ខេត្តព្រះសីហនុ ៖ តំបន់ប្រតិបត្តិការសឹករងខេត្តព្រះសីហនុ បានរៀបចំពិធីបើកវគ្គហ្វឹកហ្វឺនបំប៉នយុទ្ធវិធីថ្មើរជើង ថ្នាក់កង អនុសេនាតូច កងអនុសេនាធំ ដល់នាយទាហាន នាយទាហានរង និងពលទាហាន តំបន់ប្រតិបត្តិការសឹករងខេត្តព្រះសីហនុ ដោយមានការចូលរួមពីឯកឧត្តមឧត្តមសេនីយ៍ឯក យឿង សុខុន មេបញ្ជាការរងកងទ័ពជើងគោក មេបញ្ជាការយោធភូមិភាគទី៣ រួមជាមួយឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ និងមន្ត្រីគ្រប់ស្ថាប័ន នាយទាហាន នាយទាហានរង និងពលទាហាន ប្រមាណជាង១៤០នាក់ ពិធីបានធ្វើឡើងនៅព្រឹកថ្ងៃទី២២ ខែតុលា ឆ្នាំ២០១៩។
ឆ្លៀតក្នុងឱកាសនោះឯកឧត្តម ឧត្តមសេនីយ៍ត្រី នូវ សំអុល មេបញ្ជាការតំបន់ប្រតិបត្តិការសឹករងខេត្តព្រះសីហនុបានធ្វើបទស្វាគមន៍ និងអានផែនការហ្វឹកហ្វឺនឆ្នាំ២០១៩ តំបន់ប្រតិបត្តិការសឹករងខេត្តព្រះសីហនុមានកិត្តិយសដ៏ឧត្តុង្គឧត្តមបំផុតចំពោះវត្តមានដ៏ខ្ពង់ខ្ពស់ ដែលបានទទួលបដិសណ្ឋារកិច្ចឯកឧត្តមឧត្តមសេនីយ៍ឯក យឿង សុខុន មេបញ្ជាការរងកងទ័ពជើងគោក មេបញ្ជាការយោធភូមិភាគទី៣ និងឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ ដែលបានឆ្លៀតពេលដ៏មមាញឹក នឹងមានតម្លៃដល់វិសេសវិសាល អញ្ជើញជាគណៈអធិបតីក្នុងពិធីបើកវគ្គហ្វឹកហ្វឺនបំប៉នយុទ្ធវិធីថ្មើរជើង របស់អង្គភាពតំបន់ប្រតិបត្តិការសឹករងខេត្តព្រះសីហនុឆ្នាំ២០១៩។
ហើយក្នុងនោះឯកឧត្តម ឧត្តមសេនីយ៍ត្រី នូវ សំអុល មេបញ្ជាការតំបន់ប្រតិបត្តិការសឹករងខេត្តព្រះសីហនុ បានអាន ផែនការហ្វឹកហ្វឺនប្រចាំឆ្នាំ២០១៩ របស់មេបញ្ជាការកងទ័ពជើងគោក និងការយកចិត្តទុកដាក់ខ្ពស់ក្នុងការដាក់បទបញ្ជាត្រួតពិនិត្យ ក្រើនរំលឹក ពីសំណាក់ឯកឧត្តមមេបញ្ជាការយោធភូមិភាគ៣ ក្នុងការងារហ្វឹកហ្វឺនបំប៉ន ដែលនាយទាហាន នាយទាហានរង និងពលទាហានគ្រប់បណ្ដាអង្គភាពចំណុះយោធភូមិភាគ។ ក្នុងនោះអង្គភាពយើងខ្ញុំក៏បានចូលរួមចំណែកយ៉ាងសកម្ម ក្នុងការកសាង ធនធានមនុស្សក្នុងជួរកងយោធពលខេមរភូមិន្ទ។ ហើយកន្លងមកតែងតែបើកវគ្គជាបន្តបន្ទាប់ ដោយក្រោមការចង្អុលបង្ហាញរបស់ថ្នាក់លើតាមលំដាប់ថ្នាក់ ដូចជាហ្វឹកហ្វឺនពីថ្នាក់ បុគ្គលដល់ពួក ពីថ្នាក់ពួកដល់ក្រុម ពីថ្នាក់ក្រុមដល់កងអនុសេនាតូចកងអនុសេនាធំ និងពីថ្នាក់ វីរៈសេនាតូចផងដែរ។ ទន្ទឹមនឹងដំណើរការហ្វឹកហ្វឺននៅក្នុងអង្គភាពអង្គភាពយើងខ្ញុំ ក៏បានចាត់តាំងបញ្ជូននាយទាហាន នាយទាហានរង និងពលទាហានដើម្បីទៅហ្វឹកហ្វឺនរៀនសូត្រតាមបណ្ដាលសាលាជំនាញទាំងក្នុង និងក្រៅប្រទេសដើម្បីពង្រឹងពង្រីកចំណេះដឹងនិងសមត្ថភាពដើម្បីបំរើឲ្យប្រយោជន៍ មានប្រសិទ្ធភាពខ្ពស់ ។ ស្របពេលនឹងភារកិច្ចហ្វឹកហ្វឺន បំប៉នប្រចាំឆ្នាំអង្គភាពបានយកចិត្តទុកដាក់ខ្ពស់ក្នុងកិច្ចការកសាងអង្គភាពឲ្យបាន សមស្របទៅតាម ការបំប៉នយុទ្ធវិធីដល់យោធិនគ្រប់ៗរូប។
