវាសុខភាពប្រកបដោយគុណភាព សមធម៌ និងសមភាពជូនប្រជាពលរដ្ឋ ដោយមិនរើសអើង។ លើសពីនេះទៀត ឯកឧត្តមរដ្ឋមន្ត្រីស្នើឲ្យអាជ្ញាធរដែនដីគ្រប់លំដាប់ថ្នាក់ ជួយគាំទ្រសហការឲ្យបានល្អ ធ្វើយ៉ាងណាឲ្យអគារមន្ទីរពេទ្យបង្អែកជាំក្សាន្ត ដែលនឹងសាងសង់ថ្មីនេះដំណើរការទៅដោយរលូន ដើម្បីកាត់បន្ថយអត្រាឈឺ និងស្លាប់របស់មាតា និងទារក ឲ្យស្របតាមផែនកាយុទ្ធសាស្ត្រចតុកោណរបស់រាជរដ្ឋាភិបាល ក្នុងការចូលរួមចំណែកកាត់បន្ថយភាពក្រីក្រ របស់ប្រជាជនយើង និងចូលរួមសម្រេចបាននូវគោលដៅអភិវឌ្ឍប្រកបដោយចីរភាព។
បន្ថែមពីនេះទៀត ឯកឧត្តម សាស្ដ្រាចារ្យ ម៉ម ប៊ុនហេង បានអំពាវនាវដល់ប្រជាពលរដ្ឋទាំងអស់ ជាពិសេសនៅក្នុងស្រុកជាំក្សាន្តមកទទួលយកការថែទាំសុខភាព ពិសេការសម្រាលកូន ការថែទាំ និងព្យាបាល ពីមន្ទីរពេទ្យបង្អែកនេះឲ្យអស់លទ្ធភាព ព្រោះការប្រើប្រាស់សេវាសុខភាពសាធារណៈ គឺការទទួលបាននូវសេវាមួយ ដែលមានបច្ចេកទេសត្រឹមត្រូវ តាមក្បួនវេជ្ជសាស្ត្រ។
សូមបញ្ជាក់ជូនដែរថា អគារមន្ទីរពេទ្យបង្អែកជាំក្សាន្ដ ដែលបានធ្វើពិធីបញ្ចុះបឋមសីលានាពេលនេះ សាងសង់ឡើងដោយប្រើប្រាស់ថវិកាជាតិ តាមរយៈក្រសួងសុខាភិបាល ដែលមានបណ្តោយប្រវែង ៣៧.៥ម៉ែត្រ ទទឹង ១៨ម៉ែត្រ និងមានកម្ពស់២ជាន់៕
