កណ្តាល៖លោកអនុសេនីយ៍ឯកអ៊ុនសំអាតអត្តលេខ៦៥១៤៤អាយុ៣៥ឆ្នាំជាមន្រ្តីនៅការិយាល័យបច្ចេកទេសនិងវិទ្យាសាស្រ្តនៃស្នងការដ្ឋាននគរបាលខេត្តកណ្តាលបានបែកធ្លាយសំឡេងអួតក្អេងក្អាងថា«១អាទិត្យធ្វើការតែមួយថ្ងៃទេ» និងពាក់ព័ន្ធករណីយកកាំភ្លើងបាញ់ឆ្កែចំនួន៣គ្រាប់នោះឥឡូវនេះត្រូវបានលោកស្នងការខេត្តកណ្តាលស្នើសុំគោលការណ៍ទៅក្រសួងមហាផ្ទៃហើយដើម្បីអនុវត្តវិន័យកងកម្លាំងនគរបាលជាតិ។លោកឧត្តមសេនីយ៍ទោឈឿនសុចិត្តស្នងការនគរបាលខេត្តកណ្តាលថ្លែងប្រាប់នៅថ្ងៃទី២៤ខែឧសភាឆ្នាំ២០២១នេះថាករណីនេះគឺបាន«ស្នើគោលការណ៍ទៅក្រសួងហើយអនុវត្តវិន័យកងកម្លាំងនគរបាលជាតិ» ។
លោកអនុសេនីយ៍ឯកអ៊ុនសំអាតនិយាយថា«អ្នកខ្លះយាមទាំងយប់ទាំងថ្ងៃមិនមែនដូចអញ១អាទិត្យធ្វើការតែ១ថ្ងៃទេរកស៊ី៦ថ្ងៃព្រលឹមឡើងមកស្អាងល្ងាចឡើងទៅតាខ្មៅវិញ» ។ក្រោយពីទទួលបានព័ត៌មាននេះហើយឃើញថាអ្នកលេងFacebook មួយចំនួនចោទជាសំណួរថា«តើលោកប៉ូលិសអ៊ុនសំអាតគួរបន្តធ្វើជាប៉ូលិសទៀតទេ» ? និងសំណូមពរអោយថ្នាក់លើពិនិត្យបញ្ហានេះផង។
Facebook ឈ្មោះជុំសាវឿនសរសេរថា«ប្អូនប្រុសធ្វើប៉ូលិសនៅខេត្តណាឬក្រសួងនិងសង្កាត់ណាអីក៏ស្រួលយ៉ាងនេះមួយអាទិត្យធ្វើការមួយថ្ងៃស្រួលណាស់ប្អូនកូនពូជាមន្រ្តីប៉ូលិសដែរតែកូនពូបានបំពេញភារកិច្ចជូនរដ្ឋនិងប្រជាជនគ្រប់ពេលវេលាហើយគោរពភារកិច្ចនិងតួនាទីរបស់ខ្លួនដែលមេអង្គភាពប្រគល់ជូនបានល្អណាស់ខុសពីក្មួយមានពេលរកក្រៅបានចាំតែបើកប្រាកខែប៉ូលិសខាងណាលោកអើយ»។
Theara Chhay អ្នកលេងFacebook ម្នាក់ទៀតរិះគន់ថា«១អាទិត្យធ្វើការ១ថ្ងៃអួតគេក្តែងៗឯងវិញក៏ប៉ូលិសដូចលោកដែរធ្វើការគ្មានស្គាល់ចុងសប្តាហ៍មិនហ៊ានទាំងនិយាយផង» ។Facebook មួយទៀតឈ្មោះSovannarith Run សរសេរថា«ដេកស៊ីកម្លាំងញើសឈាមរាស្រ្តល្មមដកក្បាលចោលសូមថ្នាក់ដឹកនាំមេត្តាពិនិត្យផង» ។នៅមានFacebook ជាច្រើនទៀតបានរិះគន់លោកអ៊ុនសំអាត។
គួររំលឹកថាស្នងការដ្ឋាននគរបាលខេត្តកណ្តាលចេញផ្សាយនារសៀលថ្ងៃទី១៨ខែឧសភាឆ្នាំ២០២១នេះដែរថាក្រោយពីទទួលបានព័ត៌មានករណីមន្រ្តីនគរបាលម្នាក់យកកាំភ្លើងបាញ់ឆ្កែចំនួន៤គ្រាប់ដោយខឹងឆ្កែដេញខាំបណ្តាលឲ្យប្រជាពលរដ្ឋនៅក្បែរនោះភិតភ័យ, លោកឧត្តមសេនីយ៍ទោឈឿនសុចិត្តស្នងការនគរបាលខេត្តកណ្តាលបានចាត់ឲ្យផែនការងារធនធានមនុស្សដែលមានការិយាល័យបុគ្គលិកជាសេនាធិការបានចុះស្រាវជ្រាវករណីខាងលើ។
