ខេត្តស្ទឹងត្រែង ៖ ថ្ងៃទី១០ ខែមិថុនា ឆ្នាំ២០២០ អាជ្ញាធរតំបន់ថ្មកំបោរ ជាធនធានធម្មជាតិនៅក្នុង ឃុំអូរស្វាយ ស្រុកបិរីអូរស្វាយសែនជ័យ ខេត្តស្ទឹងត្រែង កំពុងស្វែងរកដៃគូ ឯកជនមកអភិវឌ្ឍន៍វិស័យទេសចរណ៍ធម្មជាតិថ្មកំបោរ ឱ្យក្លាយទៅជារមណីយដ្ឋានអេកូទេសចរណ៍ធម្មជាតិ បែបវប្បធ៌មដើម្បីឱ្យភ្ញៀវជាតិ និងអន្តរជាតិមកទស្សនាកម្សាន្ត។
ក្នុងឱកាសចុះពិនិត្យសក្តានុពលទេសចរណ៍នៅតាមតំបន់រ៉ាមសារកាលពីថ្ងៃទី១០ ខែមិថុនា ឆ្នាំ២០២០នេះ លោកសេក ម៉ៅ មេឃុំអូស្វាយបានបញ្ជាក់ថា នេះជាធនធានធម្មជាតិ ដែលប្រទេសកម្ពុជាយើងមាន ហើយបើតាមការនិយាយតៗគ្នាមក តំបន់នេះជាទីតាំងប្រវត្តិសាស្ត្រនៅក្នុងសម័យនគរភ្នំ ក្នុងចន្លោះឆ្នាំ៥៥០នាសតវត្យទី១។
លោកបន្តថា បើតាមចាស់ទុំខ្មែរដើម បាននិយាយតៗគ្នាមកថា ផ្ទាំងថ្មសរសរ នៅតាមជួរមាត់ទន្លេនេះជាលាមកសត្វឥន្ត្រី ជុះមកកើតជាថ្ម និងមានរូបឆ្កែអើត ក្រោលសេះ ហិប ដែលបច្ចុប្បន្នហៅថាកោះហិប ជាសក្តានុពលមួយអាចបង្កើតជា រមណីយដ្ឋានទេសចរណ៍ធម្មជាតិបែបវប្បធម៌បាន។
លោកសៀ លី ប្រជាពលរដ្ឋរស់នៅ លើទឹកដីកោះហិប បានអះអាងថា ធនធានធម្មជាតិនេះមានអាយុកាលយូរលង់មកហើយ ចំណែករូបរាងទៀតសោត ពោរពេញទៅដោយភាពទាក់ទាញធ្វើឱ្យភ្ញៀវទេសចរចង់ឃើញ និងចង់ដឹងពីប្រវត្តិសាស្ត្រខ្មែរយើងពីបុរម្យបុរាណមក។
លោក យេន មី ប្រធានសហគមន៍អេកូទេសចរណ៍បុរីអូរស្វាយ បានទទួលស្គាល់ថា ផ្ទាំងថ្មនៅតាមតំបន់រ៉ាមសារ ជួរមាត់ទន្លេនេះ បើអាជ្ញាធរពាក់ព័ន្ធ បង្កើនបានជារមណីយដ្ឋានទេសចរណ៍ អាចទាញយកប្រាក់ចំណូលបានពីវិស័យទេសចណ៍នេះ ព្រោះភ្ញៀវទេសចរពេញចិត្តមកទស្សនា ។
សូមបញ្ជាក់ថា នេះជាសម្បត្តិធម្មជាតិដ៍មានតម្លៃ នៅលើទឹកដីខេត្តភាគឥសានមួយនេះ ហើយអាជ្ញាធរកំពុងរិះរកយន្តការអភិវឌ្ឍន៍ឱ្យក្លាយទៅជាតំបន់អេកូទេសចរណ៍ធម្មជាតិនៅក្នុងឆ្នាំ២០២០នេះ៕