ក្នុងនោះផងដែរឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ បានមានមតិសំណេះសំណាលនិងផ្ដាំផ្ញើ ទៅដល់នាយទាហាន នាយទាហានរង និងពលទាហាន ក្នុងពិធីបើកវគ្គហ្វឹកហ្វឺនបំប៉នយុទ្ធនវិធីថ្មើរជើង ហើយក្នុងនាមយើងជាទាហាន ត្រូវការពារជាតិមាតុភូមិរបស់យើង ដោយក្រោមការដឹកនាំដ៏ឈ្លាតវៃរបស់សម្ដេចអគ្គសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងនោះផងដែរឯកឧត្តមអភិបាលខេត្តក៏បានចូលរួមឧបត្ថម្ភជាថវិកាចំនួន ៥លានរៀល ជូនទៅដល់តំបន់ប្រតិបត្តិការសឹករងខេត្តព្រះសីហនុ។
ហើយជាចុងក្រោយឯកឧត្តម ឧត្តមសេនីយ៍ឯក យឿង សុខុន មេបញ្ជាការរងកងទ័ពជើងគោក មេបញ្ជាការយោធភូមិភាគទី៣ ក៏បានមានមតិសំណេះសំណាលនិងផ្ដាំផ្ញើទៅដល់ នាយទាហាន នាយទាហានរង និងពលទាហានក្នុងពិធីបើកវគ្គហ្វឹកហ្វឺនបំប៉នយុទ្ធនវិធីថ្មើរជើង ថ្នាក់កងអនុសេនាតូច កងអនុសេនាធំប្រចាំឆ្នាំ២០១៩ តំបន់ប្រតិបត្តិការសឹករងខេត្តព្រះសីហនុ បានមានប្រសាសន៍ថា ត្រូវពង្រឹងរបៀបរៀបរយដល់នាយទាហាន នាយទាហានរង និងពលទាហាន ដើម្បីបង្កើនការយល់ដឹងបន្ថែមទៀតព្រមទាំងកសាងបាននូវកងទ័ពមួយដែលមានគុណភាពនិងមានសមត្ថភាពក្នុងការបំពេញការងារបម្រើជូនជាតិមាតុភូមិនិងប្រជាពលរដ្ឋ។
ហើយក្នុងនាមយើងជាកងទ័ព ទោះជាស្ថិតក្នុងកាលៈទេសៈណាក៏ដោយត្រូវគោរពអោយបាននូវវិន័យរបស់កងទ័ពគោរពបទបញ្ជាឱ្យបានម៉ឺងម៉ាត់របស់ថ្នាក់លើដែលបានដាក់ចុះ។ ក្នុងនោះឯកឧត្តមក៏បានសូមអោយសិក្ខាកាម ទាំងអស់ត្រូវខិតខំយកចិត្តទុកដាក់ហ្វឹកហ្វឺនរៀនសូត្រឱ្យបានខ្ជាប់ខ្ជួនស្ដាប់ការបង្រៀន ការពន្យល់បកស្រាយរបស់យោធាចារ្យឱ្យបានគ្រប់ពេលវេលា គោរពពេលវេលារៀនសូត្រគោរពបទបញ្ជាផ្ទៃក្នុងរបស់សាលានិងវិន័យ ក្នុងនាមយើងជាកងទ័ពត្រូវពុះពារនិងជំនះរាល់ការលំបាកទាំងឡាយដើម្បីសម្រេចនូវលទ្ធផលរៀនសូត្រឱ្យបានល្អ។ ហើយត្រូវពង្រឹងសាមគ្គីភាពឯកភាពផ្ទៃក្នុងឲ្យបានទូលំទូលាយបំផុត ក្នុងការស់នៅមានអនាម័យល្អទាំងកន្លែងសិក្សារៀនសូត្រកន្លែងហូបចុកគោរពសិទ្ធិគ្នាទៅវិញទៅមកនឹងរក្សាទ្រព្យសម្បត្តិរបស់អង្គភាពឲ្យបានគង់វង្ស ។
ជាមួយគ្នានោះឯកឧត្តមគណៈអធិបតីក៏បានបញ្ជាក់បន្ថែមថា កងទ័ពទាំងអស់ត្រូវត្រៀមកម្លាំងអន្តរាគមន៍កម្រិតខ្ពស់មួយរយភាគរយនៃចំនួនទ័ពតាមផែនការនិងបទបញ្ជាថ្នាក់លើនិងត្រៀមខ្លួនជានិច្ចក្នុងការទទួលបទបញ្ជារបស់ថ្នាក់លើក្នុងការទប់ស្កាត់និងវាយបំបាក់នៅរាល់ឧបាយកលញុះញង់ បង្កអសន្តិសុខរបស់ឧទ្ទាមក្រៅច្បាប់ ត្រូវថែរក្សាសុខសន្តិភាពស្ថេរភាពនយោបាយជូនជាតិ និងប្រជាពលរដ្ឋកសាងសេដ្ឋកិច្ច ៕
