ខេត្តកណ្តាល ៖ នៅថ្ងៃ៦កើត ខែបុស្ស ឆ្នាំជូត ទោស័ក ព.ស.២៥៦៤ ត្រូវនឹងថ្ងៃអាទិត្យ ទី២០ ខែធ្នូ ឆ្នាំ២០២០ ឯកឧត្ដម គង់ សោភ័ណ្ឌ អភិបាលខេត្តកណ្តាល និង ជាប្រធានគណៈកម្មាធិការសាខាកាកបាទក្រហមកម្ពុជាខេត្តកណ្ដាល បានជួបសំណេះ សំណាល និង នាំយកអំណោយមនុស្សធម៌ប្រគល់ជូនវិទ្យាស្ថានអភិវឌ្ឍន៍ភាពជាអ្នកដឹកនាំ និង ចរិតលក្ខណៈ (L. CDI) ស្ថិតនៅភូមិស្លាបតាអោន ឃុំគគី ស្រុកកៀនស្វាយ ខេត្តកណ្តាល។
ឯកឧត្តម គង់ សោភ័ណ្ឌ បានពាំនាំមកនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេ ចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និង សម្តេចតេជោ នាយករដ្ឋមន្ត្រី ជូនលោក លោកស្រីថ្នាក់ដឹកនាំវិទ្យាស្ថាន លោកគ្រូ អ្នកគ្រូ និងក្មួយៗសិស្សា នុសិស្សទាំងអស់ ដោយក្តីនឹករឭកក្រៃលែង។ ដែលជានិច្ចកាល សម្តេចទាំងទ្វេ តែងតែមានការយកចិត្តទុកដាក់ដល់ប្រជាពលរដ្ឋ ដែលជាជនក្រីក្រ និងជនងាយរងគ្រោះ ដោយគ្រោះមហន្តរាយនានា ដោយមិនប្រកាន់បក្ខពួក សាសនា ឬនិន្នាការនយោបាយឡើយ។
ឯកឧត្តមក៏បានផ្ដាំផ្ញើដល់លោក លោកស្រី ព្រមទាំងក្មួយៗសិស្សានុសិស្សទាំងអស់ សូមថែទាំសុខភាពឱ្យបានល្អ និងត្រូវប្រកាន់ខ្ជាប់នូវអនាម័យ៣ប្រការគឺ៖ រស់នៅស្អាត ហូបស្អាត និងផឹកស្អាត ហើយត្រូវឧស្សាហ៍លាងសម្អាតដៃនឹងសាប៊ូ ឬទឹកអាល់កុល ដើម្បីចូលរួមការពារការឆ្លងជំងឺផ្សេងៗ ពិសេសជំងឺកូវីដ-១៩។ ឯកឧត្តម បានសង្កត់ធ្ងន់ថា ប្រមុខរាជរដ្ឋាភិបាលកម្ពុជារបស់យើង សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន បានយកចិត្តទុកដាក់ខ្លាំងណាស់ ចំពោះសុខទុក្ខប្រជាពលរដ្ឋទូទៅ ដោយបារម្ភគិតគូរខ្លាចពលរដ្ឋមានជួបនូវបញ្ហាផ្នែកជីវភាពរស់នៅ ឬជំងឺផ្សេងៗ ។
អំណោយដែលបានផ្តល់ជូនវិទ្យាស្ថានអភិវឌ្ឍន៍ភាពជាអ្នកដឹកនាំ និងចរិតលក្ខណៈ (L. CDI) មាន អង្ករចំនួន ២តោន, មី៦០កេស, ត្រីខកំប៉ុង ៣០០កំប៉ុង, ទឹកត្រី ២០យួរ, ទឹកស៊ីវ ២០យួរ, សាប៊ូ ១៤៤ដុំ, ទឹកបរិសុទ្ធ ២០ដបធំ (៤០០លីត្រ), អាល់កុល ៣០លីត្រ, ម៉ាស់៥០០បន្ទះ, ប្រេងឆា ១២ដប, និងថវិកាជូនអង្គការ ៤លានរៀល។ ដោយឡែកសម្រាប់សិស្សានុសិស្សក្រីក្រចំនួន ៤៧នាក់ ក្នុងម្នាក់ៗទទួលបានថវិកា ៥ម៉ឺនរៀល និងលោកគ្រូ អ្នកគ្រូ ចំនួន០៩នាក់ ក្នុងម្នាក់ៗ ១០ម៉ឺនរៀល ផងដែរ៕
