ប្រភពពីមន្ត្រីគយនៅខេត្តព្រះសីហនុ បានឲ្យដឹងថា បច្ចុប្បន្នទំនិញដែលឈ្មួញធំៗសម្រុកនាំចូលតាមច្រកកំពង់ផែកែវផុស មានដូចជាស៊ីម៉ងត៍ គ្រឿងសំណង់ ទំនិញចាប់ហួយ និងស្រាថ្លៃៗ ស្រាបៀរ គ្រឿងបន្លាស់រថយន្តនិងគ្រឿងបន្លាស់ម៉ូតូជាដើមដោយបង់ពន្ធត្រឹម៣៥ទៅ៤០ភាគរយប៉ុណ្ណោះ។ ក្រៅពីនេះគឺឈ្មួញឃុបឃិតបែងចែកផលប្រយោជន៍លើតុក្រោមតុជាមួយលោក ហេង សំហៃ យ៉ាងរលូនព្រោះចាប់តាំងពីលោក ហេង សំហៃ ទទួលបានតំណែងជាប្រធានការិយាល័យគយកំពង់ផែកែវផុស គឺគិតតែពីរឿងប្រមូលលុយធ្វើមានធ្វើបានផ្ទាល់ខ្លួនយ៉ាងពេញបន្ទុក។ ឈ្មួញធំៗដែលនាំចូលទំនិញតាមកំពង់ផែកែវផុស មានដូចជាឈ្មោះ ធី ឈ្មោះ ប៊ុន ឈ្មោះ ម៉េង ឈ្មោះ ចែស៊ី និងឈ្មោះ ចែរ៉ា ជាដើមហើយឈ្មួញទាំងនេះគឺជាប្រភពចំណូលដ៏សំខាន់របស់លោក ហេង សំហៃ ដែលកំពុងល្បីខាងពុករលួយ។
ប្រភពដែលស្និទ្ធនឹងលោក ហេង សំហៃ បានបង្ហើបឲ្យដឹងថា ទំនិញដែលឈ្មួញដូចរៀបរាប់ឈ្មោះខាងលើនេះនាំជូលតាមច្រកកំពង់ផែកែវផុស ត្រូវបានផ្ទេរចេញពីកប៉ាល់ឬទូកធំៗដាក់រថយន្តយីឌុបចំណុំរាប់សិបតោនដឹកចេញទៅរាជធានីភ្នំពេញ ដោយបង់ពន្ធយ៉ាងច្រើន៤០ភាគរយ។ មិនតែប៉ុណ្ណោះលោក ហេង សំហៃ បានឃុបឃិតជាមួយឈ្មួញកែឯកសារបន្លំប្រភេទទំនិញផងដែរ ដើម្បីទទួលបានផលប្រយោជន៍ផ្ទាល់ខ្លួន ហើយមិនគិតពីបាត់បង់ចំណូលពន្ធរដ្ឋនោះទេ ព្រោះលោក ហេង សំហៃ អាងមានខ្នងបង្អែករឹងមាំនៅក្នុងអគ្គនាយកដ្ឋានគយនិងរដ្ឋាករកម្ពុជា។ ដូច្នេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក៏ដូចជាលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ គួរពិនិត្យឡើងវិញជាបន្ទាន់ទៅលើទង្វើមិនប្រក្រតីនិងរឿងអាស្រូវពុករលួយរបស់លោក ហេង សំហៃ មេគយច្រកកែផុស ខ្លះផងដើម្បីកុំឲ្យមន្ត្រីគយរូបនេះប្រើតួនាទីនិងអំណាចធ្វើអ្វីៗស្រេចតែអំពើចិត្តទៀត៕
