រាជធានីភ្នំពេញ ៖ នាថ្ងៃទី១២ ខែធ្នូ ឆ្នាំ២០២១នេះ ក្រសួងទេសចរណ៍ បានឲ្យដឹងថា កាលពីខែវិច្ឆិកា ឆ្នាំ២០២០កន្លងទៅ ការិយាល័យសេដ្ឋកិច្ចសេណេហ្គាល់ បានចុះផ្សាយរបាយការណ៍ ស្តីពី ការផ្តល់ចំណាត់ថ្នាក់ដល់ប្រទេស ដែលគ្រប់គ្រងកូវីដ-១៩ បានល្អបំផុតនៅលើពិភពលោក។
តាមសេចក្តីក្តីប្រកាសព័ត៌មានរបស់ក្រសួងទេសចរណ៍ របាយការណ៍ខាងលើ ក្នុងនោះប្រទេសកម្ពុជាឈរនៅចំណាត់ថ្នាក់លេខ ៣ បន្ទាប់ពី Saint Kitts និង Nevis ដែលជារដ្ឋតូចនៃតំបន់ការ៉ាអ៊ុបនិងស៊ីស្សល។
ជាងនេះទៅទៀតកាលពីថ្ងៃទី២០ ខែធ្នូ ឆ្នាំ២០២០ កន្លងទៅថ្មីៗនេះ ការិយាល័យសេដ្ឋកិច្ចសេណេហ្គាល់ដដែល បានចុះផ្សាយរបាយការណ៍របស់ខ្លួនជាថ្មីថា“ កម្ពុជាបានជាប់ចំណាត់ថ្នាក់លេខ ១ លើពិភពលោកក្នុងការប្រយុទ្ធប្រឆាំងនិងការទប់ស្កាត់ការរាតត្បាតនៃជំងឺកូរឹង -១៩ “ដែលមានពិន្ទុ ១/១ (១ ជាពិន្ទុខ្ពស់បំផុតនៃការធ្វើចំណាត់ថ្នាក់) ក្នុងចំណោម ១៦៦ ប្រទេសជុំវិញពិភពលោក បន្ទាប់មកគឺប្រទេសស៊ូដង់ខាងត្បូង និងប្រទេសប៊្រុយណេ ដែលមានពិន្ទុ ០,៩៩ ។
ក្រសួងទេសចរណ៍ បានលើកឡងថា ដោយមានការគ្រប់គ្រងយ៉ាងល្អ និងម៉ឺងម៉ាត់របស់រាជរដ្ឋាភិបាលកម្ពុជា ក្នុងការប្រយុទ្ធប្រឆាំងជំងឺកូវីដ-១៩ ប្រទេសកម្ពុជា បានក្លាយជាប្រទេសមួយក្នុងចំណោមប្រទេស ដែលមានសុវត្ថិភាពបំផុតក្នុងការមកទស្សនា ទោះបីនៅក្នុងអំឡុងពេលនៃការឆ្លងរាលដាលជំងឺកូវីដ-១៩ ។
ក្រសួងបានបញ្ជាក់ថា ចំណាត់ថ្នាក់នេះជាមោទនភាពជាតិមួយផ្សេងទៀត របស់ប្រទេសកម្ពុជា និងជាឱកាសដ៏ល្អក្នុងការផ្សព្វផ្សាយ” កម្ពុជា-ព្រះរាជាណាចក្រអច្ឆរិយៈ ផ្តល់ភាពកក់ក្តៅជូនដល់ភ្ញៀវទេសចរជាតិ និងអន្តរជាតិនៅគ្រប់កាលៈទេសៈទាំងអស់។
ជាមួយគ្នានោះក្រសួងទេសចរណ៍ បានចូលរួមអបអរសាទរយ៉ាងក្លៀវក្លា ចំពោះការជាប់ចំណាត់ថ្នាក់លេខ ១ លើពិភពលោក ក្នុងការប្រយុទ្ធប្រឆាំងនឹងជំងឺកូវីដ-១៩ របស់កម្ពុជា និងស្នើសុំការគាំទ្រ និងកិច្ចសហប្រតិបត្តិការពីគ្រប់ភាគីស្ថាប័នពាក់ព័ន្ធប្រតិបត្តិករទេសចរណ៍ ដែគូអភិវឌ្ឍន៍សាធារណជន និងប្រព័ន្ធផ្សព្វផ្សាយជាតិអន្តរជាតិក្នុងការផ្សព្វផ្សាយដំណឹងដ៏រីករាយនេះ ដល់ដៃគូពាក់ព័ន្ធទេសចរជាតិអន្តរជាតិទាំងអស់ នៅជុំវិញពិភពលោកថា“ កម្ពុជា ជាប្រទេសមួយក្នុងចំណោមប្រទេស ដែលមានសុវត្ថិភាពបំផុតក្នុងការមកទស្សនាក្នុងអំឡុងពេលរីករាលដាលនៃជំងឺកូវីដ-១៩”៕
