ខេត្តសៀមរាប៖ អាជ្ញាធរខេត្តបានរៀបចំផ្សារបន្លែសុវត្ថិភាព( គ្មានជាតិគីមី ) មួយកន្លែងនៅលើសួនច្បារខាងជើងព្រះរាជដំណាក់ ក្នុងក្រុងសៀមរាប ដើម្បីលក់ដូរបន្លែសុវត្ថិភាពជូនប្រជាពលរដ្ឋ និងភ្ញៀវទេសចរយកទៅប្រើប្រាស់ និងធ្វើម្ហូបអាហារដែលបន្លែនេះមិនធ្វើឲ្យប៉ះពាល់ដល់សុខភាពរបស់មនុស្សឡើយ ។ ដោយមានការផ្តួចផ្តើមពីអាជ្ញាធរខេត្ត , មន្ទីរពាណិជ្ជកម្មខេត្ត , មន្ទីរកសិកម្ម រុក្ខាប្រមាញ់ និងនេសាទខេត្ត និងក្រសួងកសិកម្ម រុក្ខាប្រមាញ់ និងនេសាទ កិច្ចដំណើរការលក់ដូររបស់ផ្សារនេះកំពុងទទួលបានការចាប់អារម្មណ៍ពីសំណាក់ប្រជាពលរដ្ឋពីគ្រប់ទិសទីក្នុងក្រុងសៀមរាប ដោយសារបងប្អូនប្រជាពលរដ្ឋជាច្រើនមានកាយល់ដឹងពីគុណប្រយោជន៍របស់បន្លែសុវត្ថិភាពនេះហើយនាំគ្នាមកទិញយ៉ាងសស្រាក់សស្រាំ និងមានការកើនឡើងជាលំដាប់។
លោក ភឿន គឹម លី ប្រធានមន្ទីរពាណិជ្ជកម្មខេត្តសៀមរាប នៅថ្ងៃទី១៨ ខែកក្កដា ឆ្នាំ២០២០នេះ បានឲ្យដឹងថា គោលបំណង នៃការរៀបចំជាផ្សារបន្លែសុវត្ថិភាព ឬបន្លែធម្មជាតិនេះឡើង គឺជាការប្រមូលផ្តុំអាជីវករដែលលក់ដូរបន្ថែនេះ មកលក់ដូរសម្រាប់ឲ្យបងប្អូនប្រជាពលរដ្ឋមានភាពងាយស្រួលក្នុងការទិញយកទៅប្រើប្រាស់ និងធ្វើម្ហូបអាហារ ដើម្បីការពារសុខភាព និងសុវត្ថិភាពម្ហូបអាហារ ។ ផ្សារបន្លែសុវត្ថិភាព បានធ្វើឲ្យភាពល្អប្រសើរ និងជំរុញដល់សហគមន៍ប្រជាពលរដ្ឋទទទួលបានជីវភាពរីកលូតលាស់យ៉ាងខ្លាំង នៅតាមស្រុកមួយចំនួនក្នុងខេត្តសៀមរាប រួមមាន ៖ ស្រុកស្វាយលើ, ស្រុកបន្ទាយស្រី, ស្រុកសូទ្រនិគម, ស្រុកប្រាសាទបាគង, ក្រុងសៀមរាប និងស្រុកពួក ដែលមានបន្លែធម្មជាតិជាច្រើនប្រភេទមកកាន់ទីផ្សារនេះយ៉ាងសម្បូរបែបថែមទៀត។
លោក ភឿន គឹម លី បានបញ្ជាក់ទៀតថា នៅពេលនេះ យើងបានរៀបចំជាស្តង់លក់ដូរមានចំនួន ១១ស្តង់ ប៉ុន្តែខែក្រោយនេះ យើងនឹងន្ថែមចំនួន ៥ ស្តង់ទៀតសម្រាប់ការដាក់លក់បន្លែទាំងនោះហើយ រហូតដល់ឆ្នាំក្រោយអាជ្ញាធរពាក់ព័ន្ធ គ្រោងនឹងបង្កើតស្តង់សម្រាប់បងប្អូនសហគមន៍លក់នៅពេលល្ងាចៗ ដូចជាលក់ផ្លែឈើគ្រប់ប្រភេទជាដើម បន្ទាប់ពីជម្ងឹកូវីដ-១៩ បានស្ងប់ស្ងាត់ ប៉ុន្តែឥឡូវយើងលក់បន្លែសុវត្ថិភាពបានតែពេលព្រឹកប៉ុណ្ណោះ គឹចាប់ពីម៉ោង ៧:០០នាទី រហូតដល់ម៉ោង ១១:០០នាទី ថ្ងៃត្រង់ សម្រាប់តែថ្ងៃសៅរ៍ និងថ្ងៃអាទិត្យ ។
លោក ភឿន គឹម លី បានបញ្ជាក់បន្ថែមទៀតថា ចំពោះបន្លែធម្មជាតិនេះ គឺប្រជាពលរដ្ឋបានដាំដុះប្រើតែជីធ្វើពីធម្មជាតិ ដែលគេហៅថា ជីកំប៉ុស្តិ៍ធ្វើពីរុក្ខជាតិតូចៗ លាយលាមកគោ និងលសមកមាន់។ល។ ដែលមិនបានប្រើប្រាស់ជីសារធាតុគីមីឡើយ ហើយតម្លៃលក់ដូចបន្ថែដទៃនៅតាមទីផ្សារនានាដែរ គឺតម្លៃសមរម្យបំផុតសម្រាប់បងប្អូនប្រជាពលរដ្ឋយើងទទួលយកបាន ។
គួររំលឹកថា រយៈកាលកន្លងមក ឯកឧត្តម ទៀ សីហា អភិបាល នៃគណៈអភិបាលខេត្ត និងលោកជំទាវ តែងតែអញ្ជើញចុះជួបជាមួយបងប្អូនអាជីវករលក់ដូរនៅផ្សារបន្លែសុវត្ថិភាព នឹងជួយគាំទ្រផលិទ្ធផលក្នុងស្រុកស្ទើរតែជារៀងរាល់ចុងសប្តាហ៍ ៕
