ខេត្តព្រះសីហនុ៖ រថយន្តដឹកថ្ម ១គ្រឿង បានបុករថយន្ត ចំនួន ២គ្រឿងទៀត ដែលបើកបរទិសដៅស្របគ្នា បណ្ដាលឲ្យមនុស្ស២នាក់រងរបួសធ្ងន់ កាលពីវេលា ម៉ោង ០៩ៈ១០នាទីព្រឹក ថ្ងៃទី៨ ខែតុលា ឆ្នាំ២០១៩ លើផ្លូវជាតិលេខ៤ មុខរោងចក្រក្រោនជិតផ្លូវចូលសាលា សង្កាត់លេខ១ ក្រុងព្រះសីហនុ ខេត្តព្រះសីហនុ ។
មន្ត្រីនគរបាលចរាចរណ៍ក្រុងព្រះសីហនុបានឲ្យដឹងថា៖ ជនរងគ្រោះទាំង២នាក់រួមមាន ១/ ឈ្មោះ ណៃ ចិន្ដា ភេទ ប្រុស អាយុ ១៥ឆ្នាំ មុខរបរ កម្មករ មានទីលំនៅ ស្រុកទឹកឈូ ខេត្តកំពត ។ ២/ ឈ្មោះ លិ ប៊ុនថេង ភេទ ប្រុស អាយុ ១៩ឆ្នាំ មុខរបរ កម្មករ មានទីលំនៅ ស្រុកទឹកឈូ ខេត្តកំពតត ។ (នាក់ទាំង២ជាអ្នករួមដំណើរលើរថយន្តTACOMA) ជនរងគ្រោះត្រូវបានបញ្ជូនទៅសង្គ្រោះនៅគ្លីនិកមិត្តភាពឃ្លាំងលើ ។
គ្រោះថ្នាក់ចរាចរណ៍នេះមួយកើតឡើង បង្កដោយរថយន្តដឹកថ្ម ១គ្រឿងម៉ាក HYUNDAI ពណ៌សពាក់ផ្លាកលេខភ្នំពេញ 3D-0778 របស់ក្រុមហ៊ុន អ្នកបើកបរមិនស្គាល់អត្តសញ្ញាណ មានទិសដៅពីភ្នំពេញ មកខេត្តព្រះសីហនុ លុះដល់ចំណុចខាងលើបានបុករថយន្តពីខាងក្រោយចំនួន ២គ្រឿងទិសដៅស្របគ្នា ១.ម៉ាកTACOMA ពណ៌ស ផ្លាកលេខព្រះសីហនុ2A-4838 អ្នកបើកបរឈ្មោះ ឈុន ចេង ភេទ ប្រុស អាយុ ៥៥ឆ្នាំ មុខរបរសិប្បកម្មកាត់កញ្ចក់ មានទីលំនៅភូមិ៥ សង្កាត់លេខ៤ ក្រុង/ខេត្តព្រះសីហនុ អ្នករួមដំណើរចំនួន ២នាក់ អង្គុយខាងក្រោយ ។ ២.ម៉ាក IZUZU ពណ៌ខៀវ ផ្លាកលេខព្រះសីហនុ2A-8409 ដឹកទឹកសុទ្ធឈ្មោះ ចន្ទរះ អ្នកបើកបរ ឈ្មោះ សឿ ភេទ ប្រុស អាយុ ៣៩ឆ្នាំ មុខរបរកម្មករ មានទីលំនៅភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ ។
បច្ចុប្បន្នសមត្ថកិច្ចបាននាំយក វត្ថុតាងរថយន្តចំនួន ៣គ្រឿងស្ទូចយកចេញសំរួលចរាចរណ៍ ហើយយកមករក្សាទុកនៅការិយាល័យនគរបាលចរាចរណ៍ផ្លូវគោក ដើម្បីចាត់ការតាមនីតិវិធី ៕
