រាជធានីភ្នំពេញ ៖ បុរសម្នាក់ សង្ស័យស្រវឹងស្រា បើករថយន្តម៉ាស្តាមួយគ្រឿង ក្នុងល្បឿនលឿនពេក ជ្រុលបុកក្បាលព្រួញពុះចែកទ្រូងផ្លូវបណ្តាលឲ្យបាក់អស់មួយកង់ រីឯរថយន្តបែកកង់កល់ជាប់ទៅមុខលេងរួច កាលពីវេលាម៉ោង១រំលងអធ្រាត្រ ឈានចូលថ្ងៃទី១៧ ខែតុលា ឆ្នាំ២០១៩ នៅតាមបណ្តោយផ្លូវ២៧១ ស្ថិតក្នុងសង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ខាងមុខមន្ទីរពេទ្យព្រះកុសុមៈ (ហៅពេទ្យលោកសង្ឃ) តែមិនបណ្ដាលឲ្យមានអ្នករងរបួសនោះទេ។
តាមសាក្សីនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសម្នាក់ សង្ស័យស្រវឹងស្រា បើករថយន្តម៉ាស្តារ ពណ៌ទឹកប្រាក់ ពាក់ស្លាកលេខ ភ្នំពេញ 2AX-6369 ធ្វើដំណើរយ៉ាងលឿនតាមបណ្តោយផ្លូវលេខ២៧១ ក្នុងទិសដៅពីត្បូងទៅជើង ខណៈមកដល់ចំណុចកើតហេតុ ស្រាប់តែរេចង្កូតខាងឆ្វេងដៃ ជ្រុលបុកក្បាលព្រួញពុះចែកទ្រូងផ្លូវបាក់អស់មួយកង់ ចំណែករថយន្តបង្កកល់ជាប់ទៅមុខលែងរួច តែសំណាងមិនមានមនុស្សរងរបួស។
ក្រោយកើតហេតុ សមត្ថកិច្ចមូលដ្ឋានបានចុះមកដល់ចំណុចកើតហេតុ និងទំនាក់ទំនងទៅជំនាញ មកស្ទូចរថយន្តបង្កទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រងចាំដោះស្រាយតាមច្បាប់ ៕
