ខេត្តកណ្ដាល ៖ រយៈពេលឈប់សម្រាក៣ថ្ងៃ ព្រះរាជពិធី បុណ្យអុំទូក បណ្ដែតប្រទីប សំពះព្រះខែ និងអកអំបុក ខេត្តកណ្តាល ទទួលភ្ញៀវទេសចរ សរុបប្រមាណ ជិត៥ម៉ឺននាក់ ក្នុងនោះភ្ញៀវទេសចរ អន្តរជាតិប្រមាណ៦៥នាក់ ដែលកត្តានេះហើយ បានជំរុញឲ្យមាន កំណើនទេសចរណ៍ ក្នុងស្រុកនិងធ្វើឲ្យសេដ្ឋកិច្ច របស់កម្ពុជានៅតែបន្តដំណើរទៅមុខប្រកបដោយភាពវិជ្ជមាន។
នេះជាប្រសាសន៍ លើកឡើងរបស់ឯកឧត្តម គង់ សោភ័ណ្ឌ អភិបាលខេត្តកណ្តាលក្នុងពិធីបិទការប្រកួតប្រណាំងទូកខ្នាតតូច អបអរសាទរនៃព្រះរាជពិធី បុណ្យអុំទូកបណ្ដែតប្រទីបសំពះព្រះខែ និងអកអំបុកនៅតំបន់ស្កាយលែន 7NG ក្នុងឃុំវិហារសួគ៌ ស្រុកខ្សាច់កណ្ដាល កាលពីព្រឹកថ្ងៃទី២ ខែវិច្ឆិកាម្សិលមិញនេះ។ ឯកឧត្តម អភិបាលខេត្ត គូសបញ្ជាក់ថា ៖បើទោះបីជាឆ្នាំនេះប្រទេសកម្ពុជា បានសម្រេចផ្អាកការ ប្រារព្ធពិធីបុណ្យអុំទូកបណ្តែតប្រទីប អកអំបុកសំពះព្រះខែ ដើម្បីបញ្ចៀសហានិភ័យពីការឆ្លងជំងឺកូវីដ-១៩ និងជំនន់ទឹកភ្លៀងក៏ដោយ ប៉ុន្តែព្រះរាជពិធីបុណ្យ ប្រពៃណីយជាតិ ដ៍ធំមួយនេះ ប្រជាពលរដ្ឋយើង នៅតែបន្តប្រពៃណីយ ប្រារព្ធធ្វើ នៅតាមទីវត្តអារាម តាមរមណីយដ្ឋាននានានិងនៅតាមលំនៅដ្ឋានមិនដែលអាក់ខានឡើយ។
ឯកឧត្តមបានបញ្ជាក់ទៀតថា៖ប្រសិនបើ និយាយអំពីកីឡាអុំទូក គឺយើងមិនអាចបំភ្លេចបានឡើយទូកងសារាយតេជោសែនជ័យ របស់ខេត្តកណ្ដាល ដែលទទួលបានកិត្តិយស កេរ្តិ៍ឈ្មោះជាទូក គូរពិសេស មានចំណាត់ថ្នាក់បច្ចេកទេស ល្បឿនលឿនជាងគេទូទាំងប្រទេស ក្នុងឆ្នាំ ២០១៦ និងឆ្នាំបន្តបន្ទាប់រហូតមកដល់ឆ្នាំ ២០១៩ ហើយទូកងសារាយតេជោសែនជ័យ ក៏នៅតែជាទូកដែលទទួលបាន ចំណាត់ថ្នាក់លេខ១ ក្នុងផែនទូកគូរពិសេសដែលមានចំណាត់ថ្នាក់ ល្បឿនលឿនជាងគេ។
លោកឧកញ៉ា ស្រី ចាន់ថនអគ្គនាយកក្រុមហ៊ុន ជេតស៍គ្រុប និងជាស្ថាបនិក រមណីយដ្ឋាន ស្កាយលែន(skyland) ឲ្យដឹងថា៖ ទូកខ្នាតតូចដែលបានចូលរួមក្នុងការប្រកួតមានចំនួន៣៨ ទូក ស្មើនិង១៩គូរ។ឆ្លងកាត់ការប្រកួត អស់រយៈពេល ៥ ថ្ងៃ គណៈកម្មការរៀបចំការ ប្រណាំងទូកបានជ្រើសរើសប្រភេទទូក ទទួលបានជយ័លាភី ដូចខាងក្រោម៖
១-ចំពោះប្រភេទខ្នាតទូកបាយ ៖ចំណាត់ថ្នាក់លេខ១ បានទៅលើទូកឈ្មោះ បារ៉ុងសែនជ័យ បារមីទួលសំពៅ, លេខ២ បានទៅលើទូក ឈ្មោះមេម៉ៅសែនជ័យបារមីទួលធំ ,លេខ ៣ បានទៅលើទូក ឈ្មោះបុប្ផាខ្នោការ ។
២-ចំពោះប្រភេទ ទូកខ្នាតអន្តរជាតិ ៖ចំណាត់ថ្នាក់លេខ១បានទៅលើទូកឈ្មោះ ពេជ្រកុមារសែនជ័យ ,លេខ២ បានទៅលើទូកឈ្មោះ ពន្លឺពេជ្រមានជ័យ,លេខ៣ បានទៅលើទូកឈ្មោះ ក្រុងនគរសែនជ័យបារមីវត្តមាត់ក្រសៈ៕
