ខេត្តព្រះវិហារ ៖ ជនសង្ស័យដែលជាមេក្លោងយ៉ាងសកម្ម នៅក្នុងការចែកចាយថ្នាំញៀន ប្រចាំភូមិសាស្ត្រស្រុកជាំក្សាន្ត នៃខេត្តព្រះវិហារ ត្រូវបានកម្លាំងជំនាញកងរាជអាវុធហត្ថស្រុកជាំក្សាន្ត បើកប្រតិបត្តិការឆ្មក់ចុះបង្ក្រាបបានជាបន្តបន្ទាប់ ស្ថិតក្នុងភូមិស្វាយ ឃុំរំដោះស្រែ ស្រុកជាំក្សាន្ត ខេត្តព្រះវិហារ។
នៅក្នុងហេតុការណ៍ឆ្មក់ចុះបង្ក្រាបនេះ បានប្រើប្រាស់រថយន្ដចំនួន២គ្រឿង កំលាំង៧នាក់ ដឹកនំាដោយលោកវរសេនីយ៍ត្រី ពេជ្រ សុភី មេបញ្ជាការស្នាក់ការមូលដ្ឋានកងរាជអាវុធហត្ថស្រុកជាំក្សាន្ត កាលពីថ្ងៃទី២០ ខែ តុលា ឆ្នាំ២០១៩ ។
លោកអនុសេនីយ៍ឯក ជុន បូរ៉ា មេបញ្ជាការរងទទួលបន្ទុកការងារព្រហ្មទណ្ឌ បានឲ្យដឹងថា នៅវេលាម៉ោង១២.៥០នាទី ថ្ងៃទី២០ ខែតុលា ត្រង់ចំនុចUTM(485257-1572311)ស្ថិតក្នុងភូមិស្វាយ ឃុំរំដោះស្រែ ស្រុកជាំក្សាន្ត ខេត្តព្រះវិហារ កំលាំងបានចុះបង្ក្រាបករណីចែកចាយ រក្សាទុក និងប្រើប្រាស់នូវសារធាតុញៀន ដោយឃាត់ខ្លួនជនសង្ស័យចំនួន២នាក់ ទី១ឈ្មោះ ហម ណែត ភេទប្រុស អាយុ២៤ឆ្នាំ មុខរបរមិនពិតប្រាកដ រស់នៅភូមិរលំថ្ម ឃុំរំដោះស្រែ ស្រុកជាំក្សាន្ត ខេត្តព្រះវិហារ ទី២ឈ្មោះ កន ចាវ ភេទប្រុស អាយុ២៣ឆ្នាំ មុខរបរមិនពិតប្រាកដ រស់នៅភូមិសែនរុងរឿង១ ឃុំទឹកក្រហម ស្រុកជាំក្សាន្ត ខេត្តព្រះវិហារ។
ដកហូតវត្ថុតាងបានរួមមាន៖ ១.ថ្នាំញៀន(ម៉ាទឹកកក)ចំនួន03កញ្ចប់ ទំងន់១២,២១ក្រាម ២.ទូរស័ព្ទដៃចំនួន២គ្រឿង ៣.ម៉ូតូម៉ាកExciter ពណ៍ទឹកប៉ិច គ្មានស្លាកលេខចំនួន១គ្រឿង ៤.លុយខ្មែរចំនួន២៧០០០រៀល ៥.កាបូបដាក់លុយចំនួន១ រួមនឹងថង់សំរាប់ច្រកគ្រឿងញៀនមួយចំនួនទៀត ។
លោកអនុសេនីយ៍ឯក ជុន បូរ៉ា បានបញ្ជាក់បន្ថែមថា ក្រោយពីបានស្តាប់ចំលើយបំភ្លឺរបស់ជនសង្ស័យឈ្មោះ ហម ណែត ថាថ្នាំញៀនទាំងបីកញ្ចប់ខាងលើ ខ្លួនបានទិញពីឈ្មោះ ជិន រដ្ឋា ភេទប្រុស អាយុ២៣ឆ្នាំ រស់នៅភូមិវាលធំ ឃុំជាំក្សាន្ត ស្រុកជាំក្សាន្ត ខេត្តព្រះវិហារ ក្នុងតំលៃចំនួន៣០០ដូល្លា ។ លោកបន្តថា រហូតដល់វេលាម៉ោង១៤,៥៩នាទី ថ្ងៃខែឆ្នាំដដែល កំលាំងសមត្ថកិច្ចជំនាញបានបន្តចុះប្រតិបត្តិការឆែកឆេរ និងឃាត់ខ្លួនឈ្មោះជិន រដ្ឋា ដោយធ្វើការដកហូតវត្ថុតាងមួយចំនួនដូចជា៖ លុយខ្មែរចំនួន៦០០០០០០រៀល(ប្រាំមួយលានរៀល) លុយដូល្លាចំនួន២១៥ដូល្លា ទូរស័ព្ទដៃ IphoneX (ពណ៍មាសខូចដោយជនសង្ស័យបានបោក នៅពេលសមត្ថកិច្ចកំពុងធ្វើការបង្រ្កាប)ចំនួន១គ្រឿង ត្រង់ចំនុច UTM(491081-1572043) ស្ថិតក្នុងភូមិឃុំខាងលើ ។
ជាមួយគ្នានោះលោកអនុសេនីយ៍ឯក ជុន បូរ៉ាមេបញ្ជាការរងទទួលបន្ទុកការងារព្រហ្មទណ្ឌ ក៏បានបញ្ជាក់ឲ្យដឹងដែរថា បច្ចុប្បន្នជនសង្ស័យ និងវត្ថុតាងខាងលើ ត្រូវបានកំលាំងជំនាញកងរាជអាវុធហត្ថស្រុកកំពុងកសាងសំណុំរឿង ដើម្បីធ្វើការបញ្ជូនបន្តទៅកងរាជអាវុធហត្ថខេត្តព្រះវិហារ ចាត់ការបន្តតាមនិតិវិធី ៕
