ដើម្បីបង្ការ ការពារ និងទប់ស្កាត់ជំងឺកូវីដ១៩ កុំឱ្យរីករាលដាលនៅតាមសហគមន៍ អភិបាលខេត្តកែប បានណែនាំដល់មន្ត្រីគ្រប់ជំនាញ ឱ្យបន្តសហការ បង្ការ ការពារ កុំឱ្យជំងឺ ដ៏កាចសាហាវនេះ រីករាលដាលក្នុងដែនសហគមន៍របស់យើងឱ្យសោះ។
ថ្លែងនៅក្នុងឱកាសសំណេះសំណាលជាមួយអាជ្ញាធរក្រុង ស្រុក កងម្លាំងប្រដាប់ អាវុធគ្រប់អង្គភាព និងមន្ត្រីបុគ្គលិកសុខាភិបាល កាលពីព្រឹកថ្ងៃទី២៦ ខែមីនា ឆ្នាំ២០២១ ឯកឧត្តម សោម ពិសិដ្ឋ អភិបាលខេត្តកែប បានបញ្ជាក់ថា ថ្វីត្បិតកាលពី ប៉ុន្មានថ្ងៃមុន ខេត្តកែបមានស្ត្រីអាយុ៣៤ឆ្នាំម្នាក់មកពីខេត្តព្រះសីហនុ មានវិជ្ជមានកូវីដ១៩ ប៉ុន្តែអ្នកពាក់ ព័ន្ធ៥នាក់ទៀត ក្រោយពីធ្វើតេស្តលើកទី១ លទ្ធផលគឺសុទ្ធតែអវិជ្ជមានទាំងអស់។
ឯកឧត្តមអភិបាលខេត្តកែប បានបន្ថែមទៀតថា ដូច្នេះដើម្បីបង្ការ ការពារកុំឱ្យមាន ការរីករាលដាលជំងឺកូវីដ១៩ នៅក្នុងសហគមន៍នីមួយៗ ចាំបាច់មន្ត្រីគ្រប់ជំនាញត្រូវតែ សហការគ្នា បន្តធ្វើការផ្សាយរាល់វិធានការចាំបាច់ទាំងឡាយ ពិសេសវិធានការប្រយុទ្ធ ប្រឆាំងនឹងជំងឺកូវីដ១៩ និងអនុវត្តតាមការណែនាំរបស់ក្រសួងសុខាភិបាល និងអនុវត្តន៍ តាម អនុសាសន៍របស់សម្តេច តេជោ ហ៊ុន សែន ដែលជាវិធានការដ៏សំខាន់ គឺ”៣ការពារ ៣កុំ”។
សូមជម្រាបដែរថា បន្ទាប់ពីព្រឹត្តិការណ៍សហគមន៍ ២០កុម្ភៈ រដ្ឋបាលខេត្តកែប បានណែនាំដល់មន្ត្រីក្រោមឱវាទ ធ្វើការផ្សព្វផ្សាយ និងអនុវត្តន៍វិធានការរបស់ក្រសួង សុខាភិបាល និងដាក់រនាំងដើម្បីត្រួតពិនិត្យ វាស់កម្តៅ លាងសម្អាតដៃ នឹងអាល់កុល ដល់អ្នកធ្វើដំណើរឆ្លងកាត់ក្នុងភូមិសាស្រ្តខេត្តកែប ដោយការត្រួតពិនិត្យនេះបានអនុវត្តន៍ ឡើងលើ២៤ម៉ោង ដែលមាន៣គោលដៅរួមមាន៖ គោលដៅក្រុងកែប ចំណុចមុខវិទ្យាល័យ ប៊ុន រ៉ានី ហ៊ុនសែន ចរិយាវង្ស (ផ្លូវជាតិលេខ៣៣) និងគោលដៅស្រុកដំណាក់ចង្អើរ មាន ២កន្លែង គឺត្រង់ចំណុច រោងចក្រពូចិន(ផ្លូវជាតិលេខ៣៣) និងចំណុចស្ពានដែក (ផ្លូវជាតិលេខ ១៣៣២)។
ជាមួយគ្នានេះបន្ទាប់ពីសំណេះសំណាល សួរសុខទុក្ខ ដល់កម្លាំងចម្រុះ នៅតាមគោល ដៅនីមួយៗរួចមក រដ្ឋបាលខេត្តកែប បានពាំនាំនូវអំណោយរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ក្នុងនោះមានគ្រឿងឧបភោគ បរិភោគ និងសម្ភារ សម្រាប់បង្ការការពារជំងឺកូវីដ ១៩ មានម៉ាស ជែល អាល់កុល អង្ករ និងថវិកា មួយចំនួនផងដែរ៕
