ខេត្តកែប ៖ ការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តកែប ព្រឹកថ្ងៃទី១៦ តុលា ២០១៩ បានបញ្ជូនជនសង្ស័យពាក់ព័ន្ធការចរាចរចែកចាយជួញដូរ និងប្រើប្រាស់គ្រឿងញៀនដោយខុសច្បាប់ ចំនួន១នាក់ ទៅសាលាដំបូងខេត្តកំពតដើម្បីចាត់ការតាមនីតិវិធីច្បាប់បន្ត ។ ដោយអនុវត្តន៍តាមផែនការ និងការដឹកនាំចង្អុលបង្ហាញពីលោកឧត្តមសេនីយ៍ត្រី បែន តារា ស្នងការនគរបាលខេត្តកែប ល្ងាចថ្ងៃទី១៤,១០,២០១៩ ការិយាល័យប្រឆាំងគ្រឿងញៀន សហការជាមួយកំលាំងអន្តរាគមន៍ពិសេស ស្នងការនគរបាលខេត្តកែប បានពួនស្ទាក់ចាប់ការចរាចរ ចែកចាយ ជួញដូរ និងប្រើប្រាស់គ្រឿងញៀនដោយខុសច្បាប់មួយករណី នៅចំណុចមុខផ្ទះសំណាក់តារាលុច្ស ក្នុងភូមិថ្មី សង្កាត់ព្រៃធំ ក្រុង/ខេត្តកែប។
ករណីខាងលើនគរបាលយើងដកហូតជាក់ស្តែងបានថ្នាំញៀន២កញ្ចប់តូច ដែលសាមុីជនទទួលស្គាល់ថាជាម៉ាទឹកកក ទូរសព្ទ៣គ្រឿង និងឧបករណ៍សំរាប់ជក់១កំប្លេរ ។ ជនសង្ស័យមានឈ្មោះ ទ្បាយ សុភារម្យ ភេទប្រុស អាយុ២៥ឆ្នាំ ជាបុគ្គលិកបឹងកាឡូម៉ាសាដា ទីតាំងនៅកន្លែងកើតហេតុខាងលើ ។ ក្រោយការចាប់ខ្លួនយើងបាននាំជនសង្ស័យមកកាន់ស្នងការដ្ឋាននគរបាលខេត្ត ដើម្បីបន្តនីតិវិធី និងកសាងសំណុំរឿងដើម្បីបញ្ជូនទៅសាលាដំបូងខេត្តកំពត ពេលនេះតុលាការសម្រេចចេញដីការឃុំខ្លួនហើយ៕
