ខេត្តប៉ៃលិន៖ ក្នុងឱកាសអញ្ជើញដឹកនាំក្រុមការងារចុះសំណេះសំណាលសួរសុខទុក្ខ លោកវរសេនីយ៍ឯក វណ្ណ ដាវី មេបញ្ជាការកងល្បាតទី១ នៃកងការពារព្រំដែនលេខ ៥០៤ ដែលមានជំងឺកំពុងសម្រាកព្យាបាលនៅគេហដ្ឋាន ស្ថិតនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន នាព្រឹកថ្ងៃទី២៦ ខែធ្នូ ឆ្នាំ២០២០ លោកជំទាវ បាន ស្រីមុំ អភិបាលខេត្តប៉ៃលិន បានមានប្រសាសន៍លើកឡើងថា៖ បច្ចុប្បន្នគោលនយោបាយ របស់រាជរដ្ឋាភិបាលកម្ពុជា ដែល មានសម្តេចតេជោ ហ៊ុន សែន ជាប្រមុខដឹកនាំ បាននិងកំពុងយកចិត្តទុកដាក់យ៉ាងខ្លាំង ទៅលើជីវភាព និងសុខទុក្ខរបស់ប្រជាពលរដ្ឋ ជាពិសេសកងកម្លាំងប្រដាប់អាវុធគ្រប់ប្រភេទ ដោយមិនទុកឱ្យកងកម្លាំងប្រដាប់អាវុធណាមួយឈឺស្លាប់ដោយគ្មានអ្នកមើលថែនោះទេ។
លោកជំទាវអភិបាលខេត្ត បានមានប្រសាសន៍បញ្ជាក់ថា៖ កងកម្លាំងជាស្នូលដ៏ធំបំផុតក្នុងការការពារសន្តិសុខ ជូនដល់ប្រជាពលរដ្ឋ និងគោរពនូវបទបញ្ជារបស់រាជរដ្ឋាភិបាលជានិច្ច ទោះបីជាកាលៈទេសៈ ណាក៏ដោយ ហើយគាំទ្រសម្តេចតេជោ ហ៊ុន សែន ធ្វើជានាយករដ្ឋមន្ត្រីនៃព្រះរាជាណាចក្រកម្ពុជាជារៀងរហូត ព្រោះការដឹកនាំរបស់សម្តេច បានធ្វើឱ្យប្រទេសជាតិមានសុខសន្តិភាព និងការអភិវឌ្ឍយ៉ាងឆាប់រហ័សលើគ្រប់វិស័យ។
លោកជំទាវ បាន ស្រីមុំ បានមានប្រសាសន៍លើកទឹកចិត្ត និងផ្តាំផ្ញើដល់ លោកវរសេនីយ៍ឯក វណ្ណ ដាវី និងក្រុមគ្រួសារ ត្រូវខិតខំព្យាបាលជំងឺ ឱ្យឆាប់ជាសះស្បើយ ដើម្បីចូលបម្រើការងារឡើងវិញជូនជាតិ និងប្រជាជន ហើយក្នុងនោះថ្នាក់ដឹកនាំគ្រប់ជាន់ថ្នាក់ នឹងនៅរួមសុខទុក្ខជាមួយយុទ្ធជនយើងជានិច្ច។
សូមបញ្ជាក់ថា៖ នៅក្នុងឱកាសសំណេះសំណាលសួរសុខទុក្ខនោះដែរ លោកជំទាវ បាន ស្រីមុំ អភិបាលខេត្តប៉ៃលិន ក៏បានឧបត្ថម្ភដល់លោកវរសេនីយ៍ឯក វណ្ណ ដាវី មានដូចជា៖ អង្ករ ៥០គីឡូក្រាម មី ២កេស ត្រីខ ២យួរ ទឹកស៊ីអ៊ីវ ១កេស ទឹកដោះគោឆៅ ៣ឡូ ទឹកសុទ្ធ ៤កេស និងថវិកាចំនួន ២ ២០០ ០០០រៀល៕
