ខេត្តសៀមរាប ៖ ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថានបានមានប្រសាសន៍ថា ទន្លេសាបត្រូវបានបំពុលដោយថង់ប្លាស្ទិកដែលបោះចោលដោយសហគមន៍ដែលរស់នៅលើបឹងទន្លេសាប និងបងប្អូនប្រជាពលរដ្ឋបោះចោលគ្មានសណ្តាប់ធ្នាប់តាមព្រែក តាមស្ទឹងនានាចាក់ចូលមកក្នុងបឹងទន្លេសាប ហើយសំណល់ថង់ប្លាស្ទិកទាំងនេះ បានផ្តល់ផលប៉ះពាល់ដល់សង្គម សុខភាព និងគុណភាពបរិស្ថាន ជាច្រើន។
ថ្លែងនៅក្នុងទិវាអនាម័យបរិស្ថាន ២៣ វិច្ឆិកា និងពិធីបុណ្យទន្លេសាបនារដូវទឹកសម្រកប្រចាំឆ្នាំ២០២០ នៅខេត្តសៀមរាប កាលពីព្រឹកថ្ងៃទី២២ ខែវិច្ឆិកា ឆ្នាំ២០២០ ឯកឧត្តម នេត្រ ភក្ត្រា បានគូសបញ្ជាក់ថា កាលពីឆ្នាំ២០១៩ កន្លងទៅ សំណល់ប្លាស្ទិកប្រមាណជិត២០០តោន ត្រូវបានប្រមូលចេញពីទន្លេសាបក្នុងភូមិសាស្ត្រខេត្តសៀមរាប ហើយនៅឆ្នាំ២០២០នេះ សំណល់ប្លាស្ទិកប្រមាណជិត២៥០តោន ត្រូវបានប្រមូលយកទៅកែច្នៃធ្វើជាឥដ្ឋបរិស្ថាន។ ឯកឧត្តមរដ្ឋលេខាធិការក៏បានអំពាវនាវដល់ប្រជាសហគមន៍រស់នៅលើបឹងទន្លេសាបទាំងនៅក្នុងភូមិសាស្ត្រខេត្តសៀមរាប និងខេត្តដទៃទៀតរួមមាន ខេត្ដកំពង់ធំ កំពង់ឆ្នាំង ពោធិ៍សាត់ និងខេត្ដបាត់ដំបង ចូលរួមសម្អាតបរិស្ថានដោយកាត់បន្ថយការប្រើប្រាស់ប្លាស្ទិកសំដៅទប់ស្កាត់ការបំពុលប្រព័ន្ធអេកូឡូស៊ី និងជីវចម្រុះ នៅទន្លេសាបជាបឹងដែលពិភពលោកទទួលស្គាល់ថាសម្បូរត្រីច្រើនជាងគេ។
ឯកឧត្តមបានបន្តថា ស្ថានភាពគ្រប់គ្រងសំរាម សំណល់រឹងទីប្រជុំជនរបស់ខេត្តសៀមរាប សម្រាប់ឆ្នាំ២០២០ មានបរិមាណបង្កើតសំណល់ប្រមាណ៥០៦តោនក្នុងថ្ងៃ ហើយបរិមាណកែច្នៃឡើវិញមានប្រមាណ១០៣តោនក្នុងថ្ងៃ ដោយការអាជីវករប្រមូលទិញអេតចាយ មានចំនួន៤៩ទីតាំង បរិមាណសំណល់ប្រមូលយកទៅដាក់ទីលានចាក់សំរាមប្រមាណ២៤១តោនក្នុងថ្ងៃ។ ទន្ទឹមនេះ បរិមាណសំណល់ដែលបោះចោលដោយខុសច្បាប់ប្រមាណ១៦២តោនក្នុងថ្ងៃ ដែលបានដុតចោល បោះចោលតាមដងផ្លូវ និងប្រឡាយសាធារណៈ។
ឯកឧត្តមរដ្ឋលេខាធិការបានលើកឡើងថា ក្នុងមួយឆ្នាំៗ កម្ពុជាបានបង្កើតសំរាមប្រមាណ៤លានតោន ក្នុងនោះ៦៥ភាគរយ ជាសំណល់សរីរាង្គ ប្រមាណ២០ភាគរយ ជាសំណល់ប្លាស្ទិក ហើយនៅសេសសល់ជាសំណល់រឹង និងសំណល់ផ្សេងៗទៀត។ ជាមួយគ្នានេះ ក្នុងចំណោមសំរាមទាំងអស់នោះ មានត្រឹមតែប្រមាណ៥១ភាគរយ ប៉ុណ្ណោះ ដែលត្រូវបានយកទៅចាក់នៅទីលានចាក់សំរាម ក្រៅនោះត្រូវគេបោះចោលយ៉ាងអនាធិបតេយ្យតាមដងផ្លូវ ក្នុងប្រភពទឹក និងខ្លះទៀតត្រូវបានដុតចោលជាដើម។
បើតាម ឯកឧត្ដម នេត្រ ភក្រ្ដា បានឱ្យដឹងថា កម្ពុជាមិនទាន់មានតួលេខថា ក្នុងមួយឆ្នាំប្រើប្រាស់ប្លាស្ទិកប៉ុន្មានតោននៅឡើយ ប៉ុន្តែគ្រាន់តែនៅរាជ ធានីភ្នំពេញក្នុងមួយថ្ងៃថង់ប្លាស្ទិកជាង១០លានថង់ត្រូវបានប្រើប្រាស់។ នៅលើពិភពលោក ក្នុងមួយឆ្នាំបានប្រើប្រាស់ប្លាស្ទិកចន្លោះពី៤០០ ទៅ៦០០លានតោន ហើយចាប់តាំងពីបង្កើតប្លាស្ទិកមកសំណល់ប្លាស្ទិកនៅលើភពផែនដីមានប្រមាណ ៩,៣ ប៊ីលានតោន ហើយចំនួននេះនឹងត្រូវបន្តកើនឡើងនៅពេលដែលចាប់ពីឆ្នាំ២០២៥ ពិភពលោកប្រើប្រាស់ប្លាស្ទិកប្រមាណ ៦០០ លានតោន ក្នុងមួយឆ្នាំ។ ក្រៅពីនេះ ប្រសិនបើមិនមានវិធានការតឹងរឹងក្នុងការកាត់បន្ថយប្រើប្រាស់ប្លាស្ទិកលើទេ នៅលើពិភពលោកនឹងមានសំណល់ប្លាស្ទិកកើនដល់៣៤ប៊ីលានតោននៅឆ្នាំ២០៥០ ហើយចំនួននេះមាន ច្រើនជាងចំនួនត្រីនៅក្នុងមហាសមុទ្រទៅទៀត។
សូមបញ្ជាក់ផងដែរថា ការប្រារព្ធទិវាអនាម័យបរិស្ថានជាតិ ២៣ វិច្ឆិកានេះ ក៏ជាការចាប់ផ្តើមបើកយុទ្ធនាការប្រមូលយកសំរាមប្លាស្ទិកនារដូវទឹកសម្រកបឹងទន្លេសាបឆ្នាំ២០២០ ដែលជាការចូលរួមសហការរៀបចំរវាងមន្ទីរបរិស្ថានខេត្តសៀមរាប រដ្ឋបាលខេត្តសៀមរាប និងអង្គការមូលនិធិទំពាំងស្នងឫស្សី (NGO2 Bamboo Shoot Foundation) ជាមួយដៃគូម្ចាស់ជំនួយអង្គការអន្តរជាតិសម្ព័ន្ធភាពស្តារមហាសមុទ្រ (Ocean Recovery Alliance)៕
