រាជធានីភ្នំពេញ៖ ផលិតផលសម្លាប់មេរោគ ដែលមានជែលលាងដៃ និងសាប៊ូបោកខោអាវ សរុបចំនួន ៨២០កេស ស្មើនឹងទឹកប្រាក់ប្រមាណ១៦,០០០ដុល្លារ ត្រូវបានក្រុមហ៊ុនយូនីលីវើ(ខេមបូឌា)លីមីតធីត ប្រគល់ជូនរដ្ឋបាលរាជធានីភ្នំពេញ ។ ពិធីប្រគល់និងទទួល ត្រូវបានធ្វើឡើងនៅព្រឹកថ្ងៃទី២១ ខែធ្នូ ឆ្នាំ២០២០ ក្រោមវត្តមាន ឯកឧត្តម ឃួង ស្រេង អភិបាលរាជធានីភ្នំពេញ និងតំណាងក្រុមហ៊ុនយូនីលីវើ(ខេមបូឌា)លីមីតធីត នៅសាលារាជធានីភ្នំពេញ។
តំណាងក្រុមហ៊ុនយូនីលីវើ(ខេមបូឌា)លីមីតធីតបានបញ្ជាក់ថា៖អំណោយដែលយកមកប្រគល់ជូនរដ្ឋបាលរាជធានីភ្នំពេញនាពេលនេះ ជាប្រភេទផលិតផលសម្រាប់សម្លាប់មេរោគ ជែលលាងដៃ និងសាប៊ូបោកខោអាវ ដែលមានចំនួន៨២០កេស ស្មើនឹងទឹកប្រាក់១៦,០០០ដុល្លារ គោលបំណងដែលក្រុមហ៊ុនផ្ដល់មករដ្ឋបាលរាជធានីភ្នំពេញនេះ គឺដើម្បីឱ្យរដ្ឋបាលរាជធានីភ្នំពេញ បានចែកជូនដល់មន្ត្រីជួរមុខ ក្នុងការប្រយុទ្ធប្រឆាំងនឹងជំងឺកូវីដ-១៩ ពិសេសចែកចាយនៅក្នុងទីតាំងចត្តាឡីស័ក មន្ទីរពេទ្យព្យាបាលជំងឺកូវីដ-១៩ និងសហគមន៍ប្រជាពលរដ្ឋក្រីក្រផងដែរ ។ នៅក្នុងឱកាសនោះ ឯកឧត្តម ឃួង ស្រេង អភិបាលរាជធានីភ្នំពេញ បានថ្លែងអំណរគុណយ៉ាងជ្រាលជ្រៅចំពោះក្រុមហ៊ុន unilever cambodia limited ដែលបានផ្ដល់នូវទឹកសម្លាប់មេរោគ ជែលលាងដៃនឹងសាប៊ូបោកខោអាវមួយចំនួននេះ ។
ឯកឧត្តមសន្យាថា នឹងយកផលិតផលទាំងអស់នេះ ទៅបែងចែកទៅតាមអ្វីដែលក្រុមហ៊ុនចង់បាន ព្រោះថា ជំងឺកូវីដ-១៩ បានឆ្លងរាលដាលចូលសហគមន៍ ប៉ុន្តែទោះបីជាយ៉ាងណាក្តី ដោយការខិតខំប្រឹងប្រែងពីអាជ្ញាធរ
មានសមត្ថកិច្ច ក៏ដូចជាការចូលរួមសហការល្អ ពីសំណាក់បងប្អូនប្រជាពលរដ្ឋ ឃើញថា ព្រឹត្តិការណ៍សហគមន៍២៨វិច្ឆិកា រាជធានីភ្នំពេញយើងអាចគ្រប់គ្រងបាន ដែលធានាសុវត្ថិភាព សុខភាពរបស់ប្រជាពលរដ្ឋ៕
