ខេត្តកណ្តាល (ក្រុងតាខ្មៅ)៖ អាជីវករលក់ដូរ នៅផ្សារបណ្តោះអាសន្ន សរុប៣៩៨នាក់ ក្រោយពីយកសំណាក ធ្វើតេស្តរកមេរោគកូវីដ-១៩ គឺពួកគាត់ទាំងអស់នោះ គឺទទួលបានលទ្ធផល អវិជ្ជមានទាំងអស់គ្នា តាមរយៈការធ្វើតេស្តជាមួយឧបករណ៍RAPID TEST ដែលបង្ហាញភ្លាមៗ នូវលទ្ធផល វិជ្ជមានឬអវិជ្ជមានក្នុងអំឡុងវង្វង់១០ឬ១៥នាទីប៉ុណ្ណោះ។ នេះបើតាមការអោយដឹងពីលោក រស់ ឡង់ឌី ប្រធានការិយាល័យព័ត៌មានទូរទស្សន៍ជាតិខេត្តកណ្តាល ដែលប្រចាំការនៅទីតាំង ផ្ទាល់រាយការណ៍តាមប្រព័ន្ធ តេឡេក្រាមនៅវេលាម៉ោង១០ៈ០០នាទីយប់ថ្ងៃទី១៩ ខែមេសា ម្សិលមិញនេះ។
គួរបញ្ជាក់ថា៖ ការប្រមូលយកបងប្អូន អាជីវករលក់ដូរ៣៩៨នាក់ យកសំណាកធ្វើតេស្តរកមេរោគកូវីដ-១៩ នាពេលនេះ បន្ទាប់ពីក្រុមគ្រូពេទ្យបានរកឃើញ បងប្អូនចំនួន១១នាក់ ពិនិត្យឃើញថា បានឡើងកំដៅលើសពី៣៧អង្សាសេ។
ក្រោយពីធ្វើតេស្តបងប្អូនរួចហើយ ប្រាកដថាអវិជ្ជមានកូវីដ-១៩ អាជ្ញាធរក្រុងតាខ្មៅ និងប្រគល់លិខិតបញ្ជាក់អំពីសុខភាពជូនភ្លាមៗ នៅកន្លែងយកសំណាកនេះតែម្តង និងត្រូវអនុញ្ញាត្តអោយចូលលក់នៅក្នុងផ្សារនេះជាប្រក្រតីឡើងវិញ៕ ដកស្រង់ពីផេកផ្លូវការរដ្ឋបាលខេត្តកណ្តាល
