ខេត្តកំពង់ចាម ៖ នាថ្ងៃទី៣០ ខែមីនា ឆ្នាំ២០២១ លោក តឹកសេង សុន្ថន ប្រធាន ស.ស.យ.ក ស្រុកស្រីសន្ធរ បានដឹកនាំក្រុមយុវជន ស.ស.យ.ក ស្រុកចូលរួមជាមួយរដ្ឋបាលស្រុកដឹកនាំដោយ លោក ស៊ីម គង់ អភិបាលនៃគណៈអភិបាលស្រុកស្រីសន្ធរ និងជាប្រធានគណៈកម្មាការទប់ស្កាត់នឹងជំងឺកូវីដ-១៩ ស្រុក អភិបាលរងស្រុក មន្ត្រីរដ្ឋបាលសាលាស្រុក កម្លាំងប្រដាប់អាវុធ រដ្ឋបាលឃុំព្រែកពោធិ៍ និងរដ្ឋបាលឃុំមានជ័យ សរុបចំនួន ៤៣នាក់ ចុះអប់រំផ្សព្វផ្សាយអំពីវិធានការទប់ស្កាត់ និងការពារការឆ្លងរាតត្បាតនៃជំងឺកូវីដ-១៩ ជូនដល់ប្រជាពលរដ្ឋធ្វើដំណើរមកផ្សារ និងអាជីវករលក់ដូរក្នុងផ្សារព្រែកពោធិ៍ ឃុំព្រែកពោធិ៍ និងផ្សារមាន់ដប់ ឃុំមានជ័យ ស្រុកស្រីសន្ធរ ដែលមានអ្នកចូលរួម សរុបប្រមាណ១០៥៣នាក់ ។
ក្រុមការងារ បានចាក់ផ្សាយសាររបស់សម្តេចតេជោ ហ៊ុន សែន និងសារអប់រំនានារបស់ក្រសួងសុខាភិបាលតាមឧគ្ឃោសនស័ព្ទ ហើយបានអនុវត្តគម្លាតសុវត្ថិភាពបុគ្គល ធ្វើការអប់រំផ្សព្វផ្សាយ អំពីវិធានការទប់ស្កាត់ និងការការពារការរាតត្បាតនៃជំងឺកូវីដ-១៩ តាមរយៈនៃការបង្ហាញពីការពាក់ម៉ាស់, របៀបលាងសំអាតដៃអោយបានត្រឹមត្រូវនិងញឹកញាប់ ហើយបានអំពាវនាវដល់ប្រជាពលរដ្ឋ ត្រូវបង្កើនការប្រុងប្រយ័ត្នការពារខ្លួនអោយបានជាប្រចាំ ពិសេសចូលរួមអនុវត្តអោយបានខ្ជាប់ខ្ជួននូវវិធានការ ” ៣ការពារ, ៣កុំ និងព្រមទាំងសារអប់រំនានារបស់ក្រសួងសុខាភិបាល ដើម្បីបង្ការ ទប់ស្កាត់ការឆ្លងរាលដាលនៃជម្ងឺកូវីដ-១៩ចូលក្នុងសហគមន៍ ។
ក្នុងការងារផ្សព្វផ្សាយនេះ ក្រុមការងារ បានប្រើប្រាស់ទឹកអាល់កុលចំណុះ៣០ml ចំនួន៣០០ដប ចែកម៉ាស់ចំនួន៣៥០០ ម៉ាស់, ចែកខិតប័ណ្ណផ្នត់ចំនួន ១០០សន្លឹក និងប័ណ្ណប្រកាសខ្នាតតូច ចំនួន៥០សន្លឹក ដល់ អង្គភាព ការិយាល័យចំណុះសាលាស្រុក រដ្ឋបាលឃុំ និង យុវជន ស.ស.យ.ក ស្រុក និងប្រជាពលរដ្ឋ ដែលជាអំណោយរបស់ក្រុមហ៊ុន បូរី ប៉េង ហួត គ្រុប ។
ព្រឹកថ្ងៃដដែល ក្រុមការងារ ស.ស.យ.ក ស្រុកជើងព្រៃ ដឹកនាំដោយលោក យន់ ឈុនលាង បានបោះពុម្ព ខិត្តបណ្ណ (៣កុំ ៣ការពារ ) ចំនួន១០០សន្លឹក ចែកម៉ាស់ ចំនួន ២០០ម៉ាស់ និងផ្សព្វផ្សាយដល់ប្រជាពលរដ្ឋចុះឈ្មោះចាក់វ៉ាក់សំាងកូវីដ-១៩ដោយស្ម័គ្រចិត្ត ។ ម៉ាសដែលចែកជូនថ្ងៃនេះជាអំណោយរបស់ឯកឧត្តម ឣ៊ុន ចាន់ដា ឣភិបាលនៃគណៈអភិបាលខេត្តកំពង់ចាម តាមរយៈឯកឧត្តម ហាន កុសល ប្រធាន ស.ស.យ.ក ខេត្តកំពង់ចាមដល់ប្រជាពលរដ្ឋ នៅឃុំសូទិប និងឃុំផ្តៅជុំ ស្រុកជើងព្រៃ ៕
