ខេត្តកណ្ដាល ៖ ដើម្បីជួយដល់ប្រជាពលរដ្ឋរងគ្រោះ ដោយសារគ្រោះមហន្តរាយផ្សេងៗក្នុងខេត្តកណ្តាលសម្ដេចព្រះមង្គលទេព្វាចារ្យ វង្ស អានេតា សម្ដេចព្រះសង្ឃនាយករង នៃគណៈធម្មយុត្តិកនិកាយ នៃព្រះរាជាណាចក្រកម្ពុជា និងជាព្រះមេគណគណៈធម្មយុត្តិកនិកាយខេត្តកណ្ដាល បាននាំយកនូវអង្ករចំនួន២តោន និងថវិកា៥លានរៀល ដល់សាខាកាកបាទក្រហមកម្ពុជាខេត្តកណ្ដាល ដើម្បីចូលរួមអបអរសាទរខួបទី១៥៧ ទិវាពិភពលោកកាកបាទក្រហម អឌ្ឍចន្ទក្រហម ៨ឧសភា ឆ្នាំ២០២០ នារសៀលថ្ងៃទី០៨ ខែកក្កដា ឆ្នាំ២០២០ ដែលពិធីនេះប្ររព្ធធ្វើនៅវត្តព្រះឥន្ទសាមគ្គីធម៌ ស្ថិតក្នុងស្រុកអង្គស្នួល ខេត្តកណ្ដាល។
ក្នុងឱកាសនោះ សម្ដេចព្រះមង្គលទេព្វាចារ្យ វង្ស អានេតា មានថេរដីកាឱ្យដឹងថា ការនាំយកអំណោយមកផ្ដល់ជូនសាខាកាកបាទក្រហមកម្ពុជាខេត្តកណ្ដាលនៅពេលនេះ គឺដើម្បីជួយទ្រទ្រង់ និងគាំទ្រដល់សាខាកាកបាទក្រហមកម្ពុជា ដែលមានសម្ដេចគតិព្រឹទ្ធបណ្ឌិតជាប្រធាន ក្នុងការងារមនុស្សធម៌ ជួយដល់ជនដែលមានជីវភាពខ្វះខាត ជួបការលំបាក ពិសេសសម្រាប់ជួយទៅដល់ប្រជាពលរដ្ឋ ដែលរងគ្រោះដោយគ្រោះធម្មជាតិផ្សេងៗ។
សម្ដេចព្រះមង្គលទេព្វាចារ្យ បានមានថេរដីកាបន្តថា សាលាគណគណៈធម្មយុត្តកនិកាយខេត្តកណ្ដាល និងតាមបណ្ដាស្រុក តែងតែខិតខំកៀងគររកការចូលរួមពីសប្បុរសជននានាដើម្បីយកអំណោយជាសម្ភារៈ ថវិកាជួយដល់សាខាកាកបាទក្រហមកម្ពុជាជារើយៗ មិនតែប៉ុណ្ណោះថែមទាំងបានជួយដល់ប្រជាពលរដ្ឋ ដែលមានជីវភាពខ្វះខាត ជួបការលំបាកក្នុងបញ្ហាផ្សេងៗដោយផ្ទាល់ផងដែរ។
ថ្លែងក្នុងឱកាសនោះ ឯកឧត្ដម គង់ សោភ័ណ្ឌ អភិបាលរងខេត្ត បានសម្ដែងនូវសេចក្ដីរីករាយ និងថ្លែងអំណរព្រះគុណ ចំពោះទឹកព្រះទ័យទុកដាក់ របស់សម្ដេចព្រះមង្គលទេព្វាចារ្យ វង្ស អានេតា និងសហការីទាំងអស់ ដែលបាននាំនូវអង្ករ និងថវិកា ទាំងអស់នេះ ផ្ដល់ជូនសាខាកាកបាទក្រហមកម្ពុជាខេត្ត។
ឯកឧត្ដមបានបញ្ចាក់ថា សកម្មភាពទាំងអស់នេះ គឺជាវប្បធម៌ នៃការចែករំលែក ដែលបានចូលរួមចំណែកក្នុងវិស័យមនុស្សធម៌យ៉ាងល្អប្រសើរ រវាងពុទ្ធចក្រ និងអាណាចក្រ ក្នុងការជួយដល់ ប្រជាពលរដ្ឋ ដែលកំពុងរងគ្រោះ បានទាន់ពេលវេលា។
ឯកឧត្តមបានសន្យាថានឹងរក្សាទុកដាក់អំណោយនេះឲ្យបានល្អ សម្រាប់យកទៅប្រគល់អោយដល់ដៃជនរងគ្រោះ និងបានធ្វើការអំពាវនាវដល់បងប្អូនសប្បុរជននាៗសូមជួយបន្តឧបត្ថម្ភ ក៏ដូចជាផ្តល់នូវអំណោយផ្សេងបន្ថែមទៀត ដើម្បីជួយដល់ជនរងគ្រោះ ដែលកំពុងរង់ចាំជំនួយពីយើងទាំងអស់គ្នាផងដែរ៕
