រាជធានីភ្នំពេញ ៖ ដោយសារតែទឹកភ្លៀងជន់លិចខ្លាំងក្នុងរាជធានីភ្នំពេញ នៅយប់ថ្ងៃ៩រោច ខែអស្សុជ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃអាទិត្យ ទី១១ ខែតុលា ឆ្នាំ២០២០ រដ្ឋបាលរាជធានីភ្នំពេញ បានដាក់ម៉ាស៊ីនបូមទឹក ចល័តចំនួន៦គ្រឿងបន្ថែម ដើម្បីបូមទឹកនៅចំណុច ស្ថានីយបឹងទំពុន ដើម្បីពន្លឿនរំដោះទឹកដែលបានជន់លិច។ នៅក្នុងរាត្រីនោះក៏មានវត្ដមាន ឯកឧត្តម ប៉ា សុជាតិវង្ស ប្រធានក្រុមប្រឹក្សារាជធានី និងឯកឧត្តម ឃួង ស្រេង អភិបាលរាជធានីភ្នំពេញ បានដឹកនាំមន្ដ្រីជំនាញធ្វើអន្ដរាគមន៍ ដើម្បីបូមទឹករំដោះពីស្ថានីយបឹងទំពុន ស្ថិតនៅលើផ្លូវលេខ៣៧១ ខណ្ឌមានជ័យ ផងដែរ។
ឯកឧត្តម ឃួង ស្រេង បានប្រសាសន៍ថា នៅតាមបណ្ដាស្ថានីយបូមទឹក នៃទីតាំងទាំងអស់ក្នុងរាជធានីភ្នំពេញ ដែលកំពុងប្រតិបត្តិការ ដើម្បីបូមទឹករំដោះនេះ រហូតមកដល់ពេលនេះ អាជ្ញាធរ និងមន្ដ្រីជំនាញពាក់ព័ន្ធកំពុងខិតខំធ្វើយ៉ាងណា ដើម្បីដោះស្រាយបញ្ហាជន់លិចនេះជូនប្រជាពលរដ្ឋជាបន្ទាន់ រួចហើយដែរ ដូច្នេះសូមបងប្អូន មានការអធ្យាស្រ័យបើលិចក៏មិនយូរដែរ ។
រដ្ឋបាលរាជធានីភ្នំពេញ នៅយប់ថ្ងៃទី១១ ខែតុលា ឆ្នាំ២០២០ បានចេញសេចក្តីជូនដំណឹងបន្ទាន់មួយដល់បងប្អូនប្រជាពលរដ្ឋ ពីការផ្អាកចរាចរណ៍ជាបណ្តោះអាសន្ននៅលើកំណាត់ផ្លូវលេខ៣៧១ ក្នុងខណ្ឌមានជ័យ ដោយសារតែសាលារាជធានីភ្នំពេញ ត្រូវបញ្ជូនរថយន្តទៅបូមទឹកចេញពីស្ថានីយទឹកបឹងទំពុន ដោយសារទឹកឡើងខ្លាំងពេក។
លោក សាំ ពិសិដ្ឋ ប្រធានមន្ទីរសាធារណការ បានបញ្ជាក់ថា យើងជូនដំណឹងទៅកាន់បងប្អូនប្រជាពលរដ្ឋ សូមវាងតាមផ្លូវផ្សេងជាបណ្តោះអាសន្ន ផ្អាកការធ្វើដំណើរតាមផ្លូវលេខ៣៧១សិនរង់ចាំការបើកដំណើរការឡើងវិញ ។ លោកបន្ដថា ដោយសារភ្លៀងធ្លាក់មួយមេធំនៅថ្ងៃនេះ ទើបបណ្តាលឱ្យទឹកនៅក្នុងស្ថានីយបូមទឹកបឹងទំពុងឡើងខ្លាំង ម៉ាស៊ីនបូមអត់ទាន់ ត្រូវតែបន្ថែមម៉ាស៊ីនជួយ។ ដូច្នេះហើយដើម្បីកុំឱ្យមានការប៉ះពាល់ដល់ទួការប៊ីនភ្លើងផង ទើបអាជ្ញាធរសម្រេចបញ្ជូនរថយន្តទៅបូមទឹកចេញ ដើម្បីជួយសង្គ្រោះស្ថានីយ ដូច្នេះរថយន្តត្រូវតម្រៀបជាជួរនៅលើផ្លូវ ជាហេតុត្រូវផ្អាកចរាចរជាបណ្តោះអាសន្ន មួយរយៈផងដែរ។
សូមបញ្ជាក់ថា រហូតមកដល់ពេលនេះ មានតំបន់ជាច្រើនក្នុងភូមិសាស្ដ្ររាជធានីភ្នំពេញ កំពុងរងការវាយប្រហារដោយជំនន់ទឹកភ្លៀង។ តំបន់រង្វង់មូលចោមចៅ និងអូឌឹម ស្ថិតក្នុងខណ្ឌកំបូល តាមបណ្ដោយផ្លូវជាតិលេខ៤ ក៏កំពុងរងការជន់លិច និងស្ទះចរាចរយ៉ាងខ្លាំងផងដែរ ៕
