ខេត្តកណ្តាល ៖ នាថ្ងៃព្រហស្បតិ៍ ៦រោច ខែអស្សុជ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី០៨ ខែតុលា ឆ្នាំ២០២០ ឯកឧត្តម គង់ សោភ័ណ្ឌ អភិបាល នៃគណអភិបាលខេត្តកណ្ដាល អញ្ជើញចូលរួមកិច្ចប្រជុំបូកសរុប និង ចាត់អត្ថិភាពតម្រូវការគម្រោងកម្មវិធីវិនិយោគ បីឆ្នាំរំកិលខេត្ត ២០២១-២០២៣ ដោយមានការចូលរួមពីឯកឧត្តម លោកជំទាវសមាជិកក្រុមប្រឹក្សាខេត្ត អភិបាលរងខេត្ត មន្ទីរជុំវិញខេត្ត និងអាជ្ញាធរក្រុង-ស្រុកជាង១០០នាក់។
ឯកឧត្តម គង់ សោភ័ណ្ឌ បានលើកឡើងថា គោលបំណងសំខាន់ក្នុងដំណើរការកសាងកម្មវិធីវិនិយោគបីឆ្នាំរំកិល ២០២១-២០២៣ គឺដើម្បីណែនាំដល់មន្ទីរជំនាញក្រុង-ស្រុក និងអង្គភាពពាក់ព័ន្ធនានា ពិនិត្យពិចារណាលើ គម្រោងដែលជាតម្រូវការគម្រោងជាអាទិភាពដើម្បីបញ្ចូល ក្នុងកម្មវិធីវិនិយោគបីឆ្នាំរំកិលខេត្តឱ្យស្របតាមស្ថានភាពជាក់ស្ដែងរបស់មូលដ្ឋានឱ្យបានទាន់ពេលវេលាតាមការកំណត់។
ឯកឧត្តមអភិបាលខេត្តបានបញ្ជាក់ ថា សំណើគម្រោងទាំងឡាយណាដែលមន្ទីររដ្ឋបាលក្រុងស្រុកនិងអង្គភាពពាក់ព័ន្ធលើក ឡើងត្រូវយកចិត្តទុកដាក់ធ្វើយ៉ាងណាឱ្យស្របទៅតាមលក្ខន្តិកៈវិនិច្ឆ័យដែលបានកំណត់ ក្នុងសៀវភៅណែនាំបច្ចេកទេស ដោយផ្អែកលើលក្ខខណ្ឌវិនិច្ឆ័យ។ ចំពោះលក្ខខណ្ឌវិនិច្ឆ័យទាំងនោះរួមមាន ១. ស្របនឹងក្របខ័ណ្ឌអភិវឌ្ឍន៍មានន័យថា គម្រោង ឬសេវាទាំងនោះ ត្រូវឆ្លើយតបទៅនឹងគោលបំណង គោលដៅ និងដំណោះស្រាយក្នុ្ងងក្របខ័ណ្ឌអភិវឌ្ឍន៍ខេត្ដ។ ២. ស្ថិតក្នុងដែនសមត្ថកិច្ចខេត្ត គម្រោង ឬសេវាទាំងនោះត្រូវស្ថិតនៅក្នុង ដែនសមត្ថកិច្ចរបស់រដ្ឋបាល។ ៣. ស្ថិតក្នុងអន្តររដ្ឋបាលដែនដី គម្រោង ឬសេវាដែល មាន លក្ខណៈអន្ដរក្រុង-ស្រុក។ ៤. កំណត់អតិបរមាលើចំនួនគម្រោង គឺត្រូវកំណត់យកគម្រោង តាមចំនួន ដែលបានកំណត់ ករណីដែលមានការស្នើឡើងច្រើន។
ឯកឧត្ដមអភិបាលខេត្តបានបន្ដថា ដើម្បីធ្វើឱ្យដំណើរការរៀបចំកសាងកម្មវិធីវិនិយោគបីឆ្នាំរំកិលខេត្ត ទទួលបានជោគជ័យ ឯកឧត្តមបានស្នើឱ្យអង្គភាពពាក់ព័ន្ធទាំងអស់ ត្រូវកំណត់បញ្ហាស្នូល ហើយត្រូវដំណោះស្រាយឱ្យបានច្បាស់លាស់ ត្រូវចាត់អត្ថិភាពគម្រោងដើម្បីអនុវត្តន៍ឱ្យស្របតាមតម្រូវការជាក់ស្ដែងរបស់មូលដ្ឋានខ្លួន។ ជាមួយគ្នានេះ ត្រូវខិតខំឱ្យអស់ពីលទ្ធភាពក្នុងការរៀបចំកសាងកម្មវិធីវិនិយោគបីឆ្នាំរំកិល និងផែនការអភិវឌ្ឍន៍នានាឱ្យបានទាន់ពេលវេលា៕
