ខេត្តព្រះសីហនុ ៖ នាថ្ងៃទី៣ ខែកុម្ភៈ ឆ្នាំ២០២១នេះ លោក ឡា ប៊ុនហួន អាជ្ញាសាលា នៃសាលាដំបូងខេត្តព្រះសីហនុ បានចេញសេចក្តីជម្រាបជូនជាលើកទី៣ដល់ ឈ្មោះឡុច ឡូច, កៅ ហួរ, យឹម មុំ និងឈ្មោះ អេង វ៉ាន់ និងតិតយជនព្រមទាំងអ្នកពាក់ព័ន្ធទាំងអស់ ដែលកំពុងតែស្នាក់នៅ ឬធ្វើការទាំងឡាយក្នុងទីតាំងនេះ ត្រូវរុះរើផ្ទះ និងសំណង់ផ្សេងៗ ព្រមទាំងរើឥវ៉ាន់ សម្ភារៈទាំងអស់ដែលជាកម្មសិទ្ធិរបស់ខ្លួនចេញឱ្យអស់ ព្រមទាំងចាកចេញពីដីដែលមានប័ណ្ណសម្គាល់សិទ្ធិកាន់កាប់ប្រើប្រាស់ដីធ្លីលេខ B20666 ចុះថ្ងៃទី០៩ ខែសីហា ឆ្នាំ១៩៩៤ ស្ថិតនៅភូមិ៤ សង្កាត់អូរត្រេះ ខណ្ឌស្ទឹងហាវ ខេត្តព្រះសីហនុ អោយបានមុនថ្ងៃទី២២ ខែកុម្ភៈ ឆ្នាំ២០២១ ឬប្រសិនបើមានឯកសារផ្លូវច្បាប់ផ្សេងៗ សូមសហកូនបំណុល និងតតិយជនទាំងអស់ មកជួប អាជ្ញាសាលា នៃសាលាដំបូងខេត្តព្រះសីហនុ ដោយផ្ទាល់ នៅថ្ងៃទី១៨ ខែកុម្ភៈ ឆ្នាំ២០២១ វេលាម៉ោង៩ៈ០០នាទីព្រឹក នៅបន្ទប់អាជ្ញាសាលា នៃសាលាដំបូងខេត្តព្រះសីហនុ។
សូមបញ្ជាក់ថា៖ ទីតាំងដីធ្លីនេះស្ថិតនៅក្នុងភូមិ៤ សង្កាត់អូរត្រេះ ខណ្ឌស្ទឹងហាវ ខេត្តព្រះសីហនុ គឺជាដីដែលមានជម្លោះរវាងលោក ប៉ុន សារឿន និងប្រជាជនជាច្រើនគ្រួសារ ដែលកំពុងស្នាក់នៅ និងអាស្រ័យផលជាយូរឆ្នាំណាស់មកហើយ។
ហេតុនេះហើយប្រជាជនជាង១០០គ្រួសារ មិនព្រមទទួលនូវលិខិតនេះឡើយ ដោយពួកគាត់បានដាក់ពាក្យស្នើសុំដល់ មន្ទីរដែនដី នគររូបនីយកម្មនិងសំណង់ ខេត្តព្រះសីហនុ, រដ្ឋបាលខេត្តព្រះសីហនុ និងសាលាដំបូងខេត្តព្រះសីហនុ មេត្តាចុះវាស់វែងដីធ្លីដែលមានទំនាស់ខាងលើនេះឡើងវិញ ដោយសង្ស័យលោក ប៉ុន សារឿន អតីតអនុរដ្ឋលេខាធិការក្រសួងបរិស្ថាន កំពុងប្រើប្រាស់ប័ណ្ណកម្មសិទ្ធិកាន់កាប់ប្រើប្រាស់ដីធ្លីឆ្នាំ១៩៩៤ មិនប្រក្រតី មករំលោភបំពានយកដីដែលជាកម្មសិទ្ធិរបស់ប្រជាពលរដ្ឋ។
