ខេត្តកែបៈ នៅព្រឹកថ្ងៃសុក ៩កើត ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២២ ខែមករា ឆ្នាំ២០២១ ឯកឧត្តម សោម ពិសិដ្ឋ សមាជិកយុវជនគណបក្សប្រជាជនកម្ពុជាថ្នាក់កណ្តាល និងជាប្រធានក្រុមការងារយុវជនគណបក្សខេត្តកែប អញ្ជើញជាអធិបតីអបអរការប្រកួតកីឡាទ្រីយ៉ាត្លុងជ្រើសរើសជើងឯកថ្នាក់ជាតិឆ្នាំ២០២០ នៅលើឆ្នេរខ្សាច់ដ៏ស្រស់បំព្រងនៃខេត្តកែប ។ ពិធីនេះត្រូវបានរៀបចំឡើងដោយសហព័ន្ធកីឡាទ្រីយ៉ាត្លុងកម្ពុជា សហការជាមួយរដ្ឋបាលខេត្តកែប ក្នុងគោលបំណងជ្រើសរើសកីឡាករ កីឡាការនីដែលមានសមត្ថភាពធ្វើការហ្វឹកហាត់សមបន្ត សម្រាប់ត្រៀមចូលរួមប្រកួតកីឡាស៊ីហ្គេមនៅប្រទេសវៀតណាម និងសម្រាប់ត្រៀមប្រកួតកីឡាស៊ីហ្គេមឆ្នាំ២០២៣ ដែលកម្ពុជាយើងនឹងធ្វើជាម្ចាស់ផ្ទះ ។ ក្នុងពិធីប្រកួតកីឡាទ្រីយ៉ាត្លុងជ្រើសរើសជើងឯកថ្នាក់ជាតិឆ្នាំ២០២០នេះ មានកីឡាករ កីឡាការនីជាតិ អន្តរជាតិមកពីបណ្តាលក្លឹបផ្សេងៗប្រមាណជាង ៥០រូប ចូលរួមប្រកួត ព្រមជាមួយការអញ្ជើញចូលរួមអបអរសាទរ និងទស្សនាកំសាន្តពីសំណាក់ឯកឧត្តម លោកជំទាវ យុវជន យុវនារី មន្រ្តីរាជការ ភ្ញៀវទេសចរជាតិ អន្តរជាតិ ជាច្រើនកុះករ ។
