ខេត្តកណ្តាល៖ ឯកឧត្តម នូវប៉េង ច័ន្ទតារា អភិបាលរងខេត្តកណ្ដាល បានបញ្ជាក់ថា សារាចរណែនាំលេខ ០១៥ គឺពិតជាមានសារៈសំខាន់ណាស់សម្រាប់រដ្ឋបាលខេត្តកណ្តាល មន្ទីរសុខាភិបាល និងរដ្ឋបាលក្រុង-ស្រុកក្នុងការគ្រប់គ្រង និងអនុវត្តថវិកាឆ្នាំ២០២១របស់ខ្លួន ប្រកបដោយប្រសិទ្ធភាព ដើម្បីផ្សារភ្ជាប់ទៅនឹងកម្មវិធីកែទម្រង់ហិរញ្ញវត្ថុ សាធារណៈរបស់រាជរដ្ឋាភិបាល។
ឯកឧត្តមបានបញ្ជាក់ដូច្នេះ នៅក្នុងកិច្ចប្រជុំផ្សព្វផ្សាយសារាចរណែនាំលេខ ០១៥ របស់ក្រសួងសេដ្ឋកិច្ច និងហិរញ្ញវត្ថុ ស្ដីពីការអនុវត្តច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ ២០២១ របស់រដ្ឋបាលថ្នាក់ក្រោមជាតិ កាលពីថ្ងៃទី ២៧ ខែមករា ឆ្នាំ២០២១ នៅសាលាខេត្តកណ្ដាល ដោយមានការចូលរួមពីមន្ទីរសេដ្ឋកិច្ច និងហិរញ្ញវត្ថុខេត្ត រតនាគារខេត្ត ទីចាត់ការហិរញ្ញវត្ថុខេត្ត នាយករដ្ឋបាលហិរញ្ញវត្ថុក្រុង-ស្រុក និងមន្ត្រីពាក់ព័ន្ធជាច្រើនរូប។
ឯកឧត្តមបានបន្តថា ក្នុងកម្មវិធីកំណែទម្រង់ហិរញ្ញវត្ថុសាធារណៈនេះ គឺរដ្ឋាភិបាលកម្ពុជាបានធ្វើការកំណែទម្រង់ សម្រេចបាន ៣ដំណាក់កាលរួចមកហើយ ពោលគឺដំណាក់កាលទី១ ផ្តោតទៅលើភាពទុកចិត្តបាននៃថវិកា ដំណាក់កាលទី២ គឺគណនេយ្យភាព ហិរញ្ញវត្ថុ និងដំណាក់កាលទី៣ គឺការផ្សារភ្ជាប់ថវិកាទោនឹងគោលនយោបាយ ដែលទើបនឹងបញ្ចប់ក្នុងឆ្នាំ ២០២០ ប្រកបដោយវឌ្ឍនភាព បើទោះបីជាស្ថិតក្នុងដំណាក់កាលនៃការឆ្លងរីករាលដាលនៃជំងឺកូវីដ-១៩ក៏ដោយ ហើយបច្ចុប្បន្ននេះរាជរដ្ឋាភិបាលកម្ពុជាបាននិងកំពុងឈានទៅអនុវត្តដំណាក់កាលទី៤ទៀត គឺគណនេយ្យភាពសមិទ្ធកម្ម ដែលនឹងត្រូវដាក់ឲ្យដំណើរការនាពេលខាងមុខ។
ឯកឧត្តមអភិបាលរងខេត្ត បានជម្រុញដល់រដ្ឋបាលក្រុង-ស្រុកទាំង១១ ត្រូវអនុវត្តឲ្យបានម៉ឺងម៉ាត់ចំពោះគោលការណ៍នានាដូចមានចែងក្នុងសារាចរណែនាំលេខ ០១៥នេះ សម្រាប់ការគ្រប់គ្រងថវិកាឆ្នាំ២០២១ របស់ខ្លួន អោយមានប្រសិទ្ធភាព ធានាដល់ការអភិវឌ្ឍ និងលើកកម្ពស់ដល់ វិស័យរដ្ឋបាល សេដ្ឋកិច្ច សង្គមកិច្ច នៅមូលដ្ឋានរបស់ខ្លួនឲ្យកាន់តែប្រសើរឡើង។
ក្នុងកិច្ចប្រជុំផ្សព្វផ្សាយនេះដែរ លោកស្រីខុន លក្ខិណា ប្រធានមន្ទីរសេដ្ឋកិច្ច និងហិរញ្ញវត្ថុខេត្តកណ្ដាល បានលើកទឹកចិត្តដល់រដ្ឋបាលក្រុង-ស្រុកនិងមន្ទីរសុខាភិបាលខេត្ត ត្រូវលើកឡើងជាបញ្ហាប្រឈមក៏ដូចជាចម្ងល់ផ្សេងៗ ដើម្បីទុកឲ្យមន្ត្រីជំនាញធ្វើការពន្យល់ និងបកស្រាយបំពេញបន្ថែម ដើម្បីទទួលបានចំណេះដឹងកាន់តែស៊ីជម្រៅ ធានាដល់ការអនុវត្តថវិការបស់រដ្ឋបាលខ្លួន ត្រឹមត្រូវស្របតាមនីតិវិធីច្បាប់ស្តីពីការគ្រប់គ្រងហិរញ្ញវត្ថុសាធារណៈរបស់ក្រសួងសេដ្ឋកិច្ច និងហិរញ្ញវត្ថុ។
