ខេត្តកែប ៖ នៅព្រឹក ថ្ងៃទី០៨ ខែវិច្ឆិកា ឆ្នាំ២០១៩នេះ រដ្ឋបាលខេត្តកែប បានរៀបចំប្រារព្ធមីទ្ទិញរំលឹកខួបលើកទី៦៦ថ្ងៃបុណ្យឯករាជ្យជាតិ ថ្ងៃ៩ វិច្ឆិកា ១៩៥៣ ថ្ងៃ៩ វិច្ឆិកា ឆ្នាំ២០១៩ ។
ពិធីនេះប្រារព្ធទៅក្រោមអធិបតីភាពឯកឧត្តម សំ សារីន ប្រធានក្រុមប្រឹក្សាខេត្ត ឯកឧត្តមកែន សត្ថា អភិបាល នៃគណអភិបាលខេត្ត និង ឯកឧត្តម ស៊ឹម ស៊ីថា អគ្គនាយករដ្ឋករទឹក ដោយមានការនិមន្តចូលរួមពីព្រះមេគណខេត្តទាំង២គណៈ ឯកឧត្តមតំណាងរាស្រ្ត ឯកឧត្តមសមាជិកព្រឹទ្ធសភា និងមានការអញ្ជើញចូលរួមពីឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំមន្ទីរអង្គភាព មន្ត្រីរាជការ យុវជនគ្រប់ប្រភេទជុំវិញខេត្ត កងកម្លាំងប្រដាប់អាវុធទាំងបីប្រភេទ ព្រះសង្ឃ លោកគ្រូ អ្នកគ្រូ គរុសិស្ស សិស្សានុសិស្សនិង ប្រជាពលរដ្ឋសរុប ២៧១៩អង្គ/នាក់។
ឯកឧត្តម កែន សត្ថា អភិបាល នៃគណអភិបាលខេត្ត បានអានសន្ទរកថាស្តីពីព្រះរាជប្រវត្តិសង្ខេប ព្រះរាជបូជនីកិច្ច ទាមទារឯករាជ្យនៅកម្ពុជា ដែលមានខ្លឹមសារថាៈ ខួបលើកទី៦៦ទិវាបុណ្យឯករាជ្យជាតិ ៩វិច្ឆិកា ២០១៩ នេះ ដើម្បីរំលឹកនូវព្រះរាជបេសកកម្ម នៃការដឹកនាំ របស់សម្ដេចព្រះនរោត្តម សីហនុ ព្រះមហាវរក្សត្រ ព្រះរាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ ដែលទ្រង់បានលះបង់ព្រះកាយពល និងព្រះបញ្ញាញាណយ៉ាងខ្លាំងខ្លាបំផុតធ្វើការតស៊ូ ក្នុងក្របខ័ណ្ឌ នៃព្រះរាជបូជនីយកិច្ច ដើម្បីទាមទាឯករាជ្យជាតិ អោយប្រទេសកម្ពុជាបានរួចផុតពីអាណានិគមនិយមបារាំង ហើយប្រកាស ឯករាជ្យជាតិ នៅថ្ងៃ៩ ខែវិច្ឆិកា ឆ្នាំ១៩៥៣ វីរៈភាពដ៏អង់អាចក្លាហាននេះគឺជាគំរូដ៏ល្អដល់កូនខ្មែរ ជំនាន់ក្រោយ ក្នុងការកសាងការពារបូរណភាព និងអភិវឌ្ឍន៍ប្រទេសជាតិអោយកាន់តែមានការរីកចម្រើនទៅថ្ងៃអនាគត។
ចុងបញ្ចប់នៃមិទ្ទិញ គណៈអធីបតី និងអ្នកចូលរួមទាំងអស់ បានបង្ហោះប៉េងប៉ោង ជាសក្ខីភាព និងអបអរសាទរ ថ្ងៃឯករាជ្យជាតិ ៕