ជាលទ្ធផលផ្អែកតាមការចុះស្រាវជ្រាវរបស់ការិយាល័យបុគ្គលិកនិងផ្អែកតាមកំណត់ហេតុរបស់ប៉ុស្តិ៍នគរបាលរដ្ឋបាលតាខ្មៅបានបញ្ជាក់ឲ្យដឹងថា៖មន្រ្តីនគរបាលដែលបានយកកាំភ្លើងបាញ់ឆ្កែនោះគឺលោកអនុសេនីយ៍ឯកអ៊ុនសំអាតអត្តលេខ៦៥១៤៤អាយុ៣៥ឆ្នាំជាមន្រ្តីនៅការិយាល័យបច្ចេកទេសនិងវិទ្យាសាស្រ្តនៃស្នងការដ្ឋាននគរបាលខេត្តកណ្តាលមានទីលំនៅភូមិក្រពើហារសង្កាត់ព្រែកឬស្សីក្រុងតាខ្មៅដែលបានប្រើប្រាស់កាំភ្លើងខ្លី០១ដើម(ប្រើខ្យល់) ម៉ាកPIETRO BERTTA លេខJ59931 FH មានគ្រាប់ជ័រពណ៌សតូចៗ០៨គ្រាប់បាញ់អស់០៣គ្រាប់នៅសល់០៥គ្រាប់។
តាមការបំភ្លឺពីលោកអនុសេនីយ៍ឯកអ៊ុនសំអាតបានឲ្យដឹងថាកាលពីថ្ងៃទី១៦ខែឧសភាឆ្នាំ២០២១វេលាម៉ោង១៨និង៣០នាទីលោកបាននាំប្រពន្ធនិងកូនទៅលេងផ្ទះម្តាយបង្កើតនៅចំណុចភូមិព្រែកសំរោង៣សង្កាត់តាខ្មៅហើយបានជិះម៉ូតូតែម្នាក់ឯងគោលបំណងទៅយកក្មួយមកញាំនំនៅផ្ទះម្តាយលុះពេលជិះដល់មុខផ្ទះរបស់ឈ្មោះភាដែលជាកន្លែងលក់ទឹកត្នោតជូរស្រាប់តែមានឆ្កែពីរក្បាលរត់មកខាំជើងរបស់លោកអ៊ុនសំអាតតែមិនមុតលោកក៏ជិះម៉ូតូទៅផុតទៅ។
មួយសន្ទុះក្រោយមកលោកជិះម៉ូតូមកវិញដល់ចំណុចមុខផ្ទះឈ្មោះភាដដែលស្រាប់តែឆ្កែនោះរត់មកខាំជើងលោកម្តងទៀតតែមិនមុតដោយសារពាក់ស្បែកជើងឃ្លុប។ពេលនោះលោកបានស្រែកតែម្ចាស់ឆ្កែធ្វើមិនដឹងមិនបានឃាត់ឆ្កែទេទើបលោកខឹងបានជិះម៉ូតូទៅយកកាំភ្លើងខ្លីប្រើខ្យល់បាញ់គ្រាប់ជ័រពណ៌សតូចៗសៀតនៅចង្កេះជិះម៉ូតូកាត់មុខផ្ទះនោះម្តងទៀតស្រាប់តែឆ្កែនោះរត់មកខាំទៀតទើបលោកដកកាំភ្លើងបាញ់សំដៅឆ្កែចំនួនបីគ្រាប់តែមិនត្រូវទេ។
បច្ចុប្បន្នលោកអនុសេនីយ៍ឯកអ៊ុនសំអាតកំពុងត្រូវបានសួរនាំរួមជាមួយកាំភ្លើងខ្លី០១ដើមគ្រាប់ជ័រពណ៌សតូចៗ០៥គ្រាប់ត្រូវបានដកហូតនៅការិយាល័យបុគ្គលិករង់ចាំការសម្រេចពីក្រុមប្រឹក្សាអនុវត្តវិន័យ។ជាមួយគ្នានេះមានការបែកធ្លាយសំឡេងលោកអនុសេនីយ៍ឯកអ៊ុនសំអាតបម្រើការងារនៅការិយាល័យពិនិត្យភាគនិងកោសល្យវិច័យនៃស្នងការដ្ឋាននគរបាលខេត្តកណ្តាលដោយបានអួតអាងថា«១អាទិត្យធ្វើការតែមួយថ្ងៃទេ» ។
