នៅព្រឹកថ្ងៃចន្ទទី១៤ខែតុលាឆ្នាំ២០១៩ត្រូវនិងថ្ងៃ១រោចខែអស្សុជឆ្នាំកុរឯកស័ក ពស ២៥៦៣ ឯកឧត្ដម ជាវ តាយ អភិបាលខេត្តអញ្ជើញអមដំណើរ ឯកឧត្ដម យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រីដើម្បីពិនិត្យទីតាំងប្រារព្ធពិធីសម្ពោធរោងចក្រផលិតស៉ីម៉ង់ត៍ថៃប៊ុនរ៉ុង ស្ថិតនៅក្នុងភូមិល្អាង ឃុំល្អាង ស្រុក ដងទង់ ខេត្តកំពត។
នៅព្រឹកថ្ងៃទី១៤ខែតុលាឆ្នាំ២០១៩ ឯកឧត្ដម ជាវ តាយ អភិបាលនៃគណៈអភិបាលខេត្ត ព្រមទាំងថ្នាក់ដឹកនាំខេត្តមន្ទីរ-អង្គភាពពាក់ព័ន្ធមួយចំនួនក្នុងខេត្ត បានអញ្ជើញអមដំណើរជាមួយ ឯកឧត្ដមនាយឧត្តមសេនីយ៍ យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី និងថ្នាក់ដឹកនាំក្រសួងស្ថាប័នពាក់ព័ន្ធ ដើម្បីចុះពិនិត្យ ទីតាំងប្រារព្ធពិធីសម្ពោធដាក់អោយដំណើរការជាផ្លូវការ នូវរោងចក្រផលិតស៉ីម៉ង់ត៍ថៃប៊ុនរ៉ុង ដែលស្ថិតនៅក្នុងភូមិល្អាង ឃុំល្អាង ស្រុកដងទង់ ខេត្តកំពត។
ក្នុងកិច្ចប្រជុំនេះពាក់ព័ន្ធចំពោះការងាររៀបចំពិធីការ និងសន្តិសុខសុវត្ថិភាពសណ្ដាប់ធ្នាប់ក្នុងអង្គពិធី ឯកឧត្ដមនាយឧត្តមឧត្តមសេនីយ៍ យូ ស៊ុនឡុង ក៏បានបញ្ជាក់ថានឹងគ្រោងត្រៀមភ្ញៀវកិត្តិយសជាតិអន្តរជាតិ និងប្រជាពលរដ្ឋ ចូលរួមទទួលស្វាគមន៍សម្ដេចតេជោ ហ៊ុន សែនមានចំនួនប្រមាណ៨៥០០នាក់។
កិច្ចប្រជុំ ក៏បានចូលរួមពិភាក្សាពីផែនការបែងចែកភារកិច្ចលំអិតនៃការទទួលខុសត្រូវក្នុងដំណើរការពិធីសម្ពោធពីសំណាក់គណៈកម្មការរៀបចំបុណ្យជាតិ អាជ្ញាធរខេត្ត និងក្រុមហ៊ុនថៃប៊ុនរ៉ុងព្រមទាំងផ្នែកពាក់ព័ន្ធដើម្បី ធ្វើយ៉ាងណាអោយការប្រព្រឹត្តទៅធានាបានសន្តិសុខសណ្ដាប់ធ្នាប់ជូនថ្នាក់ដឹកនាំក៏ដូចអង្គពិធីទាំងមូល ប្រកបដោយភាពរលូន និងជោគជ័យ ។
